1 Im eaar waļo̧k juon kakōļļe eļap ilo lan̄, ilo jekjekin men ko ioon laļ; juon kōrā em̧ōj naballin kōn al, im allōn̄ ium̧win neen, im ioon bōran juon kūrawūn ewōr ie jon̄oulruo iju ko.

2 Im kōnke lio eaar bōro̧ro, eaar lam̧ōj, ilo kōlwan etta, im eaar metak in itōn keotak.

3 Im lio eaar kaļotake juon nejin m̧aan, eo ekar itōn peek aolep laļ ko kōn jokoņan aen; im ajri eo nejin kar weaaklōn̄ļo̧k n̄an Anij im tūroon eo An.

4 Im eaar waļo̧k bar juon kakōļļe ilo lan̄; im lo, juon tūraikōn eļap ekilmir, ewōr jiljilimjuon bōran im jon̄oul doon, im jiljilimjuon kūrawūn ko ioon bar ko bōran. Im ļokwan eaar lekake juon m̧ōttan jilu in iju ko in lan̄, im eaar julaļļo̧k er n̄an laļ. Im tūraikōn eo eaar jutak im̧aan kōrā eo eaar keotak, epojak n̄an wōran̄ļo̧k ajri eo nejin ālikin an kar ļotak.

5 Im kōrā eo eaar koļo̧k ilo āne jem̧aden, ijo ewōr jikin ie kōpooje jān Anij, bwe ren naajdik e ijo ium̧win juon to̧ujin rūbukwi im jilu alen ron̄oul iiō ko.

6 Im eaar wōr juon tariņae ilo lan̄; Maikeel im enjeļ ro an raar tariņae ņae tūraikōn eo; im tūraikōn eo im enjeļ ro an raar tariņae ņae Maikeel;

7 Im tūraikōn eo eaar jab anjo̧ ņae Maikeel, im jab ņae ajri eo, ak jab ņae kōrā eo me ekar kabun̄ eo an Anij, eo kar kōtļo̧k e jān metak ko an, im kar kaļotake aelōn̄ an ad Anij im Kraist eo An.

8 Im eaar jab wōr jikin loe ilo lan̄ n̄an tūraikōn eo eļap, eo kar joļo̧k; jedpānit eo etto kar ņa etan devil, im barāinwōt kar ņa etan Setan, eo ej m̧oņe aolepān laļ; e kar jolaļļo̧k ilo laļ; im enjeļ ro an kar joļo̧k er ippān.

9 Im iaar ron̄ juon ainikien eļļaaj ej ba ilo lan̄, Kiiō ej itok lo̧mo̧o̧r, im maron̄, im aelōn̄ an ad Anij, im kajoor in Kraist eo An;

10 Bwe rikinaakļo̧k an ro jeid im jatid em̧ōj jolaļļo̧k, eo eaar kinaakļo̧k er im̧aan ad Anij raan im bon̄.

11 Bwe rekar anjo̧ jān e jān bōtōktōkin Lamb eo, im jān naan in kam̧ool ko aer; bwe rekar jab iakwe mour ko aer make, a kar dāpij naan in kam̧ool eo em̧ool n̄an mej. Kōn menin, kom̧in lan̄lōn̄ O lan̄ ko, im kom̧ ro rej jokwe ilo er.

12 Im ālikin men kein iaar ron̄ bar juon ainikien ej ba, Wo n̄an ro rijokwe in laļ, aaet, im ro rej jokwe ioon āne ko in lo̧meto! bwe devil ej wanlaļtak ioomi, im ippān eļap libabne, kōnke ejeļā bwe e ewōr juon an iien ekadu wōt.

13 Bwe ke tūraikōn eo eaar lo bwe e rekar joļo̧k n̄an laļ in, eaar matōrtōre kōrā eo eaar keotake ajri em̧m̧aan eo.

14 Kōn menin, n̄an kōrā eo kar leļo̧k ruo pein bao igōl eļap, bwe lio en maron̄ koļo̧k ilo āne jem̧aden, ļo̧k ilo ijo jikin, ijo kar naajdik lio ie ium̧win jidik iien, im iien ko, im jimattan in iien, jān im̧aan mejān jedpānit eo.

15 Im jedpānit eo eaar ibburakeļo̧k jān lo̧n̄iin dān āinwōt juon ibwijleplep ilo̧kanļo̧k kōrā eo, bwe en kōm̧m̧an bwe lio en maron̄ kinōōreļo̧k jān ibwijleplep eo.

16 Im laļ ej jipan̄ kōrā eo, im laļ ej kōpeļļo̧k lo̧n̄iin, im wōran̄ļo̧k ibwijleplep eo me tūraikōn eo eaar ibburakeļo̧k jān lo̧n̄iin.

17 Kōn menin, tūraikōn eo eaar illu ippān kōrā eo, im kar etal n̄an tariņae ippān bwein ineen lio, ro rej kōjparok kien ko an Anij, im ewōr aer naan in kam̧ool kōn Jisōs Kraist.