¶ 1 BEA nae alu a Lehoboami ki Sikemi: he kuo omi ki Sikemi a Isileli katoa ke fakanofo ia koe tu‘i.

2 Bea nae hoko o behe, i he ene fanogo ki ai a Jeloboami koe foha o Nibati, aia nae kei nofo i Ijibite, (he ne hola ia mei he ao o Solomone koe tu‘i, bea nae nofo a Jeloboami i Ijibite;)

3 Naa nau fekau atu mo ui kiate ia. Bea nae ha‘u a Jeloboami bea moe fakataha kotoabe o Isileli, o nau lea kia Lehoboami, o behe,

4 Nae gaohi e hoo tamai e mau kavega ke fakamāfajia: ka koeni ke ke fakamaamaa ekoe e mau gaue fakamāfajia ki hoo tamai, bea mo ene kavega mamafa aia naa ne ai kiate kimautolu, bea te mau tauhi kiate koe.

5 Bea naa ne beheage kiate kinautolu, Mou alu i he aho e tolu, bea hili ia mou toe omi kiate au. Bea nae alu ae kakai.

¶ 6 Bea nae alea ae tu‘i ko Lehoboami moe kau mātua, akinautolu nae tutuu i he ao o Solomone lolotoga a ene kei moui aana, o ne behe, Koeha ho mou loto be e fefe a eku tali ki he kakai ni?

7 Bea naa nau lea kiate ia, o behe, Kabau te ke tauhi ki he kakai ni he aho ni, bea ke gaue ki ai, mo ke talia akinautolu, mo ke lea aki ae gaahi lea lelei kiate kinautolu, behe, te nau hoko ko hoo kau tamaioeiki o taegata.

8 Ka naa ne jiaki ae eginaki ae kau mātua, aia naa nau fai kiate ia, bea naa ne alea moe kau talavou aia nae tubu hake moia, bea naa nau tutuu i hono ao:

9 Bea naa ne behe kiate kinautolu, Koeha ho mou loto omoutolu koeuhi ke tau tali aki ae kakai ni, aia kuo lea mai kiate au, o behe, Fakamaamaa ae kavega aia nae ai kiate kimautolu e hoo tamai?

10 Bea nae leaage kiate ia ae kau talavou nae tubu hake moia, o behe, E behe ni hoo lea ki he kakai ni nae lea mai kiate koe, o behe, Nae fakamamafa e mau kavega e hoo tamai, ka ke fakamaamaa ia ekoe kiate kimautolu: e behe ni a hoo lea kiate kinautolu, E fuofua lahi hake a hoku louhi‘i nima jii i he kogaloto o eku tamai.

11 Bea koeni nae fakakavega aki akimoutolu e he eku tamai ae kavega mamafa, ka teu fakalahi ki hoo mou kavega: nae kiniji aki akimoutolu e he eku tamai ae gaahi mea ta, ka teu tautea akimoutolu aki ae faga sikobio.

¶ 12 Koia nae ha‘u a Jeloboami bea moe kakai kotoabe kia Lehoboami i hono tolu oe aho, o hage koia nae tala e he tu‘i, o behe, Toe ha‘u kiate au i hono tolu oe aho.

13 Bea nae tali fakamalohi ae kakai e he tu‘i, o ne jiaki ae fakakaukau ae kau mātua aia naa nau fai kiate ia;

14 Bea naa ne lea kiate kinautolu o hage koia nae tala e he kau talavou, o behe, Nae fakamamafa a hoo mou kavega e he eku tamai, ka teu fakalahi ki hoo mou kavega: nae kiniji akimoutolu e he eku tamai aki ae gaahi mea ta, ka teu tautea akimoutolu eau aki ae faga sikobio.

15 Koia nae ikai tui ae tu‘i ki he kakai; bea nae tubuga ia mei a Jihova, koeuhi ke ne fakamooni ki he ene folofola, aia nae folofola aki e Jihova ia Ahija koe tagata Sailo kia Jeloboami koe foha o Nibati.

¶ 16 Bea koia, i he mamata a Isileli katoa nae ikai tui ae tu‘i kiate kinautolu, nae beheage e he kakai ki he tu‘i, Koefe haa mau tufakaga ia Tevita? bea oku ikai ha mau tofia i he foho o Jese: E Isileli mou alu ki ho mou gaahi fale: ka ko koe Tevita, vakai ki ho fale oou. Koia nae alu ai a Isileli ki ho nau gaahi fale.

