¶ 1 BEA koeni nae unuunu mai ae gaahi aho o Tevita ke ne bekia ai; bea naa ne tukutala kia Solomone ko hono Alo, o behe,

2 Oku ou alu au i he hala o mamani kotoabe: koia ke ke malohi koe, bea ke fai o galigali tagata:

3 Bea ke tauhi ki he fekau a Jihova ko ho Otua, ke eveeva i hono gaahi hala, bea ke fai a ene gaahi tuutuuni, mo ene gaahi fekau, mo ene gaahi fakamāu, mo ene fakamooni kotoabe, o hage koia kuo tohi i he fono a Mosese, koeuhi ke ke monuia ai i he mea kotoabe oku ke fai, bea i he botu fulibe te ke alu ki ai:

4 Koeuhi ke fakatuu mau e Jihova a ene folofola aia naa ne lea aki koeuhi ko au, o behe, Kabau e tokaga e hoo fānau ki ho nau hala, ke aeva i hoku ao i he mooni aki a ho nau loto kotoa mo ho nau laumalie kotoa, (naa ne behe eia,) e ikai te ke majiva tagata koe ke nofo i he nofoa fakatu‘i o Isileli.

5 Bea oku ke ilo foki, aia nae fai kiate au e Joabe koe tama a Seluia, moia naa ne fai ki he ogo eiki e toko ua oe kau tau o Isileli, kia Abina koe foha o Nea, bea kia Amasa koe foha o Jeteli, aia naa ne tamate‘i, o ne liligi ae toto oe tau lolotoga ae melino, o ne unu i he toto oe tau a hono nonoo nae nootaki aki hono kogaloto, bea mo ene tobuva‘e aia nae i hono va‘e.

6 Koia fai o fakatatau mo hoo boto, bea oua naa tuku ke alu hifo a hono ulu hina ki he faitoka i he melino.

7 Ka ke fakaha ae ofa ki he gaahi foha o Basilai koe tagata Kiliati, bea tuku ke nau iate kinautolu e kai mei hoo keinagaaga: he naa nau fai behe kiate au i he eku hola koeuhi ko Abisalomi ko ho taokete.

8 Bea vakai, oku iate koe a Simi koe foha o Kela, koe tagata Benijimani mei Bahulimi, aia nae kabe kiate au i he kabe lahi i he aho aia naaku alu ai ki Mehanemi: ka naa ne o hifo kiate au ke ma fetaulaki ki Joatani, bea naaku fuakava kiate ia ia Jihova, o behe, E ikai teu tamate‘i koe aki ae heleta.

9 Ka koeni, oua naa ke lau ia koe taehalaia: he koe tagata boto koe, bea oku ke ilo ae mea oku totonu ke ke fai kiate ia; ka ke o hifo ekoe a hono ulu hina ki he faitoka moe toto.

¶ 10 Bea behe, nae mohe a Tevita mo ene gaahi tamai, bea nae fai ene butu ki he kolo o Tevita.

11 Bea koe kuoga nae bule ai a Tevita ki Isileli koe ta‘u e fagofulu: koe ta‘u e fitu naa ne bule ai i Hebeloni, bea koe ta‘u e tolugofulu ma tolu naa ne bule i Jelusalema.

12 Bea nae toki nofo a Solomone ki he nofoa fakatu‘i o ene tamai ko Tevita: bea nae fakatuu mau aubito a hono buleaga.

¶ 13 Bea nae ha‘u a Atunaisa koe tama a Hakiti kia Batiseba koe fa‘e a Solomone. Bea naa ne behe mai eia kiate ia, Oku ke ha‘u fakamelino be? bea nae behe atu eia, Koe melino be.

14 Naa ne behe foki eia, Oku ai ha mea oku ou fie lea ai kiate koe. Bea naa ne behe atu, Ke ke lea be.

15 Bea beheage eia, Oku ke ilo nae ooku ae buleaga, bea nae haga mai kiate au ae mata kotoabe i Isileli, koeuhi keu hoko o bule: ka koeni kuo liliu ae buleaga, bea kuo hoko ia ki hoku tokoua: he nae oona ia mei a Jihova.

16 Bea koeni koe mea be taha oku ou kole meiate koe, bea oua naa ke fakaikai mai. Bea naa ne behe kiate ia, Ke ke lea be.

