LSS, ʻĪsaia 29:1–8. Fakafehoanaki mo e ʻĪsaia 29:1–8
Ko e ngaahi pōpoaki ne malanga ʻaki ki muʻa ʻi Selusalema ʻe he kau palōfita ʻo e kuonga muʻá, ʻe malanga ʻaki he ngaahi ʻaho fakaʻosí mei he Tohi ʻa Molomoná, ʻa ia ʻe haʻu “mei he kelekelé.”
1 Malaʻia ki ʻAliela, ki ʻAliela, ko e kolo naʻe nofo ai ʻa Tēvitá! tānaki mei he taʻu ki he taʻu, tuku ke nau tāmateʻi ʻa e ngaahi feilaulaú.
2 Ka te u fakamamahiʻi ʻa ʻAliela, pea ʻe ʻi ai e ongosia mo e mamahi; he kuo folofola mai ʻa e ʻEikí kiate au, ʻE hoko ia ki ʻAliela;
3 Pea ko au ko e ʻEikí te u ʻākilotoa takatakaiʻi ia, pea ʻākoloʻi ʻaki ia ha moʻunga, pea te u langa ʻa e ngaahi kolotau kiate ia.
4 Pea ʻe ʻohifo ia ki lalo, pea te ne lea mai mei he kelekelé, pea ʻe māʻulalo ʻene leá mei he efú; pea ʻe tatau hono leʻó mo ha taha ʻoku ʻiate ia ha laumālie ʻuli, mei he kelekelé, pea ʻe fafana hono leʻó mei he efú.
5 Pea ko e tokolahi ʻo hono kau mulí te nau hangē ko e efu momo iiki, pea mo e tokolahi ʻo e kakai fakamanavaheé te nau hangē ko e kafukafu ʻoku mole atu; ʻio, ʻe hoko fakafokifā ia ʻi he kemo pē taha.
6 He ʻe ʻaʻahi ʻa e ʻEiki ʻo e ngaahi kau taú kiate kinautolu ʻaki ʻa e mana, pea mo e mofuike, mo e longoaʻa lahi, ʻaki ʻa e matangi mo e afā, pea mo e ulo ʻo e afi fakaʻauha.
7 Pea ko e tokolahi ʻo e ngaahi puleʻanga kotoa pē ʻoku tauʻi ʻa ʻAlielá, ʻio ko kinautolu kotoa pē ʻoku tauʻi ia mo ʻene mahafu taú, ʻa ia ʻoku fakamamahiʻi iá, te nau hangē ko ha misi, ʻo ha meʻa-hā-mai ʻi he poó.
8 ʻIo, pea ʻe hoko kiate kinautolu ʻo hangē ko ha tangata ʻoku misi, pea vakai, ʻokú ne kai, ka ʻo ka ʻā ia ʻoku fiekaia ʻa hono laumālié; pe hangē ko ha tangata fieinua ʻokú ne misi, pea vakai, ʻokú ne inu ka ʻokú ne ʻā ia, pea vakai, ʻokú ne pongia, pea ʻoku holi pē hono laumālié. ʻIo, ʻe pehē pē ʻa e tokolahi ʻo e ngaahi puleʻanga kotoa pē ʻoku tauʻi ʻa e moʻunga ʻo Saioné.