5 Im kiiō, kōn ļaddik ro ruo nejūm̧, Ipreim im Menassa, ro rekar ļotak n̄an eok ilo āneen Ijipt, m̧okta jān aō kar itok n̄an eok ilo Ijipt; lo, erro rej Aō, im Anij eo an ro jema enaaj kōjeraam̧m̧an er, em̧ool āinwōt Ruben im Simeon re naaj jeraam̧m̧an, bwe er rej Aō; kōn menin er naaj ņa etaer ilo̧kan Eta. (Kōn menin kar ņa etaer Israel).

6 Im ro kwo naaj keotake er ālikier, renaaj nejūm̧, im naaj ņa etaer ilo̧kan āt eo etan ro jeir im jatier ilo jolōt eo aer, ilo bwij ko; kōn menin kar ņa etaer bwij ko an Menassa im an Ipreim.

7 Im Jekab eaar ba n̄an Josep, Ke Anij eo an ro jema eaar waļo̧kļo̧k n̄an eō ilo Lōz, ilo āneen Kenean; Eaar kallim̧ur n̄an eō, bwe Enaaj kar letok n̄an eō, im n̄an ineō, āneo n̄an juon jikū n̄an indeeo.

8 Kōn menin, O nejū m̧aan, Eaar kōjeraam̧m̧an eō ilo karūttoļo̧k eok bwe kwōn juon karejera, ilo lo̧mo̧o̧ren m̧weo im̧ō jān mej;

9 Ilo kōtļo̧k armej ro aō, ro jeiūm̧ im jatūm, jān n̄ūta eo me ekar kanooj kōmetak ilo āneo; kōn menin Anij eo an ro jemam̧ renaaj kōjeraam̧m̧an eok, im leen lo̧jiōm̧, bwe renaaj jeraam̧m̧an ilōn̄in ro jeiūm̧ im jatūm, im ilōn̄in m̧weo im̧ōn jemam̧;

10 Bwe kwaar anjo̧, im m̧weo im̧ōn jōmam̧ eaar badikdik n̄an eok, em̧ool āinwōt ke kar kwaļo̧k n̄an eok, m̧okta jān kar wiakake eok ilo Ijipt jān pā ko pein ļōm̧aro jeiūm̧; kōn menin ļōm̧aro jeiūm̧ renaaj badikdik n̄an eok, jān epepen n̄an epepen, n̄an leen lo̧jiōm̧ indeeo;

11 Bwe kwo naaj juon meram n̄an armej ro Aō, n̄an kōtļo̧k er ilo raan ko in aer pād ilo kōm̧akoko, jān ineen kōm̧akoko; im n̄an bōktok lo̧mo̧o̧r n̄an er, n̄e rej lukkuun aolep badikdik ium̧win jero̧wiwi.