JSN, Matthew 3:4–6. Fa to Matthew 2:4–6 ho
Nkɔnhyɛfo no hyɛɛ ho nkɔm dɛ Bethlehem bɛyɛ Agyenkwa no n’awoo bea.
4 Na ohyiaa ɔman no asɔfompanyin nye kyerɛwfo nyina no, obisaa hɔn, see dɛ, Henfa nye fakor a nkɔnhyɛfo akyerɛw ho nsɛm dɛ, wɔbɔwo Christ no? Osiandɛ nna osuro kɛse, naaso nna ɔnngye nkɔnhyɛfo no nndzi.
5 Na wɔsee no dɛ, Nkɔnhyɛfo no akyerɛw no dɛ, ɔsɛ dɛ wɔwo no wɔ Bethlehem wɔ Judea, na dɛm na wɔakã.
6 Ewuradze n’asɛm baa hɛn hɔ, rese dɛ, Na ɔwo Bethlehem, a eda Judea asaase do, wo mu na wɔbɔwo ɔhembabanyin no, ɔno na ɔnnyɛ kumaba wɔ Judea ahemba no mu; na wo mu na Messiah no befi aba, ɔno a ɔbɛgye me man Israel no.
JSN, Matthew 3:24–26. Fa to Matthew 2:23 ho
Jesus nyin na Ɔtweɔn Ewuradze ansaana Ɔrehyɛ No somdwuma ase.
24 Na ɔbaa dɛ Jesus, nye no nuanom nyinii, na ɔhyɛɛ dzen, na ɔtweɔn Ewuradze mu kɛpeem dɛ no somdwuma ber no bɛba.
25 Na ɔsoom wɔ n’egya no tum ase, na ɔannkasa dɛ ma nyimpa nkaa no, anaadɛ obi botum akyerɛkyerɛ no adze, osiandɛ nna onnhia dɛ nyimpa biara bɛkyerɛkyerɛ no.
26 Na mfe pii ekyir no, no somdwuma dɔn no twee bɛnee.
JSN, Matthew 3:34–36. Fa to Matthew 3:8–9 ho
Hɔn a wɔpoow John Onumanyi no n’asɛm no wɔpoow Christ. Nyankopɔn botum nye nkorɔfo a wɔnnyɛ Israel asefo ayɛ ahyɛmudzifo.
34 Dɛn ntsi na hom nngye onyia a Nyankopɔn asoma no ne nsɛmpakã no? Sɛ hom anngye iyi wɔ hom akoma mu a, nna hom nngye me; na sɛ hom anngye me a, hom nngye nyia a ɔasoma me dɛ membɛgye no ho dase no, na hom bɔn no hom nnyi ho akatado.
35 Dɛm ntsi, hom nnu homho, na hom nsow eduaba a ɔfata nnuho;
36 Na mma hom nsusu nnkã wɔ hom mu dɛ, Yɛyɛ Abraham mba, na hɛn nko na yetum yɛwo hɛn egya Abraham asefo; na mese hom dɛ Nyankopɔn botum dɛ onyan mba fi abo yinom mu dze akã Abraham ebusua ho.
JSN, Matthew 3:38–40. Fa to Matthew 3:11–12 ho
John Onumanyi no gye dase dɛ Jesus wɔ tum dɛ ɔdze Sunsum Krɔnkrɔn no na ogya numa.
38 Emi dze munuma hom nsu mu, hom nnuhu ekyir no, na nyia megye noho dase bɛba no, nyia noho yɛ dzen kyɛn me no, no nsokota mpo mennsɛ dɛ mikitsa, (anaa murunntum nngyina n’ananmu no,) dɛ mbrɛ mekaa no, emi dze munuma hom ana ɔaba, ama ber a ɔbɛba no oenuma hom wɔ Sunsum Krɔnkrɔn mu na ogya mu.
39 Na ɔno na mebɛgye noho dase no, ɔno na no nhuwdo-apaawa bekitsa ne nsa mu, na ɔbɛpra ne famu hɔ kofee, na ɔaboaboa n’ewifua ano ekogu san do; mbom nankasa ne mber ne mãhyɛ mu no na ɔdze gya a onndum bɛhyew ntsɛw no.
40 Dɛm na John bae, rekã asɛmpa no na orunuma wɔ Jordan esutsen mu; regye dase dɛ, nyia odzi n’ekyir reba no wɔ tum a onuma wɔ Sunsum Krɔnkrɔn mu na ogya mu.
JSN, Matthew 3:43–46. Fa to Matthew 3:15–17 ho
John nam nsumuhyɛ do numa Jesus, ohu Sunsum Krɔnkrɔn no dɛ orisian dɛ ebubur, na ɔtse Egya No ne ndze.
43 Na Jesus, orubua no, ɔsee no dɛ, Ma me ho kwan na numa me, dɛm ara na ɔsɛ hɛn dɛ yɛyɛ dze hyɛ tseneneeyɛ mã. Nna ɔmaa no kwan.
44 Na John sianee kegyinaa nsu no mu na onumaa no.
45 Na Jesus wowiee no numa no ofii nsu no mu ntsɛmara, na John hunii, na hwɛ, ɔsorsor buei maa no, na ohun Nyankopɔn no Sunsum risian tse dɛ ebubur, na ɔbaa Jesus do.
46 Na hwɛ, ɔtsee dɛ ndze bi fi sor, rese dɛ, Oyi nye mo Dɔba a ɔsɔ m’enyi, tsie no.