¶ 1 BEA vakai, nae ha‘u ha tagata oe Otua mei Juta koe mea i he folofola a Jihova, o ne hoko atu ki Beteli bea nae tuu a Jeloboami i he vee feilaulauaga ke atu ae mea namu kakala.

2 Bea naa ne ui ki he feilaulauaga i he folofola a Jihova, o behe, E feilaulauaga, e feilaulauaga! oku behe e Jihova; Vakai e fanau‘i ha tamajii ki he fale e Tevita, ko Josaia a hono higoa; bea te ne o hake iate koe ae kau taulaeiki oe gaahi botu maoluga akinautolu oku tutu mea namu kakala iate koe, bea e tutu iate koe ae gaahi hui oe tagata.

3 Bea naa ne tuku ae fakailoga i he aho be koia, o ne behe, Ko hono fakailoga eni kuo folofola aki e Jihova; Vakai, e mahaehae ae feilaulauaga, bea e liligi atu ae efuefu aia oku i ai.

4 Bea i he ene fanogo ae tu‘i ko Jeloboami ki he lea ae tagata oe Otua, aia naa ne kalaga aki ki he feilaulauaga i Beteli, naa ne mafao atu hono nima mei he feilaulauaga, o ne behe, Buke ia. Bea ko hono nima, aia naa ne mafao atu kiate ia, nae mate ia, bea nae ikai ai te ne faa too mai ia kiate ia.

5 Nae mahaehae foki ae feilaulauaga, bea nae liligi ae efuefu mei he feilaulauaga, o fakatatau moe fakailoga aia nae tuku e he tagata oe Otua i he folofola a Jihova.

6 Bea nae beheage e he tu‘i ki he tagata oe Otua, Fakakolekole eni ki he fofoga o Jihova ko ho Otua, bea ke kole koeuhi ko au, ke toe fakamoui a hoku nima. Bea nae kole e he tagata oe Otua i he ao o Jihova, bea nae toe fakamoui ae nima oe tu‘i kiate ia, o hage ko ene teeki liliu.

7 Bea nae behe e he tu‘i ki he tagata oe Otua, Ke ta o mo au ki abi, bea ke fakamālōlō ai, bea teu foaki ha totogi kiate koe.

8 Bea nae bene e he tagata oe Otua ki he tu‘i, Kabau te ke omi kiate au hono vaeua o ho fale, ka e ikai teu alu mo koe, bea e ikai teu kai ha ma be inu ha vai i he botu ni;

9 He nae fekau‘i au e he folofola a Jihova, o behe, Oua naa kai ha ma, be inu ha vai, be te ke toe liliu mai i he hala naa ke alu ai.

10 Koia naa ne alu ai i he hala kehe, o ikai  te ne liliu atu i he hala naa ne ha‘u ai ki Beteli.

¶ 11 Ka koeni, nae ai ha motua balofita nae nofo i Beteli; bea nae aluage a hono gaahi foha o tala kiate ia ae gaahi gaue nae fai e he tagata oe Otua i he aho koia i Beteli: koe gaahi lea naa ne lea aki ki he tu‘i, naa nau fakaha ia foki ki he e nau tamai.

12 Bea nae behe e he e nau tamai kiate kinautolu, Naa ne alu i he hala fe? He kuo mamata e hono gaahi foha ki he hala nae alu ai ae tagata oe Otua, aia nae ha‘u mei Juta.

13 Bea naa ne behe ki hono gaahi foha, Ai ae hekaaga ki he asi. Bea naa nau ai ae hekaaga ki he asi, bea naa ne heka ki ai,

14 Bea ne muimui ia ki he tagata oe Otua, bea naa ne ma‘u atu ia lolotoga ene nofo i he lolo oke: bea naa ne behe kiate ia, Ko koe ia ae tagata oe Otua aia nae ha‘u mei Juta? Bea naa ne behe mai, Ko au.

15 Bea naa ne toki behe kiate ia, Ke ta o mo au ki abi, bea ke kai ha meakai.

16 Bea naa ne behe, E ikai teu faa foki atu mo koe, be alu mo koe: bea e ikai teu kai ha meakai be inu ha vai mo koe i he botu ni:

17 He nae tala mai i he folofola a Jihova, E ikai te ke kai ha ma be inu ha vai i ai, be te ke toe liliu atu ke alu i he hala naa ke omi ai.

