¶ 1 BEA koeni i hono hogofulu ma valu oe ta‘u oe tu‘i ko Jeloboami koe foha o Nibati nae bule a Abijami ki Juta.

2 Nae bule ia i he ta‘u e tolu i Jelusalema. Bea koe higoa o ene fa‘e ko Meaka, koe ofefine o Abisalomi.

3 Bea naa ne muimui ki he agahala kotoabe o ene tamai, aia naa ne fai ki mua iate ia: bea nae ikai haohaoa a hono loto kia Jihova ko hono Otua, o hage koe loto o ene tamai ko Tevita.

4 Ka ne ogo ia nae foaki kiate ia ha māma i Jelusalema e Jihova ko hono Otua, koeuhi ko Tevita, ke ne hakeaki‘i a hono foha ki mui iate ia, bea ke fokotuu mau a Jelusalema:

5 Koeuhi nae fai totonu a Tevita i he ao o Jihova, bea nae ikai tafoki ia mei ha mea e taha naa ne fekau kiate ia i he aho kotoabe o ene moui, ka i he mea be kia Ulia koe tagata Heti.

6 Bea nae fai ai be ae tau e Lehoboami mo Jeloboami i he aho kotoabe o ene moui.

7 Bea koeni koe toe oe gaahi gaue nae fai e Abijami, moia kotoabe naa ne fai, ikai kuo tohi ia i he tohi fakamatala ki he gaahi tu‘i o Juta? Bea nae tau a Abijami mo Jeloboami.

8 Bea nae mohe a Abijami mo ene gaahi tamai; bea naa nau fai hono butu i he kolo o Tevita: bea ko Asa ko hono foha nae fetogi ia i he bule.

¶ 9 Bea nae hoko a Asa o bule ki Juta i hono uofulu oe ta‘u a Jeloboami koe tu‘i o Isileli.

10 Bea nae bule ia i Jelusalema i he ta‘u e fagofulu ma taha. Bea koe higoa o ene kui ko Meaka, koe ofefine o Abisalomi.

11 Bea nae fai e Asa aia nae totonu i he ao o Jihova, o hage ko Tevita ko ene tamai.

12 Bea naa ne ave mei he fonua ae kakai agafakasotoma, mo ne ave ae gaahi tamabua aia nae gaohi e he ene gaahi tamai.

13 Bea ko Meaka foki ko ene kui naa ne liliu ia mei he ene nofo koe tu‘i fefine, koeuhi ko ene gaohi ha tamabua i ha vao tabu; bea nae maumau‘i e Asa a hono tamabua, o ne tutu ia i he vee vaitafe ko Kitiloni.

14 Ka nae ikai liaki ae gaahi botu maoluga: ka ne ogo ia nae agatonu kia Jihova ae loto o Asa i hono gaahi aho kotoabe.

15 Bea naa ne fetuku mai ae gaahi mea tabu aia nae fakatabu‘i e he ene tamai, moe gaahi mea naa ne fakatabu‘i eia, ki he fale o Jihova, ae siliva, moe koula, bea moe gaahi ibu.

¶ 16 Bea nae faa tau a Asa bea mo Baasa koe tu‘i o Isileli i ho na gaahi aho kotoabe.

17 Bea nae alu hake a Baasa koe tu‘i o Isileli ki Juta, bea naa ne laga a Lama, koeuhi ke oua naa ne tuku ha toko taha ke alu atu be hu mai kia Asa koe tu‘i o Juta.

18 Bea nae toki ave e Asa ae toega siliva moe koula kotoabe aia nae tuku i he gaahi tukuga koloa i he fale o Jihova, moe koloa oe fale oe tu‘i, o ne atu ia ki he nima o ene kau tamaioeiki: bea nae ave ia e Asa kia Beni‐hatati, koe foha o Tabilimoni, koe foha o Hesioni, koe foha o Tabilimoni, koe foha o Hesioni, koe tu‘i o Silia aia nae nofo i Tamasikusi, o ne lea o behe,

19 Kuo ta fefuakavaaki akitaua, bea behe mo eku tamai bea mo hoo tamai: bea vakai, kuou fekau atu kiate koe ha mea ofa koe siliva moe koula; ha‘u o maumau‘i a hoo fuakava mo Baasa koe tu‘i o Isileli, koeuhi ke ne alu iate au.

