1 Man we i no gat hed i stap talem hemwan insaed long hat blong hem se: “I no gat man we i bin luk God. From se God i no stap soemaot hem long yumi, from hemia, i no gat God.” Luk, ol man ia, oli ol rabis man; olgeta ia oli mekem ol samting we i nogud we i nogud, mo i no gat wan long olgeta we i stap mekem samting we i stret.

2 From se Lod i stap long heven i luk i go daon long ol pikinini blong man, mo tru long voes blong hem, i bin talem long ol wokman blong hem: “Yufala i luklukgud long medel blong ol pikinini blong man, mo faenem sapos i gat eniwan we i stap andastanem God.” Mo hem i toktok i go long Lod, mo i talem: “Luk, olgeta evriwan ia oli talem se oli blong yu.”

3 Lod i ansa, i talem se: “Olgeta evriwan oli lusum rod finis; tugeta, olgeta evriwan ia oli kam doti; bae yu no save luk wan long olgeta we i stap mekem gud samting; no, i nogat wan nating.”

4 Evriwan oli gat olsem tija blong olgeta, ol man we oli stap mekem rabis fasin, mo i no gat save i stap wetem olgeta. Oli olgeta man we oli stap kakae ol pipol blong mi. Oli kakae bred mo oli no stap prea long Lod.

5 Oli stap fraet we oli fraet, from se God i stap wetem jeneresen blong ol stret mo gud man. Hem i givim advaes long olgeta we oli pua, from se ol pua oli sem long ol nogud man, mo oli stap ronwe oli stap go long Lod blong oli faenem wan sef ples.

6 Olgeta we oli no pua oli sem long advaes blong ol puaman, from se Lod i stap olsem sef ples blong olgeta.

7 O, sapos nomo heven i bin stanemap Saeon, fasin blong sevem Isrel. O Lod, ?wetaem nao bambae yu yu stanemap Saeon? Taem bae Lod i tekembak ol pipol blong hem aot long fasin blong stap slef, bambae Jekob i stap glad, Isrel bae i stap glad.