¶ 1 BEA nae fakaha e Ehabi kia Jisibeli ae mea kotoabe nae fai e Ilaija, bea mo ene tamate ae kau kikite kotoabe aki ae heleta.

2 Bea nae toki fekau atu ha talafekau e Jisibeli kia Ilaija, ke ne behe. Ke fai behe be kiate au e he gaahi otua, bea lahi hake foki, o kabau e ikai teu fakatatau a hoo moui aau moe moui a ha taha iate kinautolu, i he feituulaa ni abogibogi.

3 Bea i he ene mamata ki ai, naa ne tuu hake, mo ne hola ke ne moui, bea ne ha‘u ki Beasiba aia oku i Juta, o ne tuku i ai a ene tamaioeiki.

4 Ka ka alu be ia ki he toafa koe fonoga aga oe aho e taha, bea ne ha‘u o nofo hifo i he lolo akau koe juniba: bea naa ne kole maana ke ne mate; o ne behe, Kuo lahi, E Jihova, too atu eni a eku moui: he oku ikai teu lelei lahi hake au i he eku gaahi tamai.

5 Bea lolotoga a ene tokoto o mohe i he lolo akau koe juniba, vakai, nae toki ala kiate ia ha agelo, o ne behe kiate ia. Tuu hake, o kai.

6 Bea naa ne jio, bea vakai, koe foi ma nae tunu i he fuga fefie, bea tuu ofi ha ibu vai ki hono oluga. Bea naa ne kai mo inu, bea toe tokoto ia ki lalo.

7 Bea nae toe ha‘u ae agelo a Jihova ko hono liuga ua, o ala kiate ia, o ne behe, Tuu hake o kai; he oku loloa fau ae hala kiate koe.

8 Bea naa ne tuu hake, mo ne kai mo inu, bea naa ne alu i he malohi oe meakai koia i he aho e fagofulu moe bo e fagofulu ki Holebi koe mouga oe Otua.

9 Bea naa ne omi ai ki ha ana‘i maka, o ne nofo ai; bea vakai nae hoko mai ae folofola a Jihova kiate ia, bea naa ne behe kiate ia, Koeha oku ke fai i heni, Ilaija?

10 Bea nae behe eia, Naaku loto feiga aubito koeuhi ko Jihova koe Otua oe gaahi toko lahi: he kuo liaki hoo fuakava e he fānau a Isileli, bea kuo li hifo hoo gaahi feilaulauaga, bea nau tamate‘i a hoo kau balofita aki ae heleta; bea ko au, io ko au toko taha be oku toe; bea oku nau kumi a eku moui, ke too atu ia.

11 Bea nae behe eia, Ke ke alu atu, mo ke tuu i he fuga mouga i he ao o Jihova. Bea vakai, nae haele atu a Jihova, bea nae mafahifahi ae mouga e he matagi malohi, bea ne fakamomomomoiki ae gaahi maka i he ao o Jihova; ka nae ikai i he matagi a Jihova: bea hili ae matagi nae mofuike; ka nae ikai i he mofuike a Jihova:

12 Bea hili ae mofuike koe afi; ka nae ikai i he afi a Jihova: bea hili ae afi nae ai ae kihi‘i le‘o malie.

13 Bea behe, i he ene fanogo ki ai a Ilaija, naa ne fakabulou hono mata aki a hono bulubulu, mo ne alu atu o tuu i he huaga oe ana. Bea vakai, koe le‘o nae behe mai kiate ia, Koeha oku ke fai i heni Ilaija?

14 Bea nae behe eia, Naaku loto feiga aubito koeuhi ko Jihova koe Otua oe gaahi toko lahi: koeuhi kuo liaki hoo fuakava e he fānau a Isileli, bea kuo li hifo hoo gaahi feilaulauaga, bea tamate‘i hoo kau balofita aki ae heleta; bea ko au, io ko au toko taha be oku kei toe; bea oku nau kumi a eku moui, ke too atu ia.

15 Bea nae behe e Jihova kiate ia, Ke ke alu, toe foki atu i ho hala ki he toafa o Tamasikusi; bea oka ke ka hokoage, tākai aki ae lolo a Hasaeli ke ne tu‘i i Silia:

16 Bea ko Jehu koe foha o Nimisi te ke tākai aki ae lolo ke ne tu‘i i Isileli: bea ko Ilaisa koe foha o Safati mei Ebeli‐mihola, te ke tākai aki ae lolo ke hoko koe balofita ke ne fetogi koe.

17 Bea e hoko o behe, koia ia e hao moui mei he heleta a Hasaeli e tamate‘i ia e Jehu: bea koia e hao moui mei he heleta a Jehu e tamate‘i e Ilaisa.

18 Ka teu tuku ha toko fitu afe i Isileli, ae gaahi tui kotoabe kuo ikai mabelu kia Beali, bea moe gutu kotoabe kuo ikai uma kiate ia.

¶ 19 Koia nae alu ia mei he botu koia, mo ne ma‘u atu a Ilaisa koe foha o Safati, lolotoga a ene keli goue aki ae tauluai  bulu e hogofulu ma ua i hono ao, ka nae tuu ia moia ki mui: bea nae aluage a Ilaija i hono tafaaki o ne li atu a hono bulubulu kiate ia.

20 Bea naa ne tukuage ae faga bulu, ka ka lele muimui ia Ilaija, o ne behe, Oku ou kole kiate koe, tuku keu uma ki he eku tamai bea mo eku fa‘e, bea teu toki muimui kiate koe. Bea naa ne beheage kiate ia, Toe foki atu be: he koeha ha mea kuou fai kiate koe?

21 Bea naa ne toe foki atu meiate ia, mo ne ave ae tauluai bulu, mo ne tamate‘i ia, bea naa ne haka ho na kakano aki ae nāunāu oe faga bulu, bea naa ne atu ki he kakai ke nau kai. Bea hili ia naa ne tuu hake, mo ne muimui kia Ilaija, o ne tauhi kiate ia.