16 Na wɔsee no dɛ, Yɛwɔ mbra no na nkɔnhyɛfo no; mbom dɛm nyimpa yi dze yɛrenngye no nnto mu dɛ ɔyɛ hɛn hwɛdofo; na ɔyɛ no ho dɛ ɔyɛ atsɛmbuafo wɔ hɛn do.

17 Na Jesus see hɔn dɛ, Mbra no nye nkɔnhyɛfo no dzi mo ho dase; nyew, nkɔnhyɛfo nyinara a wɔakyerɛw bɛpem John mpo do, ahyɛ nkɔm wɔ nda a yɛwɔ mu yinom ho.

18 Fitsi dɛm aber no do, Nyankopɔn ahenman ho asɛmpa no wɔkã, na obiara a ɔhwehwɛ nokwar no reper kɔ mu.

19 Na ɔyɛ mberɛw dɛ ɔsor nye asaase botwa mu kyɛn dɛ mbrɛ mbra no ne nsensanee kor bɛyɛ kwa.

20 Na dɛn ntsi na hom kyerɛkyerɛ mbra no, na dza wɔakyerɛw no hom pa no ekyir yi; na wobu nyia a Egya no asoma no dɛ ɔmbɛhyɛ mbra no mã, ama woetum wɔapon dodowara no fɔ yi?

21 O nkwasea! na hom akã no wɔ hom akoma mu dɛ, Nyame nnyi hɔ. Na hom kontom kwan a ɔtsen no; na hom ama ɔsor ahenman no ahaw wɔ basabasayɛ ho; na hom tseetsee hɔn a wɔdwe; na wɔ hom basabasayɛ mu no hom hwehwɛ dɛ wɔbɛsɛɛ ahenman no; hom dze nhyɛ kyer ahenman no mu mba no. Hom ndue, hom awartõfo!

22 Na wɔyaaw no bio, wɔ ebufuw mu osian dɛ ɔsee hɔn dɛ, wɔyɛ awartõfo.

23 Mbom ɔsɔɔw do, see dɛ, Obiara a ɔbɔkõ ne yer, na ɔawar fofor no, ɔtõ awar; na obiara a ɔbɔwar nyia no kun akõ no no, ɔtõ awar. Nokwar mese hom dɛ medze hom bɔto obirɛmpɔn no ho.