Jekjōn 94
Revelesōn letok kōn Josep Smith Rikanaan eo, ilo Kirtland, Ohio, O̧kwōj 2, 1833. Hyrum Smith, Reynolds Cahoon, im Jered Carter ej jitōn̄ er āinwōt juon komiti in ekkal an Kabun̄.
1–9, Irooj ej letok juon kien kake kajutake juon em̧ n̄an jerbal ko an Presidency eo; 10–12, Juon im̧ōn kōm̧m̧an bok ko ej itōn ekkal; 13–17, Jet ian jolōt ko rej kōjjemo̧o̧ji.
1 Im bar juon alen, em̧ool Ij ba n̄an kom̧, ro jera, juon kien Ij lewōj n̄an kom̧, bwe kom̧in jinoe juon jerbal n̄an kōbabuik im kōpooje ijjino eo im pedped eo an jikin kwelo̧k eo an stake eo an Zaion, ijin ilo āneen Kirtland, ijjino jān m̧weo Im̧ō.
2 Im lo, ej aikuj kōm̧m̧an ekkar n̄an jon̄ok eo me Iaar lewōj n̄an kom̧.
3 Im wāto eo kein kajuon iturōk en jenolo̧k n̄an Eō n̄an ekkal eo an juon em̧ n̄an presidency eo, n̄an jerbal eo an presidency eo, ilo bōki revelesōn ko; im n̄an jerbal eo an presidency eo, ilo aolep men ko otemjeļo̧k rej ekkejel tok n̄an kabun̄ im aelōn̄ eo.
4 Em̧ool Ij ba n̄an kom̧, bwe enaaj ekkal lemn̄oul ļalem kōn jiljinon̄oul ļalem ne ilo depakpak eo an im ilo aetok eo an, ilo wōrwōr eo ilowaan.
5 Im enaaj wōr ilowaan juon wōrwōr ettā im juon eutiej, ekkar n̄an jon̄ok eo me naaj lewōj n̄an kom̧ ijin tokālik.
6 Im naaj ajeļo̧k e n̄an Irooj jān pedped eo an, ekkar n̄an laajrak eo an priesthood eo, ekkar n̄an jon̄ok eo me naaj lewōj n̄an kom̧ ijin tokālik.
7 Im e naaj aolepem ajeļo̧k n̄an Irooj n̄an jerbal eo an presidency eo.
8 Im kom̧in jab naaj kōtļo̧k jabdewōt men ettoon n̄an itok n̄an ilo e; im Aō aiboojoj enaaj pād ijo, im I naaj pād ijo.
9 A eļan̄n̄e enaaj itok ilowaan jabdewōt men ettoon, Aō aiboojoj eban pād ijo; im Ij jamin itok ilowaan.
10 Im bar juon alen, em̧ool Ij ba n̄an kom̧, wāto eo kein karuo iturōk naaj ajetok n̄an Eō n̄an ekkal eo an juon em̧ n̄an Eō, n̄an jerbal in kōm̧m̧ani bok ko ukok in jeje ko rekwōjarjar Aō, im aolep men ko otemjeļo̧k I naaj jiron̄ kom̧.
11 Im enaaj lemn̄oul ļalem kōn jiljinon̄oul ļalem ne ilo depakpak eo an im aetok eo an, ilo wōrwōr eo ilowaan; im enaaj wōr juon wōrwōr ettā im juon wōrwōr eutiej.
12 Im m̧wiin enaaj aolepem ajeļo̧k n̄an Irooj jān pedped eo an, n̄an jerbal eo an kōm̧m̧ani bok ko, ilo aolep men ko otemjeļo̧k I naaj jiron̄ kom̧, n̄an ekwōjarjar, jab ettoon, ekkar n̄an jon̄ok eo ilo aolep men ko otemjeļo̧k āinwōt naaj lewōj e n̄an kom̧.
13 Im ioon wāto eo kein kajilu karejera Hyrum Smith enaaj bōk jolōt eo an.
14 Im ioon wāto eo kein kajuon im kein karuo ituiōn̄ ro karejera Reynolds Cahoon im Jered Carter naaj bōk jolōt ko aer—
15 Bwe ren maron̄ kōm̧m̧ane jerbal eo me Iaar jitōn̄e n̄an er, n̄an juon komiti n̄an kalōki m̧ōko Im̧ō, ekkar n̄an kien eo, me N̄a, Irooj Anij, Iaar lewōj n̄an kom̧.
16 M̧ōkein ruo ren jab ekkal m̧ae Aō lewōj n̄an kom̧ juon kien kaki.
17 Im kiiō Ij lewōj n̄an kom̧ ej jab ļapļo̧k wōt ilo iien in. Amen.