¶ 1 HILI ia nae fakataha e Solomone ae kau mātua o Isileli, bea moe houeiki oe gaahi faahiga, koe gaahi eiki i he kau mātua oe fānau a Isileli, ki he tu‘i ko Solomone i Jelusalema, koeuhi ke nau o hake ae buha oe fuakava a Jihova mei he kolo o Tevita, aia ko Saione.

2 Bea nae fakataha akinautolu e he kakai tagata kotoabe o Isileli ki he tu‘i ko Solomone, i he fai oe katoaga i he mahina ko Itanime, aia ko hono fitu ia oe mahina.

3 Bea nae ha‘u ae kau mātua kotoabe o Isileli bea nae hiki hake ae buha tabu e he kau taulaeiki.

4 Bea naa nau o hake ae buha tabu a Jihova, bea moe fale fehikitaki oe fakatahaaga, bea moe gaahi nāunāu tabu aia nae i he fale fehikitaki, io nae omi ia e he kau taulaeiki bea moe kau Livai.

5 Bea koe tu‘i ko Solomone, bea moe fakataha kotoabe o Isileli, aia nae fakataha kiate ia, naa nau tutuu moia i he ao oe buha tabu ke feilaulau aki ae faga sibi moe faga bulu, nae ikai faa ilo be lau hono fiha, koe mea i he ene lahi aubito.

6 Bea nae omi ki hono botu ae buha oe fuakava a Jihova e he kau taulaeiki, ki he folofolaaga i he fale, io ki he botu tobutabu aubito, ki he lalo kabakau oe jelubimi.

7 He nae malofa atu ae kabakau e ua oe jelubimi i he botu ki oluga i he buha tabu, bea nae malu‘i ae buha tabu bea mo hono ogo haamo e he jelubimi mei oluga.

8 Bea naa nau fakaamoamo mai ae ogo haamo, koeuhi ke ha atu ae mui haamo i he botu tabu ki mua i he folofolaaga, bea nae ikai ha atu ia kitua: bea oku kei i ai ni o a‘u mai ki he aho ni.

9 Nae ikai ha mea i he buha tabu ka koe ogo maka lafalafa, aia nae ai ki ai e Mosese i Holebi, koe botu nae fai ai e Jihova ae fuakava moe fānau a Isileli, hili e nau hao mai mei he fonua ko Ijibite.

10 Bea nae hoko o behe, i he ene hu mai ae kau taulaeiki ki tua mei he botu tabu, nae fakafonu ae fale o Jihova aki ae ao.

11 Koia nae ikai faa tuu ai ae kau taulaeiki ke fai e nau tauhi, koeuhi koe ao: he nae fakafonu ae fale o Jihova aki ae nāunāu o Jihova.

¶ 12 Bea nae toki lea a Solomone, Nae behe e Jihova te ne nofo i he boulimatolu.

13 Kuou laga mooni ha fale kiate koe ke ke afio ki ai, koe botu tuu mau ke ke afio ki ai o taegata.

14 Bea nae fakanaga mai e he tu‘i a hono fofoga o ne tabuaki ae fakataha kotoabe o Isileli: (bea nae tutuu ki oluga ae fakataha kotoabe o Isileli;)

15 Bea naa ne behe, Fakafetai kia Jihova koe Otua o Isileli aia nae folofola mei hono fofoga ki he eku tamai ko Tevita, bea kuo ne fakamooni ia aki a hono nima, i he ene folofola ni,

16 Talu mei he aho naaku omi ai a hoku kakai ko Isileli mei Ijibite, nae ikai teu fili ha kolo mei he faahiga kotoabe o Isileli ke laga ai ha fale, koeuhi ke tuku ki ai a hoku huafa; ka naaku fili a Tevita ke ne bule ki he eku kakai ko Isileli.

17 Bea nae i he loto o eku tamai ko Tevita ke ne laga ha fale ki he huafa o Jihova koe Otua o Isileli.

18 Bea nae behe e Jihova kia Tevita ko eku tamai, Koeuhiā nae i ho loto ia ke ke laga ha fale ki hoku huafa, nae lelei koe i hoo loto ke fai ia.

19 Ka ne ogo ia e ikai te ke laga ae fale; ka ko ho foha aia e tubu mei ho fatu, e laga eia ae fale ki hoku huafa.

20 Bea kuo fakamooni e Jihova a ene folofola aia naa ne folofola aki, bea kuou tuu hake au i he botu o eku tamai ko Tevita, bea oku ou nofo ki he nofoa fakatu‘i o Isileli, o tatau moe talaofa a Jihova, bea kuou laga ha fale ki he huafa o Jihova koe Otua o Isileli.

