5. Nima’ Susquehanna

Li jalam-uuch a’in naxk’ut li Nima’ Susquehanna sa’ xweent li tenamit Harmony, Pennsylvania.

K’a’ru kik’ulman: Laj Jose Smith, alalb’ej, kiwulak Harmony xb’een wa sa’ 1825 re xsik’b’al xtrabaaj. Rochb’een lix yuwa’, kik’ehe’ xna’aj arin sa’ rochoch laj Isaac Hale, b’ar wi’ laj Jose kixnaw ru li xEmma Hale, li taawanq moqon choq’ rixaqil (JS—R 1:56–57). Laj Jose ut li xEmma ke’sumla sa’ 18 Enero, 1827. Li Profeet kixk’uleb’ li perel ch’iich’ sa’ 22 Septiembre, 1827 sa’ Manchester, Nueva York, ut ka’ch’in chik chirix a’an kiq’axon rochb’een li xEmma toj Harmony, b’ar wi’ ki’ok chixjaltesinkil ru li aatin chiruheb’ li perel ch’iich’. Naq yoo xjaltesinkil ru lix Hu laj Mormon, laj Jose ut laj Oliver Cowdery ke’raj xtawb’al chik xna’leb’ chirix li kub’iha’ ut ke’b’eek toj sa’ jun na’ajej nach’ arin sa’ k’iche’ re tijok chiru li Qaawa’ chirix li na’leb’ a’an. Re xsumenkil li tij a’in, laj Jwan aj Kub’sihom Ha’ kixk’ut rib’ sa’ 15 Mayo, 1829 (JS—R 1:66–74; Tz. ut S. 13). A’an kixk’ojob’ li Tijonelil re Aaron sa’ xb’een laj Jose ut laj Oliver. Toja’ naq ke’ok sa’ li nima’ ut ke’xkub’si xha’ chirib’ileb’ rib’ choq’ re risinkil li maak. Chirix a’an laj Jose ut laj Oliver ke’b’eresiik xb’aan laj Jwan aj Kub’sihom Ha’ chixk’ojob’ankil rib’ chirib’ileb’ rib’ sa’ li Tijonelil re Aaron. Ka’ch’in chik chirix a’an, laj Pedro, laj Santiago, ut laj Jwan ke’xk’ut rib’ sa’ xyanq Harmony ut Colesville ut ke’xk’ojob’ sa’ xb’een laj Jose ut laj Oliver li Tijonelil re Melkisedek (Tz. ut S. 27:12–13; 128:20).