24 Im Josep eaar ba n̄an ļōm̧aro jein, I mej, im ij etal n̄an ippān ro jema; im Ij wanlaļļo̧k n̄an lōb eo aō kōn lan̄lōn̄. Anij eo an jema Jekab en pād ippemi, n̄an kōtļo̧k kom̧ jān en̄taan ilo raan ko in ami pād ilo ineen kōm̧akoko; bwe Irooj eaar lotok eō, im Iaar bōk juon kallim̧ur jān Irooj, bwe jān leen lo̧jiō, Irooj Anij enaaj kajutak juon ra ewānōk jān lo̧jiō; im n̄an kom̧, ro jema Jekab eaar ņa etaer Israel, juon rikanaan; (ej jab Messaia eo etan Shailo;) im rikanaan in enaaj kōtļo̧k armej ro Aō jān Ijipt ilo raan ko in ami pād ilo ineen kōm̧akoko.

25 Im ālikin men kein renaaj ejjeplōklōk bar juon alen; im juon ra naaj bwilo̧keļo̧k, im naaj bōkļo̧k e ilo juon laļ ettoļo̧k; mekarta naaj keememej er ilo bujen ko an Irooj, n̄e Messaia eo ej itok; bwe naaj kaalikkar E n̄an er ilo raan ko āliktata, ilo Jetōb eo an kajoor; im naaj bōktok er jān marok n̄an meram; jān marok eņojak, im jān ineen kōm̧akoko n̄an anemkwōj.

26 Juon rilolo Irooj aō Anij enaaj kotak e, eo enaaj juon rilolo eo ejenolo̧k jān leen lo̧jiō.

27 Āindein Irooj Anij an ro jema ej ba n̄an eō, Juon rilolo ejenolo̧k I naaj kotake jān leen lo̧jiō, im enaaj kanooj utiej ilubwiljin ro leen lo̧jiōm̧; im n̄an e I naaj leļo̧k kien bwe en naaj kōm̧m̧ane juon jerbal n̄an ro leen lo̧jiōm̧, ro jein im jatin.

28 Im e enaaj bōktok er n̄an jeļāļo̧kjeņ eo kōn bujen ko me Iaar kōm̧m̧ani ippān ro jemam̧; im e enaaj kōm̧m̧an jabdewōt jerbal eo I naaj jiron̄ e.

29 Im I naaj kōm̧m̧an bwe en ļap ilo Meja, bwe e enaaj kōm̧m̧ane jerbal eo Aō; im e enaaj ļap āinwōt e im Iaar ba N̄a inaaj kotake n̄an kwe, n̄an kōtļo̧k armej ro Aō, O m̧weo im̧ōn Israel, jān āneen Ijipt; bwe juon rilolo I naaj kotake n̄an kōtļo̧k armej ro Aō jān āneen Ijipt; im e naaj etan Moses. Im jān āt in e enaaj jeļā bwe ej jān m̧weo im̧ōm; bwe naaj kōkaajririk e jān kōrā eo nejin Kiin̄ eo, im naaj kūr e nejin lio ļaddik.

30 Im bar juon alen, juon rilolo Inaaj kotake jān leen lo̧jiōm̧, im n̄an e Inaaj leļo̧k kajoor n̄an bōktok naan eo Aō n̄an ineen lo̧jiōm̧; im jab bōktok naan eo Aō wōt, Irooj ej ba, a n̄an karreel er n̄an Aō innaan, eo enaaj kar dedeļo̧k an ilo̧k ilubwiljier ilo raan ko āliktata.

31 Kōn menin ro leen lo̧jiōm̧ renaaj jeje, im leen lo̧jeen Juda renaaj jeje; im men eo me naaj jeje in ro leen lo̧jiōm̧, im barāinwōt men eo me naaj jeje in ro leen lo̧jeen Juda, naaj eddek ippān doon n̄an kapok katak ko reriab, im kōbabuikļo̧k iakwāālel ko, im kajutak aenōm̧m̧an ilubwiljin leen lo̧jiōm̧, im bōktok er n̄an juon jeļāļo̧kjeņ kōn ro jemāer ilo raan ko āliktata; im barāinwōt n̄an jeļā eo kōn bujen ko Aō, Irooj ej ba.

32 Im jān m̧ōjņo̧ naaj kōkajoor e, ilo raan eo n̄e jerbal eo Aō enaaj ilo̧k ilubwiljin aolep armej ro Aō, eo enaaj kōjepļaaktok er, ro rej jān m̧weo im̧ōn Israel, ilo raan ko āliktata.

33 Im rilolo en Inaaj kōjeraam̧m̧an e, im ro rej kappukot n̄an ko̧kkure e renaaj pok; bwe kallim̧ur in Ij lewōj n̄an eok; bwe Inaaj keememej eok jān epepen n̄an epepen; im etan naaj ān̄inn̄ini Josep, im enaaj etņake etan jemān; im e enaaj āinwōt kwe; bwe men eo me Irooj enaaj bōk m̧aantak kōn Pein enaaj bōktok armej ro Aō n̄an lo̧mo̧o̧r.

34 Im Irooj eaar kanejnej n̄an Josep bwe E enaaj kar kōjparoke ineen indeeo, im ba, I naaj kotake Moses, im juon jokoņ enaaj pād ilo pein, im enaaj ainitok ippān doon armej ro Aō, im enaaj tōl er āinwōt bwijin in mennin mour, im enaaj den̄ļo̧ke dān ko ilo Lom̧aļo Ekilmir kōn jokoņ eo jokoņan.

35 Im e enaaj wōr an ekajet, im naaj jeje naan eo an Irooj. Im e enaaj jamin ekkōnono elōn̄ naan ko, bwe I naaj jeje n̄an e kien eo Aō jān akkiin Peiū make. Im Inaaj kōm̧m̧an juon rikōnono n̄an e, im etan naaj ān̄inn̄ini Aron.

36 Im enaaj kōm̧m̧an n̄an kwe ilo raan ko āliktata barāinwōt, em̧ool āinwōt Iaar kanejnej. Kōn menin, Josep eaar ba n̄an ro jein im jatin, Anij enaaj lukkuun lowaj kom̧, im bōktok kom̧ jān āniin, n̄an āneo eo me Eaar kanejnej kake n̄an Ebream, im n̄an Aisak, im n̄an Jekab.

37 Im Josep eaar kapen elōn̄ bar men ko jet n̄an ro jein im jatin, im eaar kōm̧m̧an juon kanejnej jān ro nejin Israel, im ba n̄an er, Anij enaaj lukkuun lowaj kom̧, im kom̧ naaj ineek di ko diiū jān ijin.

38 Āindein Josep ar mej ke eaar jibukwi im jon̄oul iiō dettan; im raar embalm e, im raar likūt e ilo juon nien rimej ilo Ijipt; im rekar dāpij e jān kallib jān ro nejin Israel, bwe ren maron̄ kotak e im ilo̧k im kōbabuik e ilo lōb eo ippān jemān. Im āindein raar keememej kanejnej eo me raar kanejnej n̄an e.