21 Bea kuou vahe‘i i ai ha botu ki he buha tabu, aia oku i ai ae fuakava a Jihova aia naa ne fai moe tau gaahi tamai, i he ene omi akinautolu mei he fonua ko Ijibite.

22 Bea nae tuu a Solomone i he ao oe feilaulauaga o Jihova i he ao oe fakataha kotoabe o Isileli, bea naa ne mafao atu a hono nima ki lagi:

23 Bea naa ne behe, E Jihova koe Otua o Isileli, oku ikai ha otua ke hage ko koe, i he lagi i oluga, be i he mama ki lalo ni, akoe oku ke tauhi ae fuakava moe aloofa ki hoo kau tamaioeiki oku eveeva i ho ao aki a ho nau loto kotoa:

24 Akoe kuo ke fai ki hoo tamaioeiki ko Tevita ko eku tamai aia naa ke talaofa aki kiate ia: naa ke folofola aki ia mei ho fofoga, bea kuo ke fakahoko ia aki ho nima, o hage koia he aho ni.

25 Koia foki, E Jihova koe Otua o Isileli, fai ki hoo tamaioeiki ko Tevita ko eku tamai aia naa ke talaofa aki, o behe, E ikai te ke majiva i ha tagata i hoku ao ke nofo ki he nofoa fakatu‘i o Isileli; o kabau e tokaga a hoo fānau ki ho nau aluaga, ke nau eveeva i hoku ao o hage ko hoo eveeva aau i hoku ao.

26 Bea koeni, E Otua o Isileli, oku ou kole kiate koe, tuku ke fakamooni a hoo folofola, aia naa ke folofola aki ki hoo tamaioeiki ko Tevita ko eku tamai.

27 Ka e nofo mooni ae Otua ki he mamani? vakai, koe lagi moe loto lagi ki oluga aubito, oku ikai te ke faa hao ai; kae hua noa ae fale ni aia kuou laga?

28 Ka ne ogo ia ke ke afio lelei ki he lotu a hoo tamaioeiki, bea ki he ene fakakolekole, E Jihova ko hoku Otua, koeuhi ke ke ogo‘i ae tagi bea moe lotu, aia oku lotu aki e hoo tamaioeiki i ho ao he aho ni:

29 Koeuhi ke afio a ho fofoga ki he fale ni i he bo moe aho, io ki he botu aia kuo ke folofola ai o behe, E i ai a hoku huafa: koeuhi ke ke fanogo ki he lotu aia e fai e hoo tamaioeiki i he botu ni.

30 Bea ke fakafanogo ki he fakakolekole a hoo tamaioeiki, bea mo hoo kakai Isileli, oka nau ka lotu i he botu ni: bea ke fanogo ekoe i he lagi ko hoo afioaga: bea oka ke ka fanogo, ke ke fakamolemole.

¶ 31 Kabau e fai ha kovi e ha tagata ki hono kaugaabi, bea oku ne fai ke ne fuakava, bea oku omi ae fuakava ki he ao o hoo feilaulauaga i he fale ni:

32 Ke ke toki fanogo ekoe i he lagi, bea ke gaue, mo fakamāu‘i a hoo kau tamaioeiki, i he totogi ki he agakovi, ke omi ki hono ulu a hono nunua; bea ke fakatonuhia‘i ae maonioni, i he atu kiate ia o tatau mo ene agatonu.

¶ 33 Oka teia hifo a hoo kakai Isileli i he ao o ho nau gaahi fili, koeuhi koe nau fai ha kovi kiate koe, ka kuo nau toe tafoki mai kiate koe, bea nau tabafua a ho huafa, mo hu, bea fai fakakolekole kiate koe i he fale ni:

34 Ke ke toki fanogo ekoe i he lagi, bea fakamolemole ae agahala a hoo kakai Isileli, bea ke toe omi akinautolu ki he fonua aia naa ke foaki ki he e nau gaahi tamai.

