1 Na Vosa ni Vuku, sa tukuni ki na matabose ni bete levu era a soqoni tiko mai Katiladi, kei na lotu, kei ira tale ga na yalododonu mai Saioni—

2 Me vakauti yani ena vakanuinui vinaka; io e sega ni ivakaro se veivakasaurarataki, ia na ivakatakila kei na vosa ni vuku, ka vakatakilai kina na ivakarau kei na inaki ni Kalou me baleta na nodra bulabula vakayago na yalododonu kecega ena veisiga mai muri—

3 Sa soli me ivakavuvuli ka sala vata kei na kena yalayala, sa virikotori me ganiti ira era malumalumu duadua vei ira na yalododonu, o ira era yalododonu se rawa me ra vakatokai me ra yalododonu.

4 Raica, sa kaya vakaidina vakaoqo vei kemudou na Turaga: Ena vuku ni ca kei na ilawaki sa tu rawa, se, ena qai basika e yalodra na tamata inaki ca ena veisiga mai muri, au sa vakasalataki kemudou kina, ka vakasalataki kemudou tale, ena noqu solia yani vei kemudou na vosa ni vuku oqo ena ivakatakila—

5 Raica sa sega ni vinaka me gunuva tiko e dua na tamata vei kemudou na waini kei na gunu kaukauwa, sa sega tale ga ni kilikili e matana na Tamamudou, ia sa rawa wale ga me gunuvi na waini ena nomudou soqoni vata mo dou cabora cake na nomudou sokalou ki vua.

6 Ia, raica oqo me waini vou sa caka mai na vua ni vaini, io mo dou cakava ga koi kemudou.

7 Kei na dua tale, na gunu kaukauwa sa sega ni yaga ki na kete, ia sa yaga ga me masi kina na yagomudou.

8 Kei na dua tale, na tavako sa sega ni yaga ki na yago, e sega talega ki na kete, sa sega ni vinaka vua na tamata, ia sa yaga me draunikau ni mavoa vei ira na bulumakau tauvimate, me vakayagataki vakamatau ka vakamaqosa.

9 Kei na dua tale, na gunu katakata e sega ni yaga ki na yago se ki na kete.

10 Kei na dua tale, au sa kaya vakaidina vei kemudou, sa solia na Kalou na drau ni kau kece me yaga vei ira na tamata—

11 Io na drau ni kau kecega ena kena gauna, kei na kau vuata ena kena gauna; raica me ra vakayagataki vakavuku ena yalo vakavinavinaka.

12 Io, koi Au na Turaga; au sa lewa me ra vakayagataka na tamata na lewe ni manumanu yavaiva, kei na manumanu sa vuka e macawa, io me ra vakayagataka ena yalo vakavinavinaka; ka me ra kakua ni vakasabusabutaka;

13 Ia sa ka ni marau vei au kevaka me qai vakayagataki ga ena gauna ni batabata, se ena vulaililiwa, se ena gauna ni dausiga.

14 Ia sa soli na veimataqali sila kecega me yaga vei ira na tamata, kei ira na manumanu yavaiva, io me ititoko ni bula vei ira na tamata kei ira na manumanu kecega ni vanua, na manumanu vuka e macawa, na manumanu kila, kei na manumanu sa qasi voli e dela ni vanua;

15 Raica sa bulia na ka kecega oqo na Kalou me yaga vei ira na tamata, io ena gauna wale ga ni dausiga kei na viakana.

16 Ia na veimataqali sila kecega sa yaga me kedra kakana na tamata; a sa vakatale ga kina na vua ni vaini; io na ka kecega sa vua ena vunikau, se vakalewena e loma ni qele se e dela ni qele—

17 Ia na witi me kedra na tamata, na sila me kedra na bulumakau kei na ose, kei na manumanu vuka e macawa kei na vuaka, kei na manumanu kecega ni vanua; ia na parile me kedra na manumanu susu kecega; ia sa rawa tale ga ni caka me wai ni gunu me vaka na sila tale eso.

18 Ia ko ira kecega na yalododonu sa nanuma me ra muria ka vakayacora na veika sa tukuni oqo, ka ra sa bula ka talairawarawa tiko ki na ivunau, ena ka ni bula ki na nodra ivicovico ka vakauto kina na suidra;

19 Ia era na vakavukui ka kila ka vakalevu, io era na kila na ka sa vuni tu;

20 Io era na cici ka sega ni ceguoca, io era na lako tiko ka sega ni malumalumu mai.

21 Ia koi au na Turaga au sa yalataka vei ira ni na lako siviti ira na agilosi dauveivakarusai, io me vaka a lako siviti ira na luvei Isireli ka sega ni vakamatei ira. Emeni.