1 Nao, hemia nao ol toktok we Jisas i bin tijim ol disaepol blong hem se bae oli mas talem long ol pipol.

2 Yufala i no mas jajem man long fasin we i no stret mo i no gud; be yufala i jajem man wetem ol stret mo gud jajmen.

4 Mo bakegen, bae yufala i talem long olgeta: ‘?From wanem yu yu stap luk pis doti insaed long ae blong brata blong yu, be yu yu no luk bigfala doti we i stap long ae blong yu?

5 O ?weswe? Bae yu talem long brata blong yu se: “Bae mi pulumaot doti long ae blong yu.” ?Be yu yu no save luk bigfala doti long ae blong yu?’

6 Mo Jisas i talem long ol disaepol blong hem: “Yufala i luk ol tija blong loa, mo ol Farisi, mo ol pris mo Ol Man blong Livae. Oli stap tij long haos blong prea blong olgeta, be oli no stap folem loa, o ol komanmen; be evriwan oli kamaot long rod mo oli stap mekem sin.

7 Yufala i go mo talem long olgeta se: ‘?From wanem yufala i stap tijim loa mo ol komanmen long olgeta man, be yufala nomo, yufala i pikinini blong rabis fasin?’

8 Talem long olgeta: ‘Yufala i man blong tufes; faswan, yufala i mas sakemaot bigfala doti we i stap long ae blong yufala; ale afta, yufala i save luk klia blong save karemaot doti long ae blong brata blong yufala.’

9 Yufala i go olbaot long wol, mo talemaot long evriwan: ‘Sakem sin, from kingdom blong heven i kam kolosap long yufala.’

10 Mo ol sikret blong kingdom, bambae yufala i mas kipim i stap wetem yufalawan nomo; from se hem i no stret blong givim samting we i tabu long ol dog; mo tu, no sakem ol perel blong yufala i go long ol pig, from fraet se bae oli purumbut olgeta andanit long ol leg blong olgeta.

11 From se wol i no save kasem wanem we, yufala nomo, i no save tekem; taswe, yufala i no mas sakem ol perel blong yufala i go long olgeta, nogud oli tanemraon bakegen mo smasem gud yufala.

12 Talem long olgeta: ‘Askem God; askem, mo bae God i givim long yu; lukaotem mo bambae yu faenem; noknok, mo bae oli openem doa long yu.

13 From se, evriwan we i askem, hem bae i kasem; mo hem we i lukaotem, bae i faenem; mo hem we i noknok, bae doa i open long hem.’”

14 Mo afta, ol disaepol oli talem long hem se: “Bae oli talem long mifala se, mifala, mifala i stret mo gud nomo, mo mifala i no nidim blong eni man i kam tijim mifala. God, mifala i save hem, mo mifala i harem Moses mo samfala profet; be mifala, bae hem i no harem mifala.”

15 Mo bambae oli talem se: “Mifala i gat loa blong sevem laef blong mifala, mo hemia i inaf long mifala.”

16 Nao Jisas i ansa, mo i talem long ol disaepol blong hem se: “Olsem ia nao bambae yufala i talem long olgeta:

17 ‘?Huia man ia, long medel blong yufala we i gat wan pikinini boe, mo pikinini ia i stanap aotsaed mo i talem: Papa, openem doa blong haos blong mi save kam kakae insaed wetem yu, bae yu no talem: Kam insaed boe blong mi; from wanem we i blong mi i blong yu, mo wanem we i blong yu i blong mi?’”