¶ 1 BEA nae hoko o behe, i he ene fakaoji e Solomone ae laga ae fale o Jihova, bea moe fale oe tu‘i, bea moia kotoabe nae holi ki ai a Solomone ke ne fai,

2 Nae ha mai a Jihova kia Solomone ko hono liuga ua, o hage ko ene ha mai kiate ia i Kibione.

3 Bea nae behe e Jihova kiate ia, Kuou ogo‘i a hoo lotu bea mo hoo kole, aia kuo ke fai i hoku ao: kuou fakatabu‘i ae fale ni aia kuo ke laga, ke ai ki ai a hoku huafa o taegata; bea e i ai mau ai be a hoku fofoga bea mo hoku loto.

4 Bea kabau te ke alu i hoku ao, o hage koe alu a Tevita ko hoo tamai, i he loto mooni, moe agatonu, ke fai o fakatatau moia kotoabe kuou fekau kiate koe, bea ke tauhi a eku gaahi tuutuuni mo eku gaahi fakamāu:

5 Behe teu fokotuu mau ae nofoa fakatu‘i o ho buleaga i Isileli ke taegata, o hage ko eku talaofa kia Tevita ko hoo tamai, o behe, E ikai te ke majiva i ha tagata ma ae nofoa fakatu‘i i Isileli.

6 Ka koeuhi kabau te mou momoi liliu atu mei he muimui kiate au, akimoutolu be ko hoo mou fānau, bea ikai te mou tauhi eku gaahi fekau mo eku gaahi tuutuuni aia kuou fokotuu i ho mou ao, ka mou alu o tauhi ae gaahi otua kehe, mo lotu ki ai:

7 Teu toki motuhi ai a Isileli mei he fonua aia kuou foaki kiate kinautolu; bea koe fale ni, aia kuou fakatabu‘i ma a hoku huafa, teu liaki atu mei hoku ao; bea e hoko a Isileli koe manukiaga i he lea fakatātā moe lea fakakovikovi i he lotolotoga oe kakai kotoabe:

8 Bea koe mea i he fale ni, oku maoluga ni, koia kotoabe oku alu ofi ki ai, e ofo ai mo fakaiseisa; bea te nau behe, Koeha kuo fai behe ai e Jihova ki he fonua ni, bea ki he fale ni?

9 Bea te nau tali mai,  o behe, Koeuhi naa nau jiaki a Jihova ko ho nau Otua, aia naa ne omi e nau gaahi tamai mei he fonua ko Ijibite, bea kuo nau buke atu ki he gaahi otua kehe, o lotu ki ai, mo tauhi ki ai: koia kuo omi ai e Jihova ae kovi ni kotoabe kiate kinautolu.

¶ 10 Bea hili ae ta‘u e uofulu nae hoko o behe, hili ae laga e Solomone ae fale e ua, ae fale o Jihova, bea moe fale oe tu‘i,

11 (Ka kuo atu e Helami koe tu‘i o Taia ae gaahi akau koe sita kia Solomone, moe gaahi akau koe baini, bea moe koula, o fakatatau mo ene holi,) nae toki foaki e he tu‘i ko Solomone kia Helami, ae kolo e uofulu i he fonua o Kaleli.

12 Bea nae ha‘u a Helami mei Taia ke ne mamata ki he gaahi kolo nae foaki kiate ia e Solomone; bea nae ikai lelei ia i hono ao.

13 Bea naa ne behe, Koeha ae gaahi kolo ni aia kuo ke foaki kiate au, a hoku kaiga? Bea naa ne fakahigoa ia koe fonua ko Kabuli o a‘u mai ki he gaahi aho ni.

14 Bea nae ave e Helami ki he tu‘i ae taleneti koula e teau moe uofulu.

¶ 15 Bea ko hono uhiga eni oe tukuhau aia nae too e Solomone koe tu‘i; koeuhi ke laga ae fale a Jihova, bea mo hono fale oona, mo Milo, moe a o Jelusalema, mo Hasoa, mo Mekito, bea mo Kesa.

16 He kuo alu hake a Felo koe tu‘i o Ijibite o ne kaba a Kesa, mo ne tutu ia aki ae afi, mo tamate‘i ae kakai Kenani nae nofo i he kolo, bea ne foaki ia koe mea ofa ki hono ofefine, koe unoho o Solomone.

17 Bea nae laga a Kesa e Solomone, bea mo Bete‐holoni ki lalo,

18 Mo Bealati, bea mo Tatimoa i he toafa, i he fonua,

19 Bea moe gaahi kolo tukuga koloa aia nae ma‘u e Solomone, moe gaahi kolo ma a ene gaahi jaliote, moe gaahi kolo ma a ene kau tagata heka hose, bea moia nae fie laga e Solomone i Jelusalema, bea i Lebanoni, bea i he fonua kotoabe o hono buleaga.

20 Koe kakai kotoabe oe toega kakai Amoli, moe kakai Heti, moe kakai Belesi, moe kakai Hevi, moe kakai Jebusi, akinautolu nae ikai oe fānau a Isileli,

21 Moe nau fānau nae toe i he fonua ki mui iateki nautolu, aia nae ikai faa fakaauha foki e he fānau a Isileli, ko kinautolu ia nae ma‘u mei ai e Solomone ae tukuhau i he gaue fakahoboate o a‘u mai ki he aho ni.

22 Ka nae ikai fakahoboate e Solomone ha toko taha i he fānau a Isileli: ka koe kau tau akinautolu, mo ene kau tamaioeiki, bea mo ene houeiki, mo ene kau bule  ki he tau, moe kau bule ki he ene gaahi jaliote, bea mo ene kau tagata heka hose.

23 Ko kinautolu nae tuu ki mua i he kau bule nae bule‘i ae gaue kia Solomone, koe toko nimageau ma nimagofulu, bea naa nau bule ki he kakai nae fai ae gaue.

¶ 24 Ka nae alu hake ae ofefine o Felo mei he kolo o Tevita ki hono fale oona aia nae laga moona: bea hili ia naa ne laga a Milo.

¶ 25 Bea nae tuo tolu i he ta‘u ae atu e Solomone ae gaahi feilaulau tutu moe feilaulau fakamelino i he feilaulauaga aia naa ne fokotuu kia Jihova, bea naa ne tutu ae mea namu kakala ki he fuga feilaulauaga aia nae i he ao o Jihova. Bea nae behe ae fakaoji ae fale.

¶ 26 Bea nae teuteu e he tu‘i ko Solomone ha folau oe gaahi vaka mei Esioni‐keba, aia oku vaofi mo Eloti, i he matātahi oe Tahi Kulokula, i he fonua ko Itomi.

27 Bea nae fekau atu e Helami a ene kau tamaioeiki i he folau, koe kau toutai nae boto i tahi, ke nau alu moe kau tamaioeiki a Solomone.

28 Bea naa nau hoko atu ki Ofeli, o nau taufetuku mei ai ae koula, koe taleneti e fageau moe uofulu, o  nau omi ia ki he tu‘i ko Solomone.