17 Bea nae behe eia, Oku ou kole kiate koe, ke ke lea kia Solomone koe tu‘i (he koeuhi e ikai te ne ikai mai kiate koe,) ke ne foaki mai a Abisaki koe fefine Sunemi ke ma unoho.

18 Bea nae behe e Batiseba, Oku lelei; teu lea maau ki he tu‘i.

¶ 19 Koia nae alu ai a Batiseba ki he tu‘i ko Solomone ke lea kiate ia ma a Atunaisa. Bea nae tuu hake ae tu‘i ke fetaulaki kiate ia, bea naa ne bunou kiate ia, mo ne nofo hifo ki hono nofoaga fakatu‘i, bea naa ne fekau ke teu ha nofoa ma ae fa‘e ae tu‘i; bea nae nofo ia ki hono nima toomatau.

20 Bea nae toki behe eia, Oku ou kole meiate koe ae mea jii be taha; oua naa ke behe mai ikai. Bea nae beheage e he tu‘i kiate ia, Ke ke fai be hoo kole, a eku fa‘e: koeuhi e ikai teu behe atu ikai.

21 Bea nae behe eia, Tuku ke atu a Abisaki koe fefine Sunemi kia Atunaisa ko hoo tokoua ke na unoho.

22 Bea nae talaage e he tu‘i ko Solomone ki he ene fa‘e, o behe, Bea koeha oku ke kole ai a Abisaki koe fefine Sunemi ma a Atunaisa? kole foki maana ae buleaga; he ko hoku taokete ia; io, maana, bea mo Abaiata koe taulaeiki, bea ma a Joabe koe tama a Seluia.

23 Bea nae toki fuakava ai a Solomone ia Jihova, o behe, Ke fai behe kiate au e he Otua, o lahi hake foki, o kabau e ikai mate a Atunaisa koeuhi ko ene lea aki ae lea ni.

24 Bea koia, Oku moui a Jihova aia kuo ne fakamalohi‘i au, o ne hiki hake au ki he nofoa fakatu‘i o eku tamai ko Tevita, bea kuo ne fokotuu ha fale mooku, o hage ko ene talaofa, bea e mate tamate‘a a Atunaisa he aho ni.

25 Bea nae fekau atu e he tu‘i ko Solomone a Benaia koe foha o Jehoiata; bea naa ne hoko atu kiate ia bea naa ne mate ai.

26 Bea nae behe e he tu‘i kia Abaiata koe taulaeiki, Alu koe ki Anatoti, ki hoo botu fonua oou; he oku totonu ke ke mate koe; ka e ikai teu tamate‘i koe i he kuoga ni, koeuhi naa ke fua ae buha tabu a Jihova koe Otua i he ao o Tevita ko eku tamai, bea koeuhi naa ke mamahi koe i he mea kotoabe nae mamahi ai a eku tamai.

27 Koia nae kabuji ai a Abaiata e Solomone mei he ene  gaue fakataulaeiki kia Jihova; koeuhi ke ne fakamooni ae folofola a Jihova aia naa ne folofola aki ki he fale o Ilai i Sailo.

¶ 28 Bea nae toki omi a hono ogoogo kia Joabe: he nae liliu a Joabe ke muimui kia Atunaisa, ka nae ikai muimui ia kia Abisalomi. Bea nae hola a Joabe ki he fale fehikitaki o Jihova, o ne buke atu ki he nifo oe feilaulauaga.

29 Bea nae fakaha ia ki he tu‘i ko Solomone o behe, kuo hola a Joabe ki he fale fehikitaki o Jihova; bea vakai, kuo ofi atu ia ki he feilaulauaga. Bea nae toki fekau‘i e Solomone a Benaia koe foha o Jehoiata, o ne behe, Alu, o ta‘i ia,

30 Bea nae hoko atu a Benaia ki he fale fehikitaki o Jihova, mo ne behe kiate ia, Oku behe mai e he tu‘i, Ke ke tuu mai. Ka nae behe eia, E ikai; ka teu mate be i heni. Bea nae toe omi hono tala e Benaia ki he tu‘i, o behe, Nae behe ae lea a Joabe, bea nae behe ni a ene talia au.

31 Bea nae behe e he tu‘i kiate ia, Ke ke fai kiate ia o hage ko ene lau, bea ke ta‘i ia, mo tanu; koeuhi ke ke ave ai ae toto taehalaia aia nae liligi e Joabe, meiate au, bea mei he fale o eku tamai.

32 Bea e tuku e Jihova a hono toto ki hono ulu oona, aia nae teia ae ogo tagata nae maonioni mo lelei hake iate ia, o ne tamate‘i akinaua aki ae heleta, ka nae tae ilo ki ai a eku tamai ko Tevita; io, a Abina koe foha o Nea, koe eiki bule ki he kau tau o Isileli, mo Amasa, koe foha o Jeteli, koe eiki bule ki he kau tau o Juta.

33 Koia e foki atu ai a no na toto ki he ulu o Joabe, bea ki he ulu o hono hako o taegata: ka ko Tevita, bea ki hono hako oona, bea ki hono fale, bea ki hono nofoa fakatu‘i, e i ai ae melino mei a Jihova, o taegata.

34 Koia nae alu hake a Benaia koe foha o Jehoiata, bea naa ne hoko atu kiate ia, mo ne tamate‘i ia: bea nae tanu ia i hono fale oona i he toafa.

35 Bea nae tuku e he tu‘i a Benaia koe foha o Jehoiata ke totogi ia i he bule ki he kau tau: bea nae tuku e he tu‘i a Satoki koe taulaeiki ke ne fetogi a Abaiata.

¶ 36 Bea nae fekau e he tu‘i o ne ui mai a Simi, o ne behe kiate ia, Laga ekoe moou ha fale i Jelusalema, bea nofo ai, bea oua naa ke alu atu mei ai ki ha botu kehe.

37 He koe mooni, i he aho koia te ke alu atu, mo ke laka atu ki he kauvai e taha o Kitiloni, ke ke ilo fakababau te ke mate mooni ai: e i ho ulu oou be ho toto.

38 Bea nae behe e Simi ki he tu‘i Oku lelei ae lea koeni: o hage koia kuo lea aki e hoku eiki koe tu‘i e behe ae fai e hoo tamaioeiki. Bea nae nofo fuoloa a Simi i Jelusalema.

39 Bea i he ene oji ae ta‘u e tolu nae hoko o behe, nae hola ae ogo tamaioeiki a Simi kia Akisi koe foha o Meaka koe tu‘i o Kati. Bea naa nau fakahaage kia Simi, o behe, Vakai, kuo i Kati a hoo ogo tamaioeiki.

40 Bea nae tuu hake a Simi, o ne ai ae hekaaga ki he ene asi, bea alu ia ki Kati kia Akisi ke kumi ki he ene ogo tamaioeiki: bea nae alu a Simi, o ne omi a ene ogo tamaioeiki mei Kati.

41 Bea nae fakaha kia Solomone, kuo alu a Simi mei Jelusalema ki Kati, bea kuo toe liu mai.

42 Bea nae fekau e he tu‘i o ne ui mai a Simi, mo ne behe kiate ia, Ikai naaku fekau‘i koe ke ke fuakava ia Jihova, beau lea mamafa kiate koe, o behe, Ke ke ilo fakababau, i he aho koia te ke alu atu, mo eveeva mamao ki ha botu, ke ke mate mooni ai? bea naa ke behe mai kiate au, Oku lelei ae lea kuou fanogo ki ai.

43 Koia koeha kuo ikai ai te ke fai ki he fuakava a Jihova, moe fekau aia kuou tuku bau kiate koe?

44 Nae behe foki e he tu‘i kia Simi, Oku ke ilo ae kovi kotoabe kuo fufu i ho loto, aia naa ke fai kia Tevita ko eku tamai: koia foki e fakafoki ai e Jihova a hoo kovi ki ho ulu oou;

45 Bea e fakamonuia ae tu‘i ko Solomone, bea e fokotuu mau i he ao o Jihova ae nofoa fakatu‘i o Tevita o taegata.

46 Koia nae fekau ai e he tu‘i kia Benaia koe foha o Jehoiata; bea nae alu atu ia, bea naa ne ta‘i ia ke ne mate. Bea nae fakamalohi ae buleaga i he nima o Solomone.