1 Long taem ia, bae yu kam, O Lod; mo bae mi putum tras blong mi long yu, Lod. Bae yu talem long evri pipol, from sora blong mi i harem voes blong yu; nao bae yu talem long evri sol: “Yufala i go antap long hil blong mi;” mo olgeta we oli stret mo gud bae oli flae i go antap long hil olsem pijin we i ronwe long trap blong man blong kasem pijin.

2 From ol man nogud oli taetem string blong bonara blong olgeta; luk, oli putum rere aro finis long bonara, oli haed, blong oli save sutum ol man we oli stret long hat blong olgeta, blong prapa spolem gud ples we oli stanap strong long hem.

3 Be bae oli prapa spolem gud evriwan ol ples we ol man nogud oli stanap long hem, ?mo bae oli mekem wanem long hem?

4 From we Lod, taem bae hem i stap long tabu haos blong hem, i sidaon long jea blong God we i jea blong King antap long heven, ae blong hem bae i lukluk evri samting we ol nogud man oli stap mekem.

5 Luk, ae blong hem bae i skelem laef blong ol pikinini blong man, mo bae hem i pemaot olgeta we oli stret mo gud, mo bae hem i traem olgeta. Lod i laekem olgeta we oli stret mo gud, be ol nogud man, wetem man we i laekem faet, sol blong Lod i no laekem olgeta nating.