Jekjōn 98
Revelesōn letok kōn Josep Smith Rikanaan eo, ilo Kirtland, Ohio, O̧kwōj 6, 1833. Revelesōn in eaar itok āinwōt uwaak in matōrtōr eo ņae Ro Rekwōjarjar ilo Missouri. Lōn̄ļo̧k in ro uwaan Kabun̄ in ilo Missouri ekar kainepataik bar jet rijokwe ijen, ro rekar mijak oran ko an Ro Rekwōjarjar, aer jelōt kien im economy eo, im oktak ko ikkijien manit im kabun̄. Ilo Juļae 1833, juon jarlepiju nana ekar kakkure ijoko jikin Kabun̄ in, biji im kalibubu kōn kolan bao ruo uwaan Kabun̄ in, im akweļap bwe Ro Rekwōjarjar ren etal jān Jackson Kounty. Men̄e jet ennaan kōn apan̄ ko ilo Missouri ejjeļo̧k pere ke rekar tōpare Rikanaan eo ilo Kirtland (ruwatimjuonbukwi m̧aiļ ettoļo̧k), jon̄an nana eo an jekjek eo e eban kar jeļā kake ilo raan in ijello̧kun wōt jān revelesōn.
1–3, En̄taan ko an Ro Rekwōjarjar rej n̄an em̧m̧an eo aer; 4–8, Ro Rekwōjarjar ren rie kien jemān-āe eo an āneo; 9–10, Armej ro rem̧ool, remālōtlōt, im rem̧m̧an reaikuj rejetake er n̄an kien eo; 11–15, Ro rej likūt mour ko aer ilo jerbal eo an Irooj renaaj bōk mour indeeo; 16–18, Bōbrae tariņae im kabun̄bun̄ļo̧k aenōm̧m̧an; 19–22, Ro Rekwōjarjar ilo Kirtland kar kauwe er im jiron̄ er n̄an ukeļo̧k; 23–32, Irooj ej kwaļo̧k kien ko An rej tōl kōn matōrtōr ko im en̄taan ko likūt ioon armej ro An; 33–38, Tariņae ej jejjet wōt n̄e Irooj ej jiron̄ n̄an kōm̧m̧ane; 39–48, Ro Rekwōjarjar ren jeorļo̧k bōd ko an rikōjdat ro aer, ro, eļan̄n̄e rej ukeļo̧k, renaaj jo̧o̧r jān idenoņe an Irooj.
1 Em̧ool Ij ba n̄an kom̧ ro jera, jab mijak, būruōmi ren ineem̧m̧an; aaet, m̧ōņōņō iien otemjej, im ilo men otemjej leļo̧k kam̧m̧oolol;
2 Kom̧in kōttar Irooj ilo kijenmej, bwe jar ko ami rekar deļo̧n̄ ilo lo̧jiln̄in Irooj in Sabaot, im em̧ōj ļo̧o̧ki kōn sil im kam̧ool in—Irooj Eaar kallim̧ur im kean̄ bwe naaj leļo̧k uwaakier.
3 Kōn menin, Ej lewōj kallim̧ur in n̄an kom̧, kōn juon bujen eo ej jamin oktak bwe renaaj kūrm̧ool; im aolep men ko kom̧ ar en̄taan kaki renaaj jerbal ippān doon n̄an em̧m̧an eo ami, im n̄an aiboojoj eo an Eta, Irooj ej ba.
4 Im kiiō, em̧ool Ij ba n̄an kom̧ kōn kakien ko an āneo, in ej ankilaō bwe armej ro Aō ren kōjparok n̄an kōm̧m̧ane aolep men ko jabdewōt Ij jiron̄ er.
5 Im kien eo an āneo me ej kōmlet ium̧win jemān-āe eo, im ej rejetake pedped in anemkwōj ilo dāpiji jim̧we ko im maron̄ ko, rej an aolep armej otemjej, im maron̄ rie Im̧aō.