17 Ka koeuhi koe fānau a Isileli aia nae nofo i he gaahi kolo o Juta, nae bule a Lehoboami kiate kinautolu.

18 Bea nae toki fekau atu e he tu‘i ko Lehoboami a Atolami aia nae bule ki he tukuhau; bea nae lijigi ia aki ae maka e Isileli katoa, bea naa ne mate ai. Koia nae fai fakatootoo e he tu‘i ko Lehoboami ke ne heka hake ki hono jaliote, kae hola ki Jelusalema.

19 Bea behe,  talu mei ai kuo fakaaga? tuu a Isileli ki he fale o Tevita o a‘u mai ki he aho ni.

20 Bea nae hoko o behe, i he fanogo e Isileli katoa kuo toe ha‘u a Jeloboami, naa nau fekau atu mo ui mai ia ki he fakataha, bea nae fakanofo ia ke ne tu‘i ki Isileli katoa: nae ikai ha taha ke kau ki he fale o Tevita, ka koe faahiga be taha o Juta.

¶ 21 Bea i he ene hoko mai a Lehoboami ki Jelusalema, naa ne fakataha mai ae fale kotoabe o Juta, moe faahiga o Benijimani, koe kau tau e toko taha kilu moe toko valu mano, koe kau tagata nae fili, ke tau‘i ae fale o Isileli, koeuhi ke toe omi ai ae buleaga kia Lehoboami koe foha o Solomone.

22 Ka nae hoko mai ae folofola ae Otua kia Simaia koe tagata ae Otua, o behe,

23 Lea kia Lehoboami koe foha o Solomone, koe tu‘i o Juta, bea ki he fale katoa o Juta mo Benijimani, bea ki he toega oe kakai, o behe,

24 Oku behe e Jihova, E ikai te mou alu hake, be tau‘i a ho mou kaiga koe fānau a Isileli: toe foki atu ae tagata taki taha ki hono fale; he oku meiate au ae mea ni. Koia naa nau fanogo ki he folofola a Jihova, bea  naa nau liliu ke alu, o tatau moe fofofola a Jihova.

¶ 25 Hili ia nae laga hake e Jeloboami a Sikemi i he mouga ko Ifalemi, bea ne nofo i ai; bea naa ne alu atu mei ai o ne laga hake a Benieli.

26 Bea nae behe e Jeloboami i hono oto, E liliu atu eni ae buleaga ki he fale o Tevita:

27 Kabau e alu hake ae kakai ni ke fai ae feilaulau i he fale o Jihova i Jelusalema, e toki liliu atu ai ae loto oe kakai ni ki ho nau eiki, io kia Lehoboami koe tu‘i o Juta, bea te nau tamate‘i au, mo toe alu kia Lehoboami koe tu‘i o Juta.

28 Koia nae fakakaukau ai ae tu‘i, bea naa ne gaohi ae ogo uhiki bulu aki ae koula, o ne behe kiate kinautolu, Oku faigataa fau ke mou alu hake ki Jelusalema: vakai ko ho mou gaahi otua eni, E Isileli, aia nae o hake akimoutolu mei he fonua ko Ijibite.

29 Bea naa ne tuku ae taha i Beteli, bea koe taha naa ne tuku i Tani.

30 Bea nae hoko ae mea ni koe agahala; he nae alu ae kakai ke fai lotu ki he taha i Tani.

31 Bea naa ne gaohi ae fale i he gaahi botu maoluga, mo ne fili ae kau taulaeiki mei he faahiga kakai, akinautolu nae ikai oe gaahi foha o Livai.

32 Bea nae kotofa e Jeloboami ae katoaga ki hono valu oe mahina, i hono aho hogofulu ma nima oe mahina, o tatau moe katoaga nae fai i Juta, bea naa ne fai feilaulau ki he uhiki bulu naa ne gaohi: bea naa ne fakanofo i Beteli ae kau taulaeiki aia naa ne fili.

33 Koia, naa ne fai feilaulau ki he feilaulauaga aia naa ne gaohi i Beteli i hono aho hogofulu ma nima o hono valu oe mahina, ae mahina koia naa ne fakakaukau ki ai i hono loto oona; bea nae tuutuuni ae katoaga ki he fānau a Isileli: bea naa ne fai ae feilaulau i he feilaulauaga, bea tutu ai ae mea namu kakala.