18 Bea nae behe eia kiate ia, Koe balofita foki au o hage ko koe; bea nae lea mai ha agelo kiate au i he fekau a Jihova, o behe, Toe omi ia mo koe ki ho fale, koeuhi ke ne kai ha meakai mo inu ha vai. Ka naa ne loi kiate ia.

19 Koia naa ne foki atu mo ia, mo ne kai ae meakai i hono fale, mo ne inu vai.

¶ 20 Bea nae hoko o behe, lolotoga e na nofo i he keinagaaga, nae hoko mai ae folofola a Jihova ki he balofita nae fakafoki mai ia:

21 Bea naa ne ui ki ne tagata oe Otua aia nae ha‘u mei Juta, o behe, Oku behe e Jihova, Koeuhi kuo ke talagataa ki he folofola a Jihova, bea kuo ikai te ke fai ae fekau aia nae fekau kiate koe e Jihova ko ho Otua,

22 Ka kuo ke toe foki ki mui, bea kuo ke kai ae meakai mo inu ae vai i he botu, aia nae behe ai kiate koe, Oua naa ke kai ha meakai, be inu ha vai; e ikai hoko ho agaaga ki he fonua loto o hoo gaahi tamai.

¶ 23 Bea nae hoko o behe, hili a ene kai ae meakai bea hili mo ene inu, naa ne ai ae hekaaga ki he asi, ma ae balofita naa ne fakafoki mai.

24 Bea i he ene alu, nae fetaulaki mai kiate ia ha laione i he hala, o ne tamate‘i ia: bea nae to hifo a hono agaaga i he hala, bea nae tuu ofi ki ai ae asi, bea nae tuu foki ae laione o ofi atu ki he agaaga.

25 Bea vakai, nae alu atu ai ha kau tagata, o nau mamata ki he agaaga nae li i he hala, bea moe laione nae tuu ofi atu ki he agaaga: bea naa nau omi o tala ia i he kolo aia nae nofo ai ae motua balofita.

26 Bea i he ene fanogo ki ai ae balofita aia nae fakafoki mai ia mei he hala, nae behe eia, Koe tagata oe Otua ia, aia nae talagataa ki he folofola a Jihova: koia kuo tukuage ai ia ki he laione, aia kuo maumau‘i ia, mo tamate‘i ia, o hage koe folofola a Jihova, aia naa ne folofola aki kiate ia.

27 Bea nae lea ia ki hono gaahi foha, o behe, Ai ae hekaaga ki he asi maaku. Bea naa nau ai ae hekaaga.

28 Bea naa ne alu o ilo a hono agaaga kuo li i he hala, bea tutuu ae asi moe laione o vaofi moe agaaga: nae ikai keina e he laione ae agaaga, be  te ne haehae ae asi.

29 Bea nae too hake e he balofita ae agaaga oe tagata oe Otua, o ne fakaheka ia ki he asi, o ne toe omi ia: bea nae ha‘u ae motua balofita ki he kolo, ke ne tegihia ia bea ke fai hono butu.

30 Bea naa ne tuku hono jino ki hono faitoka oona; bea naa nau tegihia ia, o behe, Oiaue! a hoku kaiga!

31 Bea nae hoko o behe, hili a ene tanu ia, naa ne lea ki hono gaahi foha, o behe, O kau ka mate au, te mou toki tanu au i he fonua loto aia kuo tanu ai ae tagata oe Otua; tuku fakataha a hoku gaahi hui mo hono gaahi hui:

32 Koeuhi koe lea naa ne kalaga aki i he folofola a Jihova ki he feilaulauaga i Beteli, bea ki he gaahi fale kotoabe i he gaahi botu maoluga, aia oku i he gaahi kolo o Samelia, e hoko mooni ia o fai.

¶ 33 Kae hili ae mea ni nae ikai tafoki a Jeloboami mei hono hala kovi, ka naa ne toe fakanofo ae kau taulaeiki mei he kau tua oe kakai, ki he gaahi botu maoluga: koia fulibe nae loto ki ai, naa ne fakanofo ia o ne hoko ki he faahiga taulaeiki oe gaahi botu maoluga.

34 Bea nae hoko ae mea ni koe agahala ki he fale o Jeloboami, ke motuhi ai ia, bea ke fakaauha ia mei he fuga o mamani.