20 Koia nae tokaga a Beni‐hatati ki he tu‘i ko Asa, mo ne fekau atu ae gaahi eiki bule oe kau tau nae iate ia ke tau‘i ae gaahi kolo o Isileli, bea naa ne teia a Ijoni, mo Tani, mo Ebeli‐bete‐meaka, bea mo Kineloti katoa, bea moe fonua kotoabe o Nafitali.

21 Bea nae hoko o behe, i he ene fanogo ki ai a Baasa, naa ne tutuku mei he ene laga a Lama, bea nofo ia i Tilisa.

22 Bea nae toki fai fono e Asa i he botu kotoabe o Juta; nae ikai ha botu e taekau: bea naa nau fetuku o ave ae gaahi maka o Lama, bea mo hono gaahi akau, aia nae laga aki ia e Baasa; bea nae laga aki ia e Asa koe tu‘i a Keba o Benijimani, bea mo Misiba.

23 Bea ko hono toe oe gaahi gaue nae fai e Asa, bea mo ene malohi katoa, moia fulibe naa ne fai, moe gaahi kolo naa ne laga, ikai kuo tohi ia i he tohi fakamatala ki he gaahi tu‘i o Juta? Ka i he kuoga o ene motua lahi naa ne mahakiia i hono va‘e.

24 Bea nae mohe a Asa mo ene gaahi tamai, bea nae fai hono butu ki he  botu o ene gaahi tamai i he kolo o Tevita ko ene tamai: bea nae bule a Jihosafate ko hono foha, ko hono fetogi.

¶ 25 Bea nae kamata bule a Natabi koe foha o Jeloboami i Isileli i hono ua oe ta‘u a Asa koe tu‘i o Juta, bea naa ne bule ki Isileli i he ta‘u e ua.

26 Bea nae fai eia ae kovi i he ao o Jihova, bea nae alu ia i he hala o ene tamai, bea i he agahala aia naa ne fakaagahala ai a Isileli.

¶ 27 Bea nae fakalagalaga tau kiate ia e Baasa koe foha o Ahija, oe fale o Isaka; bea nae tamate‘i ia e Baasa i Kibitoni, aia oku oe kakai Filisitia; he nae kabui a Kibitoni aki ae tau e Natabi bea mo Isileli kotoabe.

28 Io i hono tolu oe ta‘u a Asa koe tu‘i o Juta nae tamate‘i ia e Baasa, mo ne totogi ai ia i he bule.

29 Bea nae hoko o behe, lolotoga a ene bule aana, naa ne tamate‘i ae fale katoa o Jeloboami; nae ikai tuku kia Jeloboami ha toko taha nae kei mānava, ka naa ne fakaauha ia, o fakatatau moe folofola a Jihova, aia naa ne folofola aki i he ene tamaioeiki ko Ahija koe tagata Sailo:

30 Koeuhi koe gaahi agahala a Jeloboami, aia naa ne agahala ai, mo ne fakaagahala aki a Isileli, i he ene ahiahi kovi aia naa ne ahiahi kovi ai kia Jihova koe Otua o Isileli ke ne houhau ai.

¶ 31 Bea koeni ko hono toe oe gaahi gaue a Natabi, moia kotoabe naa ne fai, ikai kuo tohi ia i he tohi fakamatala ki he gaahi tu‘i o Isileli?

32 Bea nae faa tau a Asa mo Baasa koe tu‘i o Isileli i ho na gaahi aho kotoabe.

33 I hono tolu oe ta‘u a Asa koe tu‘i o Juta nae kamata ai ae bule a Baasa koe foha o Ahija ki Isileli katoa i Tilisa, i he ta‘u a uofulu ma fa.

34 Bea naa ne fai ae kovi i he ao o Jihova, mo ne alu i he hala o Jeloboami, bea i he kovi aana aia naa ne fakaagahala ai a Isileli.