14. Ti Pagtagilakuan ni Propeta Joseph Smith a Naaramid iti Nalabaga a Nardilio

Masarakan daytoy napabaro a pagtagilakuan ken opisina ni Joseph Smith iti Nauvoo, Illinois. Maysa daytoy kadagiti kapatgan a pasdek iti Simbaan kabayatan ti panawen ti Nauvoo. Saan laeng nga agserbi a kas sapasap a pagtagilakuan, nagbalin pay daytoy a sentro dagiti aktibidad a mainaig iti kagimongan, ekonomia, politika, ken relihion. Nangpatalinaed ni Joseph Smith iti maysa nga opisina iti maikadua a kadsaaran.

Dagiti Napapateg a Pasamak: Sakbay ti pannakaileppas ti templo, naaramat ti nangatngato a siled ti pagtagilakuan a kas maysa a siled ti ordinansa, a nakaitedan dagiti umuna a naan-anay a talugading. Idi maika-17 ti Marso 1842, binukel ni Propeta Joseph dagiti babbai ti Simbaan iti Gimong ti Kaasi.