9 Mbom nyia ɔpa me wɔ nyimpa enyim no, wɔbɛpa no wɔ Nyankopɔn abɔfoe enyim.

10 Afei n’esuafo no nyim dɛ ɔkãa iyi, osiandɛ nna wɔakã nsɛmbɔn etsia no wɔ nyimpa enyim, osiandɛ nna wosuro dɛ wɔbɛgye no ho dase wɔ nyimpa enyim.

11 Na woyii hɔn ho atsɛn, see dɛ, Onyim hɛn akoma mu, na ɔkasa dze bu hɛn fɔ, na wɔnnkɛfa akyɛ hɛn. Mbom obuaa hɔn, na ɔsee hɔn dɛ,

12 Obiara a ɔbɛkã asɛm etsia nyimpa Ba no, na onu no ho no, wɔdze bɛkyɛ no; mbom nyia ɔkã ebususɛm tsia Sunsum Krɔnkrɔn no, wɔnnkɛfa akyɛ no.

41 Na, hwɛ, ɔreba adzesaa dasu a odzi kan no, na ɔbɛba so dasu a otsia ebien no na bio so ɔbɛba dasu a otsĩa ebiasa no.

42 Na nokwar mese hom dɛ, Ɔaba dadaw dɛ mbrɛ wɔakyerɛw wɔ no ho no; na bio sɛ ɔba dasu a otsĩa ebien, anaa ɔba dasu a otsĩa ebiasa no a, nhyira aka nkowaa a sɛ hɔn wura ba a, obohu no dɛ wɔroweɔn;

43 Na dɛm nkowaa no hɔn Wura dze abɔdo bɔbɔ n’asen, na ɔama wɔatsena ase edzidzi, na nankasa ɔaba na ɔasom hɔn.

44 Na afei, nokwar mekã iyinom nyinara kyerɛ hom, ama hom eehu iyi, dɛ Ewuradze ne mbae no bɛyɛ dɛ anago owifo.

45 Na ɔtse dɛ obi a ɔyɛ ofiwura a, sɛ ɔannweɔn n’akoradze a, owifo no ba wɔ dɔn no a n’enyi nnda, na ɔbɛfa n’akoradze no, na ɔkyekyɛ ma ne mfɛfo.

46 Na wɔsee hɔnho dɛ, sɛ ofiwura no nyim dɔn a owifo no bɛba a, nkyɛ ɔbɔweɔn, na ɔnnkɛma kwan ma oeebu dan no aba mu ma ɔannyew n’akoradze.

47 Na ɔsee hɔn dɛ, Nokwar mese hom dɛ, hom so nyɛ krado; na dɔn a hom enyi nnda kwan no na nyimpa Ba no bɛba.

48 Na Peter see no dɛ, Ewuradze hɛn na ibu hɛn bɛ yi, anaa ɔkɔ obiara so hɔ?

49 Na Ewuradze see dɛ, mekasa kyerɛ hɔn a Ewuradze bɛyɛ hɔn ne fifo ahwɛdofo, ama wɔama ne mba hɔn edziban kyɛpɛn wɔ mber pa mu.

50 Na wɔsee dɛ, Woana mbɔ nye akowaa nokwafo nye nyansafo no?

51 Na Ewuradze see hɔn dɛ, ɔno nye akowaa a ɔweɔn, na ɔma n’edziban kyɛpɛn wɔ ne mber pa mu.

52 Nhyira aka dɛm akowaa no a no Wura ba a, obohu no dɛ ɔreyɛ dɛm.

53 Nokwar mese hom dɛ, ɔbɛyɛ no ɔhwɛdofo wɔ n’adze nyina do.

54 Mbom akowaa bɔn nye nyia wobohu no dɛ ɔronnweɔn no. Na sɛ dɛm akowaa yi woennhu no dɛ ɔroweɔn a, na ɔbɛkã no wɔ n’akoma mu, Mo Wura nnyae mmbae, na ɔbɛhyɛ ase abobɔ nkowaa no, nye mfonabaa no, na oedzidzi, na ɔanom, na ɔabow nsã.

55 Akowaa no Wura bɛba da a n’enyi nnda no kwan, nye dɔn a onnyim, na obotwa no egu ma ɔaakɔdɔm ekyingyefo.

56 Na akowaa a onyim no Wura ne pɛ, na oennsiesie no ho amma no Wura ne mbae no, anaa ɔannyɛ dza no Wura rohwehwɛ no, wɔbɔhwe no mbaa pii.

57 Mbom onyia a onnyim no Wura ne pɛ, na ɔyɛ dza ɔfata hwe no, wɔbɔhwe no kakraabi. Na obiara a wɔdze adze pii ama no no, wɔbɔhwehwɛ pii efi ne nkyɛn. Na nyia no Wura dze pii ahyɛ ne nsa no, dodowara bebisa no dza ɔbor do.