¶ 1 BEA nae fakakaiga a Solomone mo Felo koe tu‘i o Ijibite, bea naa ne ma‘u ae ofefine o Felo, o ne omi ia ki he kolo o Tevita, kae oua ke oji ene laga a hono fale oona, bea moe fale o Jihova, bea moe a nae takatakai aki a Jelusalema.

2 Ka nae fai ae feilaulau e he kakai i he gaahi botu maoluga, koeuhi nae ikai laga ha fale ki he huafa o Jihova, o a‘u ki he gaahi aho koia.

3 Bea nae ofa a Solomone kia Jihova, bea nae eveeva ia i he gaahi fekau a Tevita ko ene tamai: ka koe mea be taha, naa ne fai ae feilaulau mo tutu ae mea namu kakala i he gaahi botu maoluga.

¶ 4 Bea nae alu ae tu‘i ki Kibione ke fai feilaulau i ai; he koe botu maoluga ia nae ogoogo lahi: koe feilaulau tutu e afe nae feilaulau aki e Solomone i he feilaulauaga koia.

5 Bea nae ha mai a Jihova kia Solomone i Kibione i ha miji i he bo: bea nae behe e he Otua, Kole ha mea keu foaki kiate koe.

6 Bea nae behe e Solomone, Kuo ke fakaha ki he eku tamai ko Tevita ko hoo tamaioeiki ae aloofa lahi, o hage ko ene eveeva i ho ao i he mooni, moe maonioni, bea i he agatonu o hono loto kiate koe: bea kuo ke tuku ae gaue ofa lahi ni maana, i hoo tuku kiate ia ha foha ke ne nofo ki hono nofoa fakatu‘i, o hage koia  oku fai he aho ni.

7 Bea koeni, E Jihova ko hoku Otua, kuo ke fakanofo a hoo tamaioeiki ke tu‘i koe fetogi o Tevita ko eku tamai: bea koe tamajii jii be au oku ikai teu ilo ke fefe a eku alu atu mo eku hu mai.

8 Bea ko hoo tamaioeiki oku i he lotolotoga o hoo kakai aia kuo ke fili, koe kakai lahi, aia oku ikai faa lau hake be oku toko fiha, koe mea i he e nau toko lahi aubito.

9 Koia ke ke tuku ki hoo tamaioeiki ha loto boto ke fakamāu‘i a hoo kakai, koeuhi keu faa ilo totonu ae lelei moe kovi; he kohai oku faa fai ke fakamāu‘i eni a hoo kakai toko lahi ni?

10 Bea nae lelei ae lea ni kia Jihova, ae kole e Solomone ki he mea ni.

11 Bea nae folofola ae Otua kiate ia, Koeuhi kuo ke kole ki he mea ni, bea nae ikai te ke kole maau ae moui fuoloa; be te ke kole maau ha koloa, be te ke kole ae moui a hoo gaahi fili; ka kuo ke kole maau ae lotoloto boto, ke ilo‘i ai ae fakamāu totonu;

12 Vakai, kuou fai o tatau moia kuo ke lea ki ai: vakai, kuou foaki kiate koe ae loto boto mo faa fakakaukau; koia kuo ikai ha toko taha e tatau mo koe talu mei mua, bea e ikai tubu hake ha toko taha ke tatau mo koe ki mui.

13 Bea kuou foaki foki kiate koe ae mea nae ikai te ke kole ki ai, ae koloa, moe ogoogo fakatouoji; koia e ikai tatau mo koe ha toko taha i he gaahi tu‘i i hoo gaahi aho kotoabe.

14 Bea kabau te ke alu i hoku gaahi hala, ke fai ki he eku gaahi fono mo eku gaahi fekau, o hage koe alu a Tevita ko hoo tamai, behe, teu fakatologa a hoo gaahi aho.

15 Bea nae a hake a Solomone; bea vakai, koe miji ia. Bea naa ne ha‘u ki Jelusalema, o ne tuu i he ao oe buha oe fuakava o Jihova, mo ne atu ai ae gaahi feilaulau tutu, moe gaahi feilaulau fakamelino, bea naa ne teuteu ae katoaga ki he ene kau tamaioeiki kotoabe.

¶ 16 Bea nae toki ha‘u ae ogo fefine agahala e toko ua, ki he tu‘i, o na tutuu i hono ao.

17 Bea nae behe e he fefine e toko taha, E hoku eiki, ko au moe fefine ni oku ma nonofo i he fale be taha; bea naaku faele‘i ha tamajii lolotoga e ma i he fale moia.

18 Bea nae hoko o behe, i hono aho tolu hili a eku faele aaku, nae faele ae fefine ni foki: bea naa ma nofo fakataha; nae ikai mo ha toko taha kehe i he fale mo kimaua, ka ko kimaua be toko ua.

19 Bea nae mate ae tamajii ae fefine ni i he bo; koe mea i he ene taomia ia.

20 Bea naa ne tuu hake i he tuuabo malie, o ne ave a eku tama mei hoku tafaaki, lolotoga ae mohe a hoo kaunaga, mo ne fakatokoto ia ki hono fatafata, ka nae tuku eia a ene tamajii mate ki hoku fatafata ooku.

21 Bea i he eku tuu hake i he bogibogi ke fakahuhu a eku tamajii, vakai, kuo mate ia; ka i he eku toki vakai ki ai i he bogibogi, vakai, nae ikai ko eku tama ia, aia naaku faele‘i.

22 Bea nae behe e he fefine e toko taha, Ikai; ka ko eku tama aia oku moui, bea koia kuo mate ko hoo tama ia. Bea nae beheage eni, Ikai; ka koia kuo mate ko hoo tama ia, bea koia oku moui ko eku tama ia. Nae behe a e na lea i he ao oe tu‘i.

23 Bea nae toki behe e he tu‘i, Oku behe e he toko taha, Ko eku tama eni aia oku moui, bea ko hoo tama aia oku mate: bea oku behe e he toko taha kehe, Ikai; ka ko hoo tama aau aia oku mate, bea ko eku tama aaku aia oku moui.

24 Bea nae behe e he tu‘i, Omi kiate au ha heleta. Bea naa nau omi ae heleta ki he ao oe tu‘i.

25 Bea nae behe e he tu‘i, Fahiua ae tamajii moui, bea atu ae faahi e taha ki he toko taha, moe faahi e taha ki he toko taha kehe.

26 Bea nae toki lea ae fefine aia nae aana ae tamajii moui, he nae gau‘e a hono fatu ki he ene tama, bea naa ne behe, E hoku eiki, foaki be kiate ia ae tamajii moui, kae oua aubito naa tamate‘i ia. Ka nae behe e he toko taha, Ke oua naa aaku ia be aau, kae fahiua be.

27 Bea nae toki lea ae tu‘i o beheage, Foaki kiate ia ae tamajii moui, bea oua aubito naa tamate‘i ia: ko ene fa‘e ia.

28 Bea nae ogoogoa i Isileli kotoa ae fakamāu aia nae fai e he tu‘i; bea naa nau manavahe ki he tu‘i; he naa nau mamata kuo iate ia ae boto mei he Otua ke ne fai ae fakamāu.