LSS, ʻEkesōtosi 4:21. Fakafehoanaki mo e ʻEkesōtosi 4:21; 7:3, 13; 9:12; 10:1, 20, 27; 11:10; 14:4, 8, 17; Teutalōnome 2:30
ʻOku ʻikai fakatupu ʻe he ʻEikí ʻa e fefeka ʻa e loto ʻo Feló. Vakai foki ki he LSS, ʻEkesōtosi 7:3, 13; 9:12; 10:1, 20, 27; 11:10; 14:4, 8, 17; pea kapau ʻe liliu totonu ʻa e ngaahi potufolofola taki taha ko ʻení, ʻe mahino ai naʻe fakafefeka pē ʻe Felo ia hono loto ʻoʻoná.
21 Pea naʻe folofola ʻa e ʻEikí kia Mōsese, ʻO ka ke ka toe ʻalu atu ke foki ki ʻIsipite, manatu ke ke fai ʻa e ngaahi maná ni kotoa pē ʻi he ʻao ʻo Feló, ʻa ia kuó u tuku ki ho nimá, pea te u fakatuʻumālieʻi koe; ka ʻe fakafefeka ʻe Felo hono lotó, pea ʻe ʻikai te ne tukuange ʻa e kakaí ke nau ʻalu.
LSS, ʻEkesōtosi 4:24–27. Fakafehoanaki mo e ʻEkesōtosi 4:24–27
ʻI hono fakamanamanaʻi ʻe he ʻEikí ke tāmateʻi ʻa Mōsese he ʻikai kamu hono fohá, ʻoku fakahaofi ʻene moʻuí ʻe Sīpola ʻaki ʻene fakahoko e ouaú. ʻOku vete ʻe Mōsese ʻene angahalá.
24 Pea naʻe hoko ʻo pehē, naʻe hā mai ʻa e ʻEikí kiate ia ʻi heʻene kei ʻi he halá, ʻi he veʻe fale talifonongá. Naʻe houhau ʻa e ʻEikí ʻia Mōsese, pea naʻe ʻamanaki ke hilifaki hono nimá kiate ia, ke tāmateʻi ia; he kuo ʻikai ke ne kamu hono fohá.
25 Pea naʻe toʻo ʻe Sīpola ʻa e maka māsila pea kamu hono fohá, pea lī ʻa e maká ʻi hono veʻe vaʻé, peá ne pehē, Ko e moʻoni ko e ʻunoho pani toto koe kiate au.
26 Pea naʻe fakahaofi ʻe he ʻEikí ʻa Mōsese pea tuku ia ke ne ʻalu, koeʻuhí he kuo kamu e tamasiʻí ʻe Sīpola, ko hono uaifí. Pea naʻá ne pehē, ko ha ʻunoho pani toto koe. Pea naʻe mā ʻa Mōsese, pea fufuuʻi hono fofongá mei he ʻEikí peá ne pehē, kuó u fai angahala ʻi he ʻao ʻo e ʻEikí.
27 Pea folofola ʻa e ʻEikí kia ʻĒlone, ʻAlu atu ki he toafá ke fakafetaulaki kia Mōsese, pea naʻá ne ʻalu atu ia ʻo fakafetaulaki kiate ia, ʻi he moʻunga ʻo e ʻOtuá; ʻi he moʻunga ne hā ai e ʻOtuá kiate iá; pea ʻuma ʻa ʻĒlone kiate ia.