15. Templo ti Nauvoo

Masarakan daytoy modelo nga iskala ti Templo ti Nauvoo iti disso ti sigud a templo. Nabangon ti templo manipud iti lokal a maris dapo a babato nga apog. Agrukod ti pasdek iti 39 a metro ti kaatiddogna ken 27 a metro ti kaakabana. Agtayag ti torre iti 48 a metro. NagDagiti Aramid dagiti kameng ti Simbaan iti adu a sakripisio tapno mabangon daytoy napintas a templo, a nairugi ti trabaho idi 1841. Adda dagiti nagbannog iti adu a bulan iti pasdek; insakripisio met dagiti dadduma ti kuartada. Nupay saan pay a naan-anay a nalpas, napno ti templo kadagiti kameng nga umay para kadagiti ordinansa kabayatan dagiti bulan sakbay ti ipapanawda a nagturong iti Laud. Idinto ta adu kadagiti Santo ti pimmanaw iti Nauvoo iti nasapa a panagsusulbod ti 1846 gapu iti pammutbuteng a panagranggas ti bunggoy a mangriribuk, nagbati dagiti naisangsangayan a trabahador a mangileppas iti templo. Idi maika-30 ti Abril 1846, indaton da Elder Orson Hyde ken Wilford Woodruff ken agarup a 20 a dadduma pay daytoy a balay ti Apo. Nabaybay-an ti templo idi Septiembre idi napapanaw iti Nauvoo dagiti nabati pay a kameng ti Simbaan; rinugitan ken dinadael ngarud dagiti mangriribuk a bunggoy ti sagrado a pasdek. Nauram idi Oktubre 1848.

Dagiti Napapateg a Pasamak: Naangay ti sapasap a komperensia iti paguummongan a siled ti templo idi maika-5 ti Oktubre 1845. Nairugi ti aramid a talugading idi maika-10 ti Disiembre 1845 ket nagtultuloy agingga idi maika-7 ti Pebrero 1846. Nasurok a 5,500 a Santo iti Ud-udina nga Aldaw ti nakaawat iti talugadingda, ket adu a panagbuniag para kadagiti natay ken panaglantip ti naannong.