JSN, Mark 14:20–25. Fa to Mark 14:22–25 ho
Jesus dze sacrament no bɔbɔɔ adze dze yɛ No honandua na No bɔgyaa ho nkaa.
20 Na woridzidzi no, Jesus faa paanoo na ohyiraa do, na obubui, na ɔdze maa hɔn, na ɔsee dɛ, Hom ngye, na hom ndzi.
21 Hwɛ, hom nyɛ iyi nyɛ me nyimpadua ho nkaadze; na ber biara a hom bɛyɛ iyi no, hom bɛkaa dɔnhwer yi a menye hom wɔ ha yi.
22 Na ɔfaa kuraba no, na ɔdaa ase no, ɔdze maa hɔn; ma hɔn nyina noom ano.
23 Na ɔsee hɔn dɛ, Iyi yɛ mo bɔgyaa a wokyi ma dodowara, na ahyɛmu fofor a medze ma hom no ho nkaadze; na hom bɛgye mo ho dase dze akɔ wiadze nyinara mu.
24 Na ber biara a hom bɛyɛ ayɛdze yi no, hom bɛkaa dɔnhwer yi a menye hom wɔ ha yi na menye hom noom kuraba yi ano, ber a odzi ewiei wɔ mo somdwuma yi mu mpo.
25 Nokwar me se hom dɛ, Iyi ho na hom bɛgye dase; na merennye hom nnom wenyineduaba no bi bio dze ekodu da a mobɔnom no fofor wɔ Nyankopɔn ahenman no mu.
26 Na afei ɔyɛɛ hɔn yaw, na wosũi guu no do.
JSN, Mark 14:36–38. Fa to Mark 14:32–34 ho
Esuafo Duebien no mpo nnhu Jesus ne gyinabew yie dɛ Messiah no wɔ Gethsemane.
36 Na wodur beebi a wɔfrɛ hɔ Gethsemane, a ɔyɛ ture, na esuafo no hyɛɛ ase dɛ wɔrobɔ hu kɛse na wɔbɔmee, na wohwinhwinii wɔ hɔn akoma mu, dze ahobow susui dɛ ana iyi nye Messiah no.
37 Na Jesus nyim hɔn akoma mu no, see n’esuafo no dɛ, Hom ntsena ha, ber a morokɔbɔ mpaa yi.
38 Na ɔfaa Peter nye James nye John kaa no ho, na otwuuw hɔn enyim, na ɔsee hɔn dɛ, Awerɛhow kɛse ahyɛ me kra do, dze kɔ owu mpo mu, hom ntweɔn ha na hom nweɔn.