18. Templo ti Salt Lake

Sumagmamano nga aldaw kalpasan ti iseserrek iti Tanap ti Salt Lake ti umuna a nangyuna a bunggoy dagiti Santo iti Ud-udina nga Aldaw, intugkel ni President Brigham Young ti sarukodna iti daga ket impakdaarna, “Ditoy ti pangbangonantayo iti templo ti Diostayo.” Nakali ti daga a pagpatakderan idi maika-14 ti Pebrero 1853. Idi maika-6 ti Abril 1853, naikabil dagiti panuli a bato. Naileppas ken naidaton ti templo kalpasan ti 40 a tawen idi maika-6 ti Abril 1893. Agmimiting ditoy ti Umuna a Panguluen ken ti Korum dagiti Sangapulo-ket-dua nga Apostol iti linawas tapno agpanunot a nasayaat ken dumawatda iti pangiturong ti Apo maipanggep iti panangimaton ken panangbangon ti pagarian ti Dios.

Dagiti Napapateg a Pasamak: Inikkan ti Apo dagiti Presidente ti Simbaan ken dadduma pay a Sapasap nga Agrebbeng iti pannakaibukbok ti espiritu ti paltiing ditoy, a pakairamanan ti Opisial a Palawag—2. Itay kallabes la unay, nagkaykaysa nga inanamongan ken impablaak ti Umuna a Panguluen ken ti Konseho dagiti Sangapulo-ket-dua nga Apostol ti “Ti Kaamaan: Maysa a Waragawag iti Lubong.” Dagiti ordinansa iti templo a naannong para kadagiti agpada a sibibiag ken natay ket nangbendision iti biag dagiti minilion.