6 Kōn menin, N̄a, Irooj, Ij rie kom̧, im ro jeiūm̧i im jātimi an kabun̄ in Aō, ilo rie kien eo me ej jemān-āe eo an āneo;
7 Im āinwōt ke ejelōt kien ko an armej, jabdewōt men eo eļapļo̧k ak edikļo̧k jān in, ej itok jān nana.
8 N̄a, Irooj Anij, Ij kaanemkwōj kom̧, kōn menin kom̧ij lukkuun anemkwōj; im kien eo ej barāinwōt kaanemkwōj kom̧.
9 Mekarta, n̄e ro renana rej irooj armej ro rej liaajlo̧ļ.
10 Kōn menin, armej ro rem̧ool im armej ro remālōtlōt kom̧in niknik pukot er, im armej ro rem̧m̧an im armej ro remālōtlōt kom̧in kōjparok n̄an rejetake er; eļan̄n̄e jaab jabdewōt edikļo̧k jān rein ej itok jān nana.
11 Im Ij lewōj n̄an kom̧ juon kien, bwe kom̧ naaj eļļo̧k jān aolep nana im eddāp n̄an aolep em̧m̧an, bwe kom̧ naaj mour ekkar n̄an naan otemjej ej diwōjtok jān lo̧n̄iin Anij.
12 Bwe E enaaj leļo̧k n̄an ro rej tiljek lain ioon lain, kain̄i ioon kain̄i; im I naaj mālejjon̄e kom̧ im idajon̄jon̄e kom̧ jān wāween in.
13 Im jabdewōt eo ej likūt mour eo an ilo jibadbad eo Aō, kōn Eta, enaaj bar lo e, em̧ool mour indeeo.
14 Kōn menin, jab mijak rikōjdat ro ami, bwe Iaar jeke ilo Buruō, Irooj ej ba, bwe Inaaj idajon̄jon̄e kom̧ ilo men otemjej, eļan̄n̄e kom̧ naaj pād wōt ilo bujen eo Aō, em̧ool n̄an mej, bwe maron̄ lo kom̧ ritōllo̧ke.
15 Bwe eļan̄n̄e kom̧ jamin pād wōt ilo bujen eo Aō kom̧ij jab tōllo̧ke Eō.
16 Kōn menin, unujiļo̧k tariņae im kabun̄bun̄ļo̧k aenōm̧m̧an, im kanooj kappukot n̄an ukōtļo̧k būruōn ajri raņ n̄an ro jemāer, im būruōn ro jemāer n̄an ro nejier;
17 Im bar juon alen, būruōn riJu raņ n̄an rikanaan ro, im rikanaan ro n̄an riJu raņ; n̄e Iab itok im den̄ļo̧ke aolepān laļ kōn juon lia, im kanniōk otemjej naaj kan̄ļo̧k er Im̧aō.
18 En jab inepata būruōmi; bwe ilo m̧weo im̧ōn Jema elōn̄ jikin ko rem̧m̧an, im em̧ōj Aō kōpooj juon jikin n̄an kom̧; im ijo Jema im N̄a kōmij pād ie, ijo kom̧ naaj pād ie barāinwōt.
19 Lo, N̄a, Irooj, Ij jab m̧ōņōņō ippān elōn̄ ro ilo kabun̄ in ilo Kirtland;
20 Bwe rej jab eļļo̧k jān jero̧wiwi ko aer, im iaļ ko renana aer, im juwa eo an burueer, im aer ankoņak, im aolep mennin jōjō ko aer otemjeļo̧k, im kōjparok naan ko in mālōtlōt im mour indeeo me Iaar liļo̧k n̄an er.
21 Em̧ool Ij ba n̄an kom̧, bwe N̄a, Irooj, Inaaj kauweik er im naaj kōm̧m̧an jabdewōt Ij kōņaan, eļan̄n̄e rej jab ukeļo̧k im kōjparok aolep men ko otemjeļo̧k Iaar ba n̄an er.
