JSN, Matthew 7:1–2. Fa to Matthew 7:1–2 ho
Mma hom mmbu atsɛnkyew.
1 Afei iyi nye nsɛm a Jesus dze kyerɛkyerɛɛ n’esuafo dɛ wɔnkã nkyerɛ nkorɔfo no.
2 Mma mmbu atsɛnkyew, amma woemmbu hom atsɛn; mbom hom mbu atsɛn tsenenee.
JSN, Matthew 7:4–8. Fa to Matthew 7:3–5 ho
Jesus kyerɛkyerɛ N’esuafo no dɛ wɔnye akyerɛwfo, Phariseefo, asɔfo na Levifo no nsi osian hɔn enyidosomkyerɛ no ntsi.
4 Na bio, hom nse hɔn dɛ, Ɔyɛ dɛn ntsi na hom hwɛ duaba a ɔwɔ wo nua enyiwa mu, na enndwen mpuna a ɔwɔ wankasa w’enyiwa mu?
5 Anaaso ebɛyɛ dɛn ase wo nua dɛ, Ma minyi duaba mfi w’enyiwa mu; na nntum nnhu mpuna wɔ wankasa w’enyiwa mu?
6 Na Jesus see n’esuafo no dɛ, Ana hom hwɛ akyerɛwfo, na Phariseefo, na asɔfo, na Levifo no? Wɔkyerɛkyerɛ wɔ hɔn nhyiamudan mu, mbom wonnsie mbra no, anaa mbransɛm no; na hɔn nyina efi kwantsen no do, na wɔhyɛ bɔn ase.
7 Kɔ na se hɔn dɛ, dɛn ntsi na hom kyerɛkyerɛ adasa mbra na mbransɛm no, ber a hom ankasa hom yɛ ɔsɛɛ-mba yi?
8 Se hɔn dɛ, Hom, enyidosomkyerɛfo, dzi kan yi mpuna fi wankasa w’enyiwa mu; nna ibohu yie eyi duaba no efi wo nua enyiwa mu.
JSN, Matthew 7:9–11. Fa to Matthew 7:6 ho
Jesus kyerɛkyerɛ N’esuafo no dɛ wɔnkã nnuhu ho nsɛm na mma wɔnnye wiadzefo nnkyɛ esumasɛm a ɔwɔ ahenman no mu.
9 Hom nkɔ wiadze nyina, nkɛse hɔn dɛ, Hom nnu hom ho, osiandɛ ɔsor ahenman no abɛn hom.
10 Na esumasɛm a ɔwɔ ahenman mu no hom mfa nsie homankasa hom mu; na ɔmmfata dɛ wɔdze dza no ho tsew no ma nkraman; eso mma hom nntow hom bota a ɔsom bo nngu mpreko enyim, amma wɔammfa hɔn anan enntsiatsia do.
11 Osiandɛ wiadze runntum nngye dza hom, homankasa nntum nnsoa, dɛm ntsi mma hom mmfa hom bota a ɔsom bo mma hɔn, amma wɔaannsan bio na wɔammbɛtsetsew hom mu.
JSN, Matthew 7:12–17. Fa to Matthew 7:7–8 ho
Jesus kyerɛkyerɛ N’esuafo no dɛ Egya no ma hɔn nyina a wobisa no, no nyikyerɛ.
12 Se hɔn dɛ, Hom mbisa Nyankopɔn, hom mbisa, na wɔbɛma hom, hom nhwehwɛ na hom bohu; hom mbɔ mu na wobobue hom.
13 Na obiara a obisa no, onya; na nyia ɔhwehwɛ no, ohu; na nyia a ɔbɔ mu no, wobobue no.
14 Na nkyii n’esuafo no see no dɛ, Wɔbɛse hɛn dɛ, Hɛnankasa yɛyɛ atseneneefo, na yennhia nyimpa biara ma ɔakyerɛkyerɛ hɛn. Yenyim dɛ, Nyankopɔn, otsiee Moses na nkɔnhyɛfo binom; mbom hɛn dze onnketsie hɛn.
15 Na wɔbɛse dɛ, Yɛwɔ mbra no a ɔma hɛn nkwagye no, na ɔnoara dɔɔ sõ ma hɛn.
16 Nkyii Jesus buae, na ɔsee n’esuafo no dɛ, Dɛm na hom nkã nkyerɛ hɔn,
17 Hom mu nyimpa bɛn, na ɔwɔ ba, na ogyina abow ano no, na ɔbɛse dɛ, Egya, bue wo fi ma membra mu nye wo mbedzidzi, na ɔrennse dɛ, Bra mu, me ba; na dza ɔyɛ me dze no, yɛ wo dze na wo dze, yɛ medze?