LSS, ʻEkesōtosi 34:1–2, 14. Fakafehoanaki mo e ʻEkesōtosi 34:1–2, 14; T&F 84:21–26
ʻOku toe hiki ʻe he ʻOtuá ʻa e fonó ʻi he ongo maka naʻe teuteu ʻe Mōsesé ka Ne ʻave ʻa e Lakanga Taulaʻeiki Faka-Melekisētekí mo hono ngaahi ouaú mei he fānau ʻo ʻIsilelí. Ka ʻokú Ne ʻoange kiate kinautolu ʻa e fono ʻoku ʻi ai e ngaahi fekau fakatuʻasino.
1 Pea naʻe folofola ʻa e ʻEikí kia Mōsese, Ke ke tā ha maka lafalafa ʻe ua kehe, ke hangē ko e ʻuluakí, pea te u tohi ki ai foki, ʻa e ngaahi lea ʻo e fonó, ʻo fakatatau mo ia naʻe ʻuluaki tohi ʻi he ngaahi maka lafalafa ʻa ia naʻá ke maumauʻí; ka ʻe ʻikai fakatatau ia ki he ʻuluakí, he te u toʻo ʻa e lakanga taulaʻeikí mei honau lotolotongá; ko ia ko hoku lakanga toputapú pea mo e ngaahi ouau ʻo iá, ʻe ʻikai ʻoatu ia kiate kinautolu, koeʻuhí ʻe ʻikai toe ʻalu atu hoku nāunaú ʻi honau lotolotongá, telia naʻá ku fakaʻauha ʻa kinautolu.
2 Ka te u foaki kiate kinautolu ʻa e fono ʻo hangē ko e ʻuluakí, ka ʻe fakatatau ia ki he fono ʻo e fekau fakakakano; he kuó u fuakava ʻi heʻeku ʻitá, ʻe ʻikai te nau hū ki hoku ʻafioʻangá, ki hoku mālōlōʻangá, ʻi he ngaahi ʻaho ʻo ʻenau fefonongaʻaki holó. Ko ia ke ke fai ʻo hangē ko ʻeku fekau kiate koé, peá ke teu ki he ʻapongipongí, peá ke ʻalu hake ʻi he pongipongí ki he moʻunga Sainaí, pea fakahā koe kiate au ʻi he tumutumu ʻo e moʻungá.
Ko Sihová ko e huafa ia ʻe taha naʻe ui ʻaki ʻe he kakai ʻo e Fuakava Motuʻá ʻa e ʻEiki ko Sīsū Kalaisí.
14 ʻE ʻikai te ke hū ki ha ʻotua kehe, he ko e ʻEiki ko hono huafá ko Sihová, ko ha ʻOtua fuaʻa ia.