¶ 1 BEA hili eni nae hoko o behe, nae ia Abisalomi koe foha o Tevita, ae tuofefine nae hoihoifua, bea ko Tamaa a hono higoa; bea nae mamana kiate ia a Amanoni koe foha o Tevita.

2 Bea koe mea i he ene feiga mamahi a Amanoni, naa ne hoko o mahakiia koeuhi ko hono tuofefine ko Tamaa; he koe tāuboou ia; bea koe mea fifiligataa kia Amanoni haane fai ha mea kiate ia.

3 Ka nae ai ae kaumea a Amanoni, nae higoa ko Jonatabi, koe foha o Simia koe kaiga o Tevita: bea koe tagata kākā aubito a Jonatabi.

4 Bea naa ne behe kiate ia, Koe foha koe oe tu‘i, bea koeha oku behe ai ho tutue i he aho kotoabe? ikai te ke tala mai kiate au? Bea nae behe e Amanoni kiate ia, Oku ou ofa kia Tamaa, koe tuofefine o Abisalomi ko hoku tokoua.

5 Bea nae behe e Jonatabi kiate ia, Tokoto hifo koe ki ho mohega, bea ke behe oku ke mahaki: bea oka ha‘u hoo tamai ke mamata kiate koe, te ke behe kiate ia, Oku ou kole kiate koe, tuku ke ha‘u a hoku tuofefine ko Tamaa, ke ne omi eku mea kai, bea ne teuteu eku mea kai i hoku ao, koeuhi keu mamata ki ai, bea kai ia mei hono nima.

¶ 6 Koia nae tokoto ai a Amanoni, o ne behe kuo ne mahaki: bea i he ene ha‘u ae tu‘i ke mamata kiate ia, nae behe e Amanoni ki he tu‘i, Oku ou kole kiate koe, tuku ke ha‘u a Tamaa ko hoku tuofefine, ke ne gaohi ha foi ma e ua i hoku ao, koeuhi keu kai ia mei hono nima.

7 Bea nae fekau ai e Tevita ki he fale o Tamaa, o behe, Alu leva ni ki he fale o Amanoni ko ho tuogaane, bea teuteu haane mea kai.

8 Koia nae alu ai a Tamaa ki he fale o Amanoni ko hono tuogaane; ka kuo tokoto hifo ia. Bea nae too eia ae mahoaa, bea ne natu ia, bea naa ne gaohi ae gaahi foi ma i hono ao, bea naa ne ta‘o ae gaahi foi ma.

9 Bea naa ne too mai ha ibu o ne liligi ia i hono ao: ka nae ikai loto ia ke kai. Bea nae behe e Amanoni, Tuku kitua ae kau tagata kotoabe meiate au. Bea naa nau alu kotoabe kitua meiate ia.

10 Bea nae behe e Amanoni kia Tamaa Omi ae meakai ki loto fale, koeuhi keu kai  ia mei ho nima. Bea nae hiki e Tamaa ae gaahi foi ma naa ne gaohi, o ne omi ia ki loto fale kia Amanoni ko hono tuogaane.

11 Bea i he ene omi ia kiate ia ke ne kai, naa ne buke ia, o ne behe ki ai, Ha‘u hoku tuofefine ke ta mohe mo au.

12 Bea naa ne beheage eia, E ikai, a hoku tuogaane, oua naa ke fakamā‘i au; he oku ikai totonu ke fai ha mea behe i Isileli: oua naa ke fai ae vale ni.

13 Bea ko au, teu tuku ke alu kife a hoku fakamā? bea ko koe, te ke hage koe ko ha taha oe kau vale i Isileli. Koia foki, oku ou kole kiate koe, ke ke lea ki he tu‘i; he koeuhi e ikai te ne taofi au meiate koe.

14 Ka ne ogo eni nae ikai fie tokaga ia ki he ene lea: bea koe mea i he ene malohi lahi iate ia, naa ne tohotoho‘i ia, bea mohe moia.

¶ 15 Bea hili ia nae fehia aubito kiate ia a Amanoni; koia nae lahi hake ai ae fehia naa ne fehia aki kiate ia, i he ofa aia naa ne ofa ai kiate ia. Bea nae behe e Amanoni kiate ia, Tuu hake, bea ke alu.

16 Bea naa ne behe kiate ia, Oku ikai hano uhiga: oku lahi hake ae kovi ni o hoo fekau‘i au ke alu, i he mea e taha kuo ke fai kiate au. Ka nae ikai aubito fanogo ia kiate ia.

17 Bea naa ne toki ui ki he ene tamaioeiki aia nae talifekau kiate ia, o ne behe, Kabuji atu leva ae  fefine ni meiate au, bea sogo ae mataba kiate ia.

18 Bea nae fakakofu aki ia ae kofu bulebule: he koe aga ia oe kofu nae kofu aki ae gaahi ofefine oe tu‘i aia nae tāuboou. Bea hili ia nae omi ia kitua e he ene tamaioeiki, bea ne sogo ae mataba kiate ia.

¶ 19 Bea nae bani aki e Tamaa a hono ulu ae efuefu, bea naa ne haehae a hono kufu bulebule aia naa ne kofu aki, bea naa ne ai hono nima ki hono ulu, bea naa ne alu be mo tagi.

20 Bea nae behe e Abisalomi ko hono tuogaane kiate ia, Kuo ala  koa a Amanoni ko ho tuogaane kiate koe? ka koeni a hoku tuofefine ke ke logo be; he ko ho tuogaane ia; oua naa ke tokaga ki he mea ni. Koia nae nofo mamahi be a Tamaa i he fale o hono tuogaane ko Abisalomi.

¶ 21 Ka i he ene fanogo a Tevita koe tu‘i ki he gaahi mea ni, nae houhau aubito ia.

22 Bea nae ikai ke momoi lea a Abisalomi ki hono tokoua ko Amanoni i he lelei be koe kovi: he nae fehia a Abisalomi kia Amanoni, koeuhi ko ene tohotoho‘i a hono tuofefine.

¶ 23 Bea hili ae ta‘u katoa e ua nae hoko o behe, nae ma‘u e Abisalomi ae kau tagata koji‐sibi i Beali‐hasoa, aia oku ofi ki Ifalemi; bea nae talaki ki ai ae gaahi foha kotoabe oe tu‘i.

24 Bea nae ha‘u a