¶ 1 BEA hili ae gaahi mea ni, nae ma‘u ha goue vaine e Naboti koe tagata Jesilili, aia nae i Jesilili o vaofi moe fale fakaeieiki o Ehabi koe tu‘i o Samelia.

2 Bea nae lea a Ehabi kia Naboti, o behe, Tuku mai ho goue vaine, koeuhi keu to ai ae gaahi akau iki, he oku ofi mai ia ki  hoku fale: bea teu totogi aki ia ha goue vaine oku lelei hake; bea kabau e lelei kiate koe teu fakatatau hono totogi aki ae baaga.

3 Bea nae behe e Naboti kia Ehabi, Ke taofi au mei ai e Jihova, a eku foaki ae tofia o eku gaahi tamai kiate koe.

4 Bea nae hu atu a Ehabi ki hono fale kuo māfajia mo mamahi koeuhi koe lea nae lea aki kiate ia e Naboti koe tagata Jesilili; he kuo behe eia, E ikai jii teu foaki ae tofia o eku gaahi tamai kiate koe. Bea naa ne tokoto hifo i hono mohega, bea ne tafoki atu a hono mata, bea nae ikai te ne kai ha mea.

¶ 5 Ka nae ha‘u kiate ia a Jisibeli ko hono unoho mo ne behe kiate ia, Koeha oku mamahi behe fau ai ho loto, oku ikai ai te ke kai ha mea?

6 Bea nae behe eia kiate ia, Koeuhi naaku lea kia Naboti koe tagata Jesilili, beau behe kiate ia, Tuku mai kiate au hoo goue vaine i ha totogi; bea kabau e lelei kiate koe teu atu ha goue vaine kehe ko hono fetogi: bea naa ne behe mai, E ikai teu foaki kiate koe a eku goue vaine.

7 Bea nae behe kiate ia e Jisibeli ko hono unoho, Oku ke bule eni koa ki he buleaga o Isileli? tuu hake, mo ke kai, bea tuku ke fiefia ho loto: teu atu e au kiate koe ae goue vaine o Naboti koe tagata Jesilili.

8 Koia naa ne fai ae gaahi tohi i he higoa o Ehabi, mo ne fakamau ia aki a ene fakailoga, mo ne ave ae gaahi tohi ki he kau mātua, moe houeiki nae nonofo mo Naboti i hono kolo.

9 Bea naa ne tohi i he gaahi tohi, o behe, Fanogonogo ha aukai, bea ai ke maoluga hake a Naboti i he kakai:

10 Bea tuku ha tagata e toko ua, koe fānau oe agakovi, ke tuu i hono ao, mo talatalaaki‘i ia, o behe, Naa ke lea kabekabe ki he Otua bea moe tu‘i. Bea mou ave ia, mo lijigi aki ae maka, ke ne mate ai.

11 Bea nae fai e he kau tagata o hono kolo, bea moe kau mātua, moe houeiki aia nae nofo i hono kolo, o hage koia nae fekau e Jisibeli kiate kinautolu, bea hage koe tohi i he gaahi tohi aia naa ne atu kiate kinautolu.

12 Naa nau fanogonogo ae aukai, mo  nau fakamaoluga hake a Naboti i he kakai.

13 Bea nae hu mai ha ogo tagata, koe fānau oe agakovi, o na nofo i hono ao: bea nae talatalaaki‘i ia e he ogo tagata oe agakovi, io kia Naboti, i he ao oe kakai, o behe, Nae lea kabekabe a Naboti ki he Otua bea moe tu‘i. Bea naa nau toki ave ia ki he tuaa kolo, mo lijigi ia aki ae gaahi maka ke ne mate.

14 Bea hili ia naa nau fekau kia Jisibeli, o behe, Kuo lijigi a Naboti bea kuo ne mate.

15 Bea i he ene fanogo e Jisibeli kuo lijigi a Naboti bea kuo ne mate, nae behe e Jisibeli kia Ehabi, Tuu hake, mo ma‘u ae goue vaine o Naboti koe tagata Jesilili, aia nae ikai te ne fie tuku kiate koe i ha baaga: he oku ikai moui a Naboti ka kuo mate.

16 Bea i he ene fanogo e Ehabi kuo mate a Naboti, nae tuu hake a Ehabi ke ne alu hifo ki he goue vaine o Naboti koe tagata Jesilili, ke ne ma‘u ia maana.

¶ 17 Bea nae hoko mai ae folofola a Jihova kia Ilaija koe tagata Tisiba, o behe,

18 Tuu hake, mo alu hifo ke fakafetaulaki kia Ehabi koe tu‘i o Isileli, aia oku i Samelia: vakai, oku ne i he goue vaine o Naboti, aia kuo ne alu hifo ki ai ke ma‘u ia maana.

19 Bea te ke lea kiate ia, o behe, Oku behe e Jihova, Kuo ke fai ae fakabo, bea kuo ke ma‘u foki maau? Bea te ke lea kiate ia, o behe, Oku behe e Jihova, I he botu koia nae emo ai e he faga kuli ae toto o Naboti e emo ai e ha faga kuli ho toto oou, io oou.

20 Bea nae behe e Ehabi kia Ilaija, Kuo ke ilo‘i au, akoe ko hoku fili? Bea naa ne beheage, Kuou ilo‘i koe; koeuhi kuo ke fakatau atu koe ke fai ha gaue kovi i he ao o Jihova.

21 Vakai, teu fakahoko mai ae kovi kiate koe, bea teu too o ave ho hako, bea teu motuhi mei a Ehabi ae kakai tagata, bea moia kuo tabuni mo toe i Isileli,

22 Bea  teu gaohi ho fale ke hage koe fale o Jeloboami koe foha o Nibati, bea hage koe fale o Baasa koe foha o Ahija, koe mea i he kovi kuo ke fakatubu ai eku houhau, mo ke fakaagahala ai a Isileli.

23 Bea ia Jisibeli foki nae folofola ai a Jihova, o behe, E kai a Jisibeli e he faga kuli i he vee a o Jesilili.

24 Koia oku kau kia Ehabi e mate i he kolo e kai ia e he faga kuli: bea koia oku mate i he goue e keina e he faga manu buna oe atā.

25 (Ka nae ikai tatau ha toko taha mo Ehabi, aia naa ne fakatau ia ke fai ae gaue kovi i he ao o Jihova, aia nae ue‘i hake e hono unoho ko Jisibeli.

26 Bea naa ne fai o fakalielia lahi i he muimui ki he gaahi tamabua, o tatau moia kotoabe nae fai e he kakai Amoli, akinautolu nae kabuji atu e Jihova mei he ao oe fānau a Isileli.)

27 Bea i he ene fanogo e Ehabi ki he gaahi lea ni, naa ne haehae hono gaahi kofu, mo ne ai ae tauagaa ki hono jino, o ne aukai, mo ne tokoto hifo i he tauagaa, mo ne alu fakaehiehi.

28 Bea nae hoko mai ae folofola a Jihova kia Ilaija koe tagata Tisiba, o behe,

29 Oku ke mamata kia Ehabi mo ene fakavaivai‘i ia i hoku ao? koe mea i he ene fakavaivai‘i ia i hoku ao, e ikai ai teu omi ae kovi i hono gaahi aho oona: ka i he gaahi aho o hono foha teu omi ae kovi ki hono fale.