22 Im bar juon alen Ij ba n̄an kom̧, eļan̄n̄e kom̧ij kōjparok n̄an kōm̧m̧an jabdewōt Ij jiron̄ kom̧, N̄a, Irooj, Inaaj kajeorļo̧k aolep illu im libabne jān kom̧, im aor ko an hell rej jamin anjo̧ ņae kom̧.
23 Kiiō, Ij kōnono n̄an kom̧ kōn baam̧le ko ami—eļan̄n̄e rej den̄ļo̧ke kom̧, ak baam̧le ko ami, juon alen, im kom̧ij ineeke ilo ineem̧m̧an im jab kōnono ņae er, im jab kappukot idenoņe, kom̧ naaj bōk woņeam̧i;
24 A eļan̄n̄e kom̧ij jab ineeke ilo ineem̧m̧an, enaaj bōnbōn n̄an kom̧ āinwōt jon̄ok eo ejim̧we n̄an kom̧.
25 Im bar juon alen, eļan̄n̄e ami rikōjdat enaaj den̄ļo̧ke kom̧ alen kein karuo, im kom̧ij jab kōnono ņae rikōjdat eo ami, im ineeke ilo ineem̧m̧an, woņeam̧i enaaj bukwi alen an ļapļo̧k.
26 Im bar juon alen, eļan̄n̄e enaaj den̄ļo̧ke kom̧ kein kajilu, im kom̧ij ineeke ilo ineem̧m̧an, woņeam̧i enaaj wōrļo̧k n̄an kom̧ emān alen;
27 Im naan in kam̧ool kein jilu renaaj jutak ņae rikōjdat eo ami eļan̄n̄e ej jab ukeļo̧k, im reban m̧aniļo̧k.
28 Im kiiō, em̧ool Ij ba n̄an kom̧, eļan̄n̄e rikōjdat eo enaaj ko jān Aō idenoņe, bwe en jab itok ilo ekajet Im̧aō, innām kom̧ naaj lale bwe kom̧in kakkōl e ilo Eta, bwe en jab bar itok ioomi, im jab ioon baam̧le eo ami, em̧ool ioon ro nejin ro nejimi n̄an epepen eo kein kajilu im kein kāāmen.
29 Innām, eļan̄n̄e enaaj itok ioomi ak ioon ro nejimi, ak ioon ro nejin ro nejimi n̄an epepen eo kein kajilu im kein kāāmen, em̧ōj Aō lewōj rikōjdat eo ami ilo peimi;
30 Innām eļan̄n̄e kwo naaj kōtļo̧k e, naaj ņa woņeam̧i kōn wānōk eo ami; im barāinwōt ro nejimi im ro nejin ro nejimi n̄an epepen eo kein kajilu im kein kāāmen.
31 Mekarta, rikōjdat eo ami ej pād ilo peimi; im eļan̄n̄e kom̧ij ņa wōņāān ekkar n̄an jerbal ko an kom̧ jim̧we; eļan̄n̄e eaar kappukote mour eo am, im mour eo am ej pād ilo kauwōtata jān e, rikōjdat ej pād ilo peim im kwo jim̧we.
32 Lo, en̄in ej kien eo Iaar leļo̧k n̄an karejera Nipai, im ro jemāmi, Josep, im Jekab, im Aisak, im Ebream, im aolep rikanaan im rijjilōk ro Aō etto.
33 Im bar juon alen, en̄in ej kien eo Iaar leļo̧k n̄an ro doō etto, bwe ren maron̄ jab diwōjļo̧k n̄an tariņae ņae jabdewōt laļ, bwij, lo, ak armej, ijello̧kun n̄e N̄a, Irooj, Iaar jiron̄ er.
34 Im eļan̄n̄e jabdewōt laļ, lo, ak armej rej itōn tariņae ņae er, ren m̧okta kotak kakōļļe in aenōm̧m̧an n̄an armej raņ, laļ en, ak lo;
35 Im eļan̄n̄e armej raņ reban kar bōk mennin leļo̧k eo am kōn aenōm̧m̧an, im jab bar alen kein karuo ak jab alen kein kajilu, ren bōktok naan in kam̧ool kein im̧aan Irooj;
36 Innām N̄a, Irooj, Inaaj kar leļo̧k n̄an er juon kien, im kajim̧we er ilo aer diwōjļo̧k n̄an pata ņae laļ en, lo ak armej en.
37 Im N̄a, Irooj, Inaaj kar kōpata n̄an er ilo pata ko aer; im pata ko an ro nejier, im ro nejin ro nejier, m̧ae aer kar idenoņeik er ioon aolep rikōjdat aer, n̄an epepen eo kein kajilu im kāāmen.
38 Lo, en̄in ej jon̄ok eo n̄an armej otemjej, Irooj ami Anij ej ba, n̄an lukkuun jejjet eo Im̧aō.
39 Im bar juon alen, em̧ool Ij ba n̄an kom̧, eļan̄n̄e ālikin an kar ami rikōjdat itok ioomi alen kein kajuon, ej ukeļo̧k im itok n̄an ippemi im akweļap kōn ami jeorļo̧k bōd, kom̧ naaj jeorļo̧k an bōd, im naaj jab dāpiji wōt āinwōt juon naan in kam̧ool ņae rikōjdat eo ami—
40 Im āindein m̧aanļo̧k n̄an alen kein karuo im kajilu; im jon̄an wōt ekkutkut in an rikōjdat eo am ukeļo̧k jān bōd eo eaar bōd ņae eok, kwōn jeorļo̧k an bōd, m̧ae jiljilimjuonn̄oul alen jiljilimjuon.
41 Im eļan̄n̄e ej bōd ņae eok im jab ukeļo̧k alen eo kein kajuon, mekarta kwōn jeorļo̧k an bōd.
42 Im eļan̄n̄e ej bōd ņae eok alen kein karuo, im jab ukeļo̧k, mekarta kwōn jeorļo̧k an bōd.
43 Im eļan̄n̄e ej bōd ņae eok alen kein kajilu, im jab ukeļo̧k, kwōn barāinwōt jeorļo̧k an bōd.
44 A eļan̄n̄e ej bōd ņae eok alen kein kāāmen kwōn jab jeorļo̧k an bōd, a kwōn bōktok naan in kam̧ool kein im̧aan Irooj; im rejamin naaj m̧aniļo̧k m̧ae an ukeļo̧k im ņa woņeam̧ emān alen an ļapļo̧k ilo aolep men ko otemjeļo̧k eaar bōd ņae eok.
45 Im eļan̄n̄e ej kōm̧m̧ane men in, kwōn jeorļo̧k an bōd kōn aolepān būruōm̧; im eļan̄n̄e ej jab kōm̧m̧ane men in, N̄a, Irooj, Inaaj idenoņeik rikōjdat eo am bukwi alen;
46 Im ioon ro nejin, im ioon ro nejin ro nejin in aolep er ro rej dike Eō, n̄an epepen eo kein kajilu im kein kāāmen.
47 A eļan̄n̄e ro nejier renaaj ukeļo̧k, ak ro nejin ro nejier, im oktaktok n̄an Irooj aer Anij, kōn aolepān burueer im kōn aolepān aer maron̄, ļōmņak, im kajoor, im kōjepļaakļo̧k emān alen n̄an aolep bōd ko aer im rekar bōd, ak kōn ko me ro jemāer rekar bōd, ak ro jemān ro jemāer, innām Am̧ libabne en oktakļo̧k;
48 Im idenoņe e jamin naaj itok wōt ioer, Irooj am Anij ej ba, im bōd ko aer rej jamin naaj bōktok āinwōt juon naan in kam̧ool im̧aan Irooj ņae er. Amen.