¶ 35 Oka tabuni ae lagi, bea oku ikai ha uha e to, koeuhi koe nau fai agahala kiate koe; bea kabau te nau lotu i he botu ni, bea tabafua a ho huafa, bea nau liliu mei he e nau agahala, oka ke ka fakamamahi akinautolu:

36 Ke ke toki fanogo ekoe i he lagi, bea fakamolemole ae agahala a hoo kau tamaioeiki, bea mo hoo kakai Isileli, koeuhi ke ke ako‘i akinautolu i he hala lelei aia oku totonu ke nau alu ai, bea ke foaki ae uha ki ho fonua aia kuo ke foaki ki hoo kakai ko ho nau tofia.

¶ 37 Kabau e ai ha hoge i he fonua, be ha mahaki fakaauha, bea koe huhunu lahi oe goue, be koe fakabobo, be koe he‘e maumau, be koe unufe; kabau e nofo takatakai iateki nautolu a ho nau gaahi fili i he fonua oe nau gaahi veekolo; be koeha ae fakaauha be koe mahaki e i ai;

38 Iloga ae lotu moe kole e fai e ha tagata e toko taha, be e he kakai kotoabe o Isileli, i he ene ilo taki taha e he tagata ae kovi o hono loto oona, bea ne mafao mai a hono nima ki he fale ni:

39 Ke ke toki fanogo ekoe i he lagi ko ho afioaga, bea fakamolemole, bea ke gaue, mo foaki ki he tagata taki taha o fakatatau ki he ene aga, aia oku ke afio‘i a hono loto; (he ko koe, io, ko koe be toko taha, oku ke ilo ae loto oe fānau kotoabe ae tagata;)

40 Koeuhi ke nau manavahe kiate koe i he aho kotoabe te nau moui ai i he fonua aia kuo ke foaki ki he e mau gaahi tamai.

41 Bea koeuhi foki koe muli, aia oku ikai o hoo kakai Isileli, ka kuo ha‘u mei ha fonua mamao koeuhi ko ho huafa oou;

42 (He te nau fanogo ki he ogoogo o ho huafa lahi, bea mo ho nima malohi, bea mo ho nima kuo mafao atu;) oka ha‘u ia ke lotu i he fale ni;

43 Ke ke fanogo ekoe i he lagi ko ho afioaga, bea ke fai o fakatatau moe mea kotoabe oku kole ai e he muli kiate koe: koeuhi ke ilo e he kakai kotoabe o mamani ki ho huafa, ke  nau manavahe kiate koe, o hage ko hoo kakai Isileli; bea koeuhi ke nau ilo oku ui aki a ho huafa ae fale ni aia kuou laga.

¶ 44 Kabau e alu a hoo kakai kitua ke tau‘i a ho nau gaahi fili, be koeha ae botu koia te ke fekau atu akinautolu ki ai, bea nau lotu kia Jihova o haga ki he kolo aia kuo ke fili, bea ki he fale aia kuou laga ki ho huafa:

45 Ke ke toki fanogo ekoe i he lagi ki he e nau lotu moe nau kole, bea ke tokonia akinautolu i he mea totonu.

46 Kabau te nau agahala kiate koe, (he oku ikai ha tagata oku tae ha agahala,) bea te ke houhau kiate kinautolu, mo ke tukuage akinautolu ki he fili, koeuhi ke nau fetuku akinautolu koe kau bobula ki he fonua oe fili, be koe mamao be koe ofi;

47 Bea kabau te nau toe fakatokaga‘i ho nau loto i he fonua koia kuo ave bobula ki ai akinautolu, mo  nau fakatomala, mo fakakolekole kiate koe mei he fonua okinautolu nae ave bobula akinautolu, o nau behe, Kuo mau agahala, bea kuo mau fai talagataa, kuo mau fai ae kovi;

48 Bea behe e nau tafoki mai kiate koe aki a ho nau loto katoa, bea mo ho nau laumalie kotoa, i he fonua o ho nau gaahi fili, aia nae ave bobula akinautolu, bea nau lotu kiate koe o haga ki ho nau fonua, aia naa ke foaki ki he e nau gaahi tamai, ae kolo koia, kuo ke fili, bea moe fale aia kuou laga ki ho huafa:

49 Ke ke toki fanogo ekoe i he lagi ko ho afioaga ki he e nau lotu moe nau kole, bea ke tokonia akinautolu i he mea totonu,

50 Bea ke fakamolemole a hoo kakai aia kuo agahala kiate koe, moe nau fai kovi kotoabe aia kuo nau fai kovi ai kiate koe, bea ke fai aloofa kiate kinautolu i he ao okinautolu nae ave bobula akinautolu, koeuhi ke nau fai ofa kiate kinautolu:

51 He ko hoo kakai akinautolu, bea ko ho tofia, aia naa ke omi mei Ijibite, mei he lotolotoga oe afi tutuaga ukamea:

52 Koeuhi he afio a ho fofoga ki he kole a hoo tamaioeiki, bea ki he kole a hoo kakai Isileli, ke fanogo kiate kinautolu i he mea kotoabe oku nau tabafua ai kiate koe.

