Benneg 9
Paltiing a naited ken ni Oliver Cowdery babaen ni Joseph Smith a Propeta, iti Harmony, Pennsylvania, idi Abril 1829 (History of the Church, 1:37–38). Mapatigmaanan ni Oliver nga agan-anus, ken maigunamgunam kenkuana a mapnek nga agsurat, bayat dayta a panawen, babaen ti panangibasa ti agipatpatarus, imbes a padasenna koma ti agipatarus.
1–6, Saan pay a naipatarus dagiti sabali pay a nagkauna a kasuratan; 7–14, Naipatarus ti Libro ni Mormon babaen ti panagadal ken naespirituan a pammatalged.
1 Adtoy, kunak kenka, anakko, a gapu ta saanka a nagipatarus a maibatay iti tinarigagayam kaniak, ket inrugim manen ti nagsurat para iti katulongak, a ni Joseph Smith, Jun., kasta met a kayatko nga ituloymo agingga a maiwakasmo daytoy a kasuratan, nga intalekko kenkuana.
2 Kalpasanna, adtoy, dagiti sabali a sinurat nga adda kaniak, a pangtedak kenka iti bileg tapno makatulongka a mangipatarus.
3 Agan-anuska, anakko, ta nakemko daytoy, ket saan a maikanada nga agipataruskan iti daytoy a panawen.
4 Adtoy, panagsurat para iti katulongak a ni Joseph ti naituding kenka nga aramid.
5 Ket, adtoy, gapu iti dimo panangituloy iti narugiam, idi rinugiam ti nagipatarus, ti nangibabawyak iti daytoy a gundaway kenka.
6 Saanka nga agdayamudom, anakko, ta panunotko a kastoy a wagas ti aramidek kenka.
7 Adtoy, dimo naawatan; impapanmo nga intedko kenka, idi dimo pinanunot malaksid ti agsaludsod kaniak.
8 Ngem, adtoy, kunak kenka, a nasken nga adalem iti panunotmo; kalpasanna damagem kaniak no pudno, ket no pudno ipariknakto ti ibabara ti barukongmo; ngarud, mariknam a pudno.
9 Ngem no saan a pudno awanto ti kasta a mariknam, ngem makulkolto ti panunotmo a pakalipatam iti banag a biddut; ngarud, saanmo a maisurat dayta a nasagraduan malaksid no maited kenka manipud kaniak.
10 Ita, no ammom koma dagitoy nalabit a nakaipataruska; nupay kasta, saan a maikanada nga agipataruska itan.
11 Adtoy, maikanada idi nangrugika; ngem nagbutengka, ket naglabas ti panawen, ket saanen a maikanada ita;
12 Ta, dimo kadi nakita nga intedko iti katulongak a ni Joseph ti umdas a pigsa, a nakaaramidanna? Ket awan kadakayo ti kedngak.
13 Aramidem daytoy a banag nga imbilinko kenka, ket rumang-aykanto. Agbalinka a napudno, ket saanka a sumuko iti sulisog.
14 Agbalinka a natibker iti aramid nga intudingko kenka, ket awan ti mapukaw a buokmo uray no nginabras laeng, ket maitag-aykanto iti maudi nga aldaw. Amen.