25 Im Melkizedek eaar kotak ainikien im kōjeraam̧m̧an Ebream.

26 Kiiō Melkizedek eaar juon em̧m̧aan in tōmak, eo eaar kōm̧m̧an jim̧we; im ke eaar juon ajri eaar mijak Anij, im kiili lo̧n̄iin kidu ļaioon ko, im kune kajoor an kijeek.

27 Im āindein, ālikin eaar bōk maron̄ jān Anij, kar kapit e juon pris eutiej ālikin laajrak eo an bujen eo me Anij eaar kōm̧m̧ane ippān Inok,

28 Im ekar ilo̧kan laajrak eo an eo Nejin Anij; laajrak eo eaar itok, jab jān armej, im jab jān ankilaan armej; im jab jān jemān ak jinen; im jab jān jinoin raan ko im jab jān jem̧ļo̧k in iiō ko; a jān Anij;

29 Im kar bōkļo̧k e n̄an armej jān kūr eo an Ainikien make, ekkar n̄an Ankilaan make, n̄an lōn̄in wōt eo eaar tōmak ilo Etan.

30 Bwe Anij kōnke eaar kallim̧ur n̄an Inok im n̄an ineen kōn juon kanejnej jān E make; bwe aolep eo ej ekkapit ilo̧kan laajrak in im kūr in en wōr an kajoor, jān tōmak, n̄an rupi toļ ko, n̄an ajeji lom̧aļo ko, n̄an karoji dān ko, n̄an ukōte er jān to̧o̧rļo̧k ko aer;

31 N̄an anjo̧ ioon jarin tariņae ko an laļ ko, n̄an ajeje laļ, n̄an rupe jar otemjeļo̧k, n̄an jutak ilo im̧aan mejān Anij; n̄an kōm̧m̧an men otemjeļo̧k ekkar n̄an Ankilaan, ekkar n̄an naan in jiron̄ eo An, jujuri ilaļ irooj ro im kajoor ko; im men in jān ankilaan eo Nejin Anij eo me E kar m̧okta jān pedped ko an laļ.

32 Im armej ro kōn an wōr tōmak in ippāer, ro rekar wanlōn̄tak n̄an laajrak in an Anij, rekar jab nemak mej im kar bōklōn̄ļo̧k er ilo lan̄.

33 Im kiiō, Melkizedek eaar juon pris jān laajrak in; kōn menin eaar bōk aenōm̧m̧an ilo Selem, im kar ņa etan Irooj in aenōm̧m̧an.

34 Im armej ro an rekar kōm̧m̧an jim̧we, im kar bōk lan̄, im kappukot jikin kwelo̧k in Inok eo me Anij eaar bōke m̧oktaļo̧k, im kōjenolo̧k e jān laļ, im em̧ōj dāpiji n̄an raan ko āliktata, ak jem̧ļo̧kin laļ;

35 Im Eaar ba, im kar kallim̧ur kōn juon kanejnej, bwe lan̄ ko im laļ renaaj kobatok ippān doon; im naaj mālejjon̄e m̧aan ro nejin Anij āinwōt n̄e kar kōn kijeek.

36 Im Melkizedek in, ālikin an āindein kar kajutak wānōk, kar ņa etan Kiin̄ in lan̄ jān armej ro an, ak, ilo bar jet naan, Kiin̄ in aenōm̧m̧an eo.

37 Im eaar kotak ainikien, im eaar kōjeraam̧m̧an Ebram, kōnke eaar pris eutiej, im rikōjparok im̧ōn ko̧koņ eo an Anij;

38 E eo Anij eaar jitōn̄e n̄an bōk juon m̧ōttan jon̄oul ko kōn ro rejeram̧ōl.

39 Kōn menin, Ebram eaar kōļļā n̄an e juon m̧ōttan jon̄oul ko jān aolep men ekar wōr ippān, jān aolep m̧weiie ko me kar ippān, ko im Anij eaar liļo̧k n̄an e eļapļo̧k jān jon̄an eo me eaar aikuji.

40 Im ālikin men kein, Anij ar kōjeraam̧m̧an Ebram, im kar leļo̧k n̄an e m̧weiie ko, im utiej, im bwidej ko bwe ren an indeeo; ekkar n̄an bujen eo me Eaar kōm̧m̧ane, im ekkar n̄an kōjeraam̧m̧an eo im kake Melkizedek eaar kōjeraam̧m̧an e.