53 He naa ke mavahe akinautolu mei he kakai kotoabe oe mamani, ko ho tofia, o hage ko hoo folofola ia Mosese ko hoo tamaioeiki, i hoo omi e mau gaahi tamai mei Ijibite, akoe, E Jihova koe Otua.

54 Bea nae hoko o behe, i he ene fakaoji e Solomone a ene lotu aki ae lotu ni moe kole ni kia Jihova, naa ne tuu hake mei he ao oe feilaulauaga o Jihova, mei he ene tuulutui i hono tui kae mafao a hono nima ki oluga ki he lagi.

55 Bea naa ne tuu hake, o ne tabuaki‘i ae fakataha kotoabe o Isileli aki ae le‘o lahi, o ne behe,

56 Fakafetai kia Jihova, aia kuo ne foaki ae mālōlō ki he ene kakai Isileli, o fakatatau moia kotoabe naa ne talaofa ki ai: kuo ikai ke to noa ha momoi lea e taha o ene talaofa lelei kotoabe, aia naa ne talaofa aki i he nima o ene tamaioeiki ko Mosesi.

57 Ke iate kitautolu a Jihova ko ho tau Otua, o hage ko ene i he e tau gaahi tamai: ke oua naa ne mahui iate kitautolu be jiaki akitautolu:

58 Koeuhi ke ne ue‘i ho tau loto kiate ia, ke alu i hono hala kotoabe, bea ke fai ki he ene gaahi fekau, mo ene tuutuuni, mo ene gaahi fakamāu, aia naa ne fekau ki he e tau gaahi tamai.

59 Bea tuku a eku gaahi lea koeni, aia kuou fai ai eku kole i he ao o Jihova, ke ofi ia kia Jihova ko ho tau Otua i he aho moe bo, koeuhi ke ne tokoni ki he mea totonu a ene tamaioeiki, moe mea totonu a ene kakai Isileli i he kuoga kotoabe, o fakatatau ki he mea oku aoga.

60 Koeuhi ke ilo e he kakai kotoabe o mamani oku Otua a Jihova, bea oku ikai mo ha taha kehe.

61 Koia tuku ke agatonu a ho mou loto kia Jihova ko ho tau Otua, ke alu i he ene gaahi tuutuuni, bea ke fai ene gaahi fekau, o hage koe aho ni.

¶ 62 Bea nae atu ae feilaulau i he ao o Jihova e he tu‘i bea mo Isileli kotoabe moia.

63 Bea nae atu e Solomone ae feilaulau oe gaahi feilaulau fakamelino, aia naa ne atu kia Jihova, koe faga bulu e ua mano moe ua afe, moe faga sibi e taha kilu moe ua mano. Bea nae behe ae fakatabu‘i ae fale o Jihova e he tu‘i bea moe fānau kotoabe a Isileli.

64 Bea koe aho be koia nae fakatabu‘i ai e he tu‘i ae lotoa aia nae i he ao oe fale o Jihova: he naa ne atu i ai ae gaahi feilaulau tutu, moe gaahi feilaulau meakai, bea moe gako oe gaahi feilaulau fakamelino: koeuhi nae jii fau ae feilaulauaga balasa aia nae i he ao o Jihova ke atu ai ae gaahi feilaulau tutu, moe gaahi feilaulau meakai, bea moe gako oe gaahi feilaulau fakamelino.

65 Bea nae fai e Solomone i he kuoga koia ha katoaga, aia mo Isileli katoa, koe fakataha lahi aubito, mei he huaga o Hemati o a‘u ki he vaitafe o Ijibite, i he ao o Jihova ko ho tau Otua, i he aho e fitu moe toe aho e fitu, koe aho e hogofulu ma fa.

66 I hono valu oe aho naa ne fekau ae kakai ke alu: bea naa nau fakafetai ki he tu‘i, bea  naa nau alu ki ho nau gaahi fale i he nekeneka moe loto fiefia koeuhi koe gaue lelei kotoabe aia nae fai e Jihova ma a Tevita ko ene tamaioeiki, bea koeuhi ko Isileli ko ene kakai.