Wase 99
Na ivakatakila sa soli yani mai vei Josefa Simici na Parofita me baleti Joni Modoki, ena 29 ni Okosita 1832, e Airame, Oaio. Sa sivia na dua na yabaki na nona vunautaka voli o Joni Modoki na kosipeli ena gauna vata era tiko kina kei na veimatavuvale eso mai Oaio na luvena—sa mai sega tu na tinadra ena nona sa mate na watina, o Julia Kelepi, ena Epereli 1831.
1–8, Sa lesi ko Joni Modoki me vunautaka na kosipeli, ia ko ira sa vakabauti koya era sa vakabauta na Turaga, era na rawata na loloma cecere.
1 Raica, sa kaya vakaoqo na Turaga vei Joni Modoki na noqu tamata—Ko sa kacivi mo lako ki na veivanua mai na tokalau, ena nodra veivale yadua, mai na dua na koro ki na dua tale, ka vakakina mai na dua na koro levu ki na dua tale, mo vunautaka na noqu kosipeli tawavakaiyalayala vei ira na lewena, ena loma ni veivakacacani kei na caka ca.
2 Ia ko ira sa ciqomi iko era sa ciqomi au; ka na soli vei iko na kaukauwa mo vunautaka kina na noqu vosa ena veivakauqeti ni noqu Yalo Tabu.
3 Ia ko ira sa ciqomi iko me vaka na gone lailai, sa vakabauta na noqu matanitu; raica era sa kalougata ni ra na rawata na loloma cecere.
4 Ia ko koya sa sega ni ciqomi iko, ena sega ni ciqomi koya ko Tamaqu kei ira sa nona; ia ni ko sa lako, mo la’ki savata vuni na yavamu ena nomu sala me ra beitaki kina.
5 Ia raica, ka rogoca, au na lako kusarawa mai me ia na veilewai, io me’u vunauci ira ena nodra ivalavala kecega sa sega ni vakalou era sa kitaka vei au, io au na lako mai me vaka sa volai ena ivola.
6 Ia oqo, au sa kaya vakaidina vei iko, sa sega ni kilikili mo lako me yacova ni sa vakarautaki tu na veika me baleti ira na luvemu, io me ra vakau yani ki vua na bisopi mai Saioni.
7 Ia ni sa oti e vica na yabaki, kevaka ko qai kerea vei au, sa rawa mo lako tale ga ki na vanua yalataki ko ya ka la’ki taura kina na nomu ivotavota vakawa;
8 Ia kevaka e sega mo na vunautaka tiko ga yani na noqu kosipeli me yacova ni ko sa mate. Emeni.