17. Na Lako Yani ki na Ra

Na itekivu ni kena vakalalai ko Nauvu, e Ilinoi a nakiti me vakayacori ena Maji–Epereli, ia ena vuku ni nodra veivakarerei na ilawalawa dauvakacaca sa mani lewa kina ko Peresitedi Biriqemu Yaga me na qai tekivu na nodra lako yani na Yalododonu ena nodra kosova na Uciwai na Misisipi ena i ka 4 ni Feperueri 1846. A tiko mai ko Peresitedi Yaga me qarava na nodra edaumeni na Yalododonu ka sega kina ni biuti Nauvu me yacova na loma ni vula ko Feperueri.

Na Ka e Yaco: Ni se bera ni mate a parofisai vakaoqo na Parofita ko Josefa Simici, “Eso vei kemuni era na bula tiko me ra laki veivuke ena caka itikotiko ka tara koro lelevu ka raica me ra tamata qaqa na Yalododonu ena maliwa ni Rocky Mountains.” E voleka ni 12,000 na Yalododonu era a biuti Nauvu mai ena Feperueri ki na Sepiteba ni 1846. Ni oti na nodra biuti Winita Kuota na Yalododonu kei na veitikotiko tale eso, era a cokonaki ki na veikabani ni le yatini, limasagavulu, kei na duanadrau, ka liutaka e dua na kena turaga ni kabani (V&V 136:3). Ena Sepiteba ni 1846 era a bololaki Nauvu kina e dua na ilawalawa ka rauta ni 800 na tagane ka ra vakaiyaragi ena ono na dakainivanua. Ni oti e vica vata na siga ni veivala, era sa mani soro na vo ni Yalododonu me rawa kina ni ra bula ka rawa ni ra bau kosova na uciwai. E lima ki na ono na drau na tagane, yalewa, kei na gone era a kosova ka keba ga ena bati ni uciwai. A tala yani ko Peresitedi Biriqemu Yaga eso na ilawalawa dauveivueti vata kei na kakana me ra vueti ira mai na “Yalododonu dravudravua” oqo.