JS—Ukok, Jenesis 9:4–6. Keidi Jenesis 8:20–22
Ālkin Ibwijleplep eo, Noa ej kajjitōk ippān Irooj n̄an jab bar kaliaik laļ.
4 Im Noa ar kalek juōn lokatok n̄an Irooj, im bōk jān kidu auwia otemjeļo̧k, im jān bao in mejatoto otemjeļo̧k, im katok katok kijeek ko ion lokatok eo; im kar leļo̧k kam̧oolol n̄an Irooj, im kar lan̄lōn̄ ilo buruōn.
5 Im Irooj ar konono n̄an Noa, im Eaar kōjeram̧m̧an e. Im Noa ar āt juon nām etōn̄al, im eaar ba ilo buruōn;
6 I naaj kūr ion etan Irooj, bwe En jab bar kaliaik bwidej ļo̧k wōt kōn armej, bwe kolmānļo̧kijen ko an buruōn armej rettoon jān ke ear jodikdik, im bwe E en jab bar den̄ļo̧kwe ļo̧k wōt men otem̧jeļo̧k emour, āinwōt Eaar kōm̧m̧ane, ke e kar ja wōr wōt laļ;
JS—Ukok, Jenesis 9:10–15. Keidi Jenesis 9:4–9
Armej ej eddo kōn kōtoorļo̧k bōtōktōk in mennin mour im armej. Anij ej kajutak ippān Noa im ļōmaro nejin ejja bujen eo wōt E kar kōm̧m̧ane ippān Inōk.
10 A, bōtōktōkin aolep kanniōk me Iaar lewōj n̄an kom̧ n̄an m̧ōn̄ā, naaj kōto̧o̧reļo̧k ioon bwidej, eo ej bōk mour eo an, im bōtōktōk eo kom̧in jab kan̄e.
11 Im em̧ool, bōtōktōk en jab to̧o̧rļo̧k, n̄an wōt m̧ōn̄ā, n̄an lo̧mo̧o̧ren mour ko ami; im bōtōktōkin mennin mour otemjeļo̧k Inaaj aikuji jān pā ko peimi.
12 Im jabdewōt eo ej kōto̧o̧rļo̧k bōtōktōkin armej, jān armej naaj kōto̧o̧rļo̧k bōtōktōkin; bwe armej en jab kōto̧o̧rļo̧k bōtōktōkin armej.
13 Bwe juon kien Ij lewōj, bwe aolep jein im jatin armej enaaj kōjparok mour eo an armej, bwe ilo nemāmeō make Iaar kōm̧anm̧an armej.
14 Im juon kien Ij lewōj n̄an kom̧, Kom̧in timoon im wōrļo̧k; kwaļo̧k ekanooj ļap ioon laļ, im wōrļo̧k ie.
15 Im Anij ar kōnono n̄an Noa, im n̄an ļōm̧aro nejin ippān, im ba, Im N̄a, lo, Inaaj kajutak bujen eo Aō ippemi, eo me Iaar kōm̧m̧ane n̄an jemām̧i Inok, kōn ineemi ālikimi.
JS—Ukok, Jenesis 9:21–25. Keidi Jenesis 9:16–17
Anij ej likit iia eo ilo lan̄ āinwōt juon kakememej kōn bujen eo An ippān Inōk im ippān Noa. Ilo raan ko āliktata jarlepiju eo eļap an Kabun̄ eo an M̧aanje eo enaaj koba ippān ro rewanōk ioon laļ.
21 Im iia eo enaaj pād ilo kōdo̧ eo; im Inaaj reilo̧k n̄an e, bwe In maron̄ keememej bujen eo ejjeļo̧k jem̧ļo̧kin, eo Iaar kōm̧m̧ane n̄an jemām̧i Inok; bwe, n̄e armej raņ ren kōjparok aolep kien ko Aō, Zaion en bar itok ioon laļ, jikin kwelo̧k in Inok eo me Iaar bōklōn̄tak n̄an Ippa.
22 Im en̄in ej bujen eo ejjeļo̧k jem̧ļo̧kin Aō, bwe n̄e ineem enaaj atbo̧kwōje m̧ool eo, im reilōn̄tak, innām Zaion enaaj reilaļļo̧k, im aolep lan̄ ko renaaj m̧akūtkūt kōn m̧ōņōņō, im laļ enaaj wūdiddid kōn lan̄lōn̄;
23 Im jarlepju eo eļap an kabun̄ eo an M̧aanje eo enaaj wanlaļtak jān lan̄, im bōk laļ, im naaj wōr jikin m̧ae jem̧ļo̧k eo ej itok. Im en̄in ej bujen ejjeļo̧k jem̧ļo̧kin Aō, eo Iaar kōm̧m̧ane ippān jemām̧i Inok.
24 Im iia eo enaaj pād ilo kōdo̧ eo, im inaaj kajutak bujen eo Aō n̄an kwe, eo me Ikar kōm̧m̧ane ikōtaaō im kwe, n̄an mennin mour in kanniōk otemjeļo̧k ko renaaj pād ioon laļ.
25 Im Anij eaar ba n̄an Noa, En̄in ej kakōļļeen mejek eo an bujen eo me Iaar kajutake ikōtaaō im kwe; n̄an kanniōk otemjeļo̧k ko renaaj pād ioon laļ.