Jekjōn 96
Revelesōn leļo̧k n̄an Josep Smith Rikanaan eo, im ej kwaļo̧k karkan jikin kwelo̧k ak stake eo an Zaion ilo Kirtland, Ohio, Juun 4, 1833, leļo̧k e āinwōt juon waanjon̄ok n̄an Ro Rekwōjarjar ilo Kirtland. Iien jab in ekar juon kwelo̧k an pris utiej ro, im mennin ekkōnono eo eļap ar watōke ajej an jet bwidej ko, kar etaer French farm, kar an Kabun̄ in iturin Kirtland. Kōn wōt an kar kwelo̧k eļap in jab errā wōn en bōk eddo in jikin kallib in, aolep rekar errā n̄an kajjitōk ippān Irooj kake men in.
1, Kirtland Stake ilo Zaion ro uwaan ren kanooj kajoor e; 2–5, Bisop eo ej itōn ajeji jolōt ko n̄an Ro Rekwōjarjar; 6–9, Jon Johnson ej itōn juon uwaan koņ eo.
1 Lo, Ij ba n̄an kom̧, en̄in ej mālōtlōt, jān e kom̧ maron̄ jeļā ewi wāween m̧akūtkūt kōn menin, bwe emennin aikuj ilo N̄a bwe stake in eo me Iaar likūti n̄an kajoor eo an Zaion en kajoorļo̧k.
2 Kōn menin, karejera Newel K. Whitney en bōk eddo in jikin eo im ba kake ilubwiljimi, eo me ioon Ij karōk n̄an kalōke m̧weo Im̧ō ekwōjarjar.
3 Im bar juon alen, en ajej ilo m̧ōttan ko, ekkar n̄an mālōtlōt, n̄an em̧m̧an eo an ro rej kappukot jikin jolōt ko, āinwōt naaj ko̧koņe ilo ko̧o̧njeļ ilubwiljimi.
4 Kōn menin, kanooj kōjparok bwe kom̧in lale men in, im bwe m̧ōttan eo aikuji n̄an kōjeraam̧m̧an koņ eo Aō, kōn un in n̄an bōk m̧aantak naan eo Aō n̄an ro nejin armej raņ.
5 Bwe lo, em̧ool Ij ba n̄an kom̧, en̄in ej men eo emennin aikuj tata ilo N̄a, bwe naan eo Aō en ilo̧k n̄an ro nejin armej raņ, kōn un in n̄an kameoeoik būruōn ro nejin armej raņ n̄an em̧m̧an eo ami. Em̧ool āindein. Amen.
6 Im bar juon alen, em̧ool Ij ba n̄an kom̧, e ej mālōtlōt im mennin aikuj ilo N̄a, bwe karejera Jon Johnson eo joortak eo an Iaar bōke, im eo jar ko an Iaar ron̄, n̄an eo Ij leļo̧k kallim̧ur eo kōn mour indeeo toun wōt an kōjparok kien ko Aō jān iien in m̧aanļo̧k—
7 Bwe e ej juon bwijjin Josep im juon eo dien bōk kōjeraam̧m̧an ko an kallim̧ur eo kar kōm̧m̧ane n̄an ro jemān—
8 Em̧ool Ij ba n̄an kom̧, e mennin aikuj ilo N̄a bwe e en erom juon uwaan bōrokuk eo, bwe en maron̄ jipan̄ ilo bōk m̧aantak naan eo Aō n̄an ro nejin armej raņ.
9 Kōn menin kom̧ naaj kapit e n̄an kōjeraam̧m̧an in, im enaaj kanooj kappukote n̄an bōkļo̧k m̧uri ko rej ioon m̧weo ba kake ilubwiljimi, bwe en maron̄ jokwe ie. Em̧ool āindein. Amen.