¶ 1 KOIA nae bule ai ae tu‘i ko Solomone ki Isileli katoa.

2 Bea koeni ia ae houeiki nae iate ia; ko Asali koe foha o Satoki koe taulaeiki.

3 Mo Illolefi mo Ahia, koe ogo foha o Sisa, koe ogo tagata tohi; mo Jihosefate koe foha o Ahilute, koe tagata tohi mea ia.

4 Bea ko Benaia koe foha o Jehoiata nae bule ki he kau tau: bea ko Satoki mo Abaiata koe ogo taulaeiki:

5 Bea ko Asalia koe foha o Netane nae bule ia ki he kau matābule: bea ko Sabuti koe foha o Netane koe matābule lahi ia, bea koe kaiga ia oe tu‘i:

6 Bea nae bule a Ahisali ki he kakai oe fale: bea nae bule a Atonilami koe foha o Abita ki he tukuhau.

¶ 7 Bea nae ia Solomone ae kau matābule e toko hogofulu ma ua, nae bule‘i a Isileli katoa, ke tokonaki ae meakai ma ae tu‘i bea mo hono kau nofoaga; nae tokonaki i he ta‘u e he tagata taki taha i hono mahina.

8 Bea ko ho nau higoa eni: Koe foha o Uli, mei he mouga o Ifalemi:

9 Koe foha o Tekeli, i Makasi, bea i Sealibimi, mo Bete‐semesi, mo Eloni-bete‐hanani:

10 Koe foha o Hesiti, i Aluboti; nae aana a Soko, bea moe fonua kotoabe o Hefeli:

11 Koe foha o Abinatabi, i he fonua kotoabe o Toa; koia ia nae ma‘u a Tafati koe ofefine o Solomone ko hono unoho:

12 Ko Baana koe foha o Ahilute; nae oona a Tenaki, mo Mekito, mo Bete‐seani katoa, aia oku ofi ki Salitana ki lalo i Jesilili, mei Bete‐seani ki Ebelimihola, o a‘u ki he botu ki ko atu i Jokiniami.

13 Koe foha o Keba, i Lemoti‐kiliati: nae oona ae gaahi kolo o Jaili koe foha o Manase, aia oku i Kiliati; nae oona foki ae fonua o Alikobo, aia oku i Besani, koe kolo lahi e tolugofulu kuo a‘i, bea mataba aki ae balasa:

14 Ko Ahinatabi koe foha o Ito, nae aana a Mehanemi:

15 Ko Ahimasi nae i Nafitali; nae ma‘u foki eia a Basimati koe ofefine o Solomone ko hono unoho:

16 Ko Beana koe foha o Husai, nae i Aseli bea mo Aloti:

17 Ko Jihosafate koe foha o Balua, nae i Isaka:

18 Ko Simi koe foha o Ila, nae i Benijimani.

19 Ko Keba koe foha o Uli, nae i he fonua o Kiliati, moe fonua o Sihoni koe tu‘i oe kakai Amoli, bea mo Oki koe tu‘i o Besani; bea koe matābule toko taha be ia i he fonua.

¶ 20 Bea nae fuu toko lahi a Juta mo Isileli, o hage koe oneone i he matātahi a ho nau toko lahi, i he kai, moe inu, bea moe fai fakafiefia.

21 Bea nae bule a Solomone ki he buleaga kotoabe mei he vaitafe o a‘u atu ki he fonua oe kakai Filistia, bea o a‘u ki he gataaga o Ijibite: naa nau omi koloa, o tukuhau kia Solomone lolotoga ae aho kotoabe o ene moui.

¶ 22 Bea koe meakai a Solomone ki he aho be taha, koe fuaaga e tolugofulu oe mahoaa lelei, moe fuaaga e onogofulu oe mahoaa e taha,

23 Koe faga bulu jino e hogofulu, moe faga bulu e uofulu mei he botu mohukuia, moe faga sibi e teau, ka oku lau kehe ae faga haate moe faga anitelobe, moe faga tia, moe faga manu buna nae fafaga‘i ke gako.

24 He nae a‘u atu a ene bule ki he botu kotoabe i he kau vaitafe ki heni, mei Tifisa o a‘u atu ki Kesa, ki he gaahi tu‘i kotoabe i he kau vai ki heni oe vaitafe: bea nae melino be ia i he botu fulibe nae takatakai iate ia.

25 Bea nae nofo taemanavahe a Juta mo Isileli, taki taha ae tagata i hono lalo vaine moe lolo fiki oona, mei Tani o a‘u ki Beasiba, i he aho kotoabe o Solomone.

¶ 26 Bea nae ma‘u e Solomone ae botu tuuaga e fa mano ki he faga hose o ene gaahi jaliote, bea moe kau heka hose e toko taha mano ma toko ua afe.

27 Bea nae tokonaki e he kau matābule koia ae meakai ma ae tu‘i ko Solomone, bea maa nautolu kotoabe nae ha‘u ki he keinagaaga a Solomone, koe tagata taki taha i hono mahina: nae ikai te nau majiva i ha mea.

28 Naa nau omi foki, e he tagata taki taha o hage ko ene gaue aana, ae baale moe kau‘i koane ma ae faga hose moe faga manu veevave, ki he botu nae i ai ae kau matābule.

¶ 29 Bea nae foaki e he Otua kia Solomone ae boto lahi aubito moe loto faa fakakaukau, moe loto fuu lahi, o hage koe oneone aia oku i he matātahi.

30 Bea nae lahi hake ae boto a Solomone i he boto ae kakai kotoabe oe fonua fakahahake, moe boto kotoabe o Ijibite.

31 He nae boto lahi hake ia i he kakai kotoabe; o lahi hake ia Etani koe tagata Esalai, mo Hemani, mo Kalikoli, mo Talita, koe gaahi foha o Maholi: bea nae a‘u atu a ene ogoogolelei ki he gaahi buleaga kotoabe nae tuu takatakai ai.

32 Bea naa ne lea aki ae lea fakatātā e tolu afe: bea nae taha afe ma nima a ene hiva.

33 Bea naa ne fakamatala ae gaahi akau, mei he akau koe sita oku i Lebanoni o a‘u hifo ki he isobe oku tubu mai mei he fuga oe a: naa ne lea foki ki he gaahi faga manu, moe faga manu buna, moe mea oku totolo, bea moe gaahi ika.

34 Bea nae ha‘u ae niihi mei he kakai kotoabe ke fanogo ki he boto a Solomone, mei he gaahi tu‘i kotoabe o mamani, aia nae fanogo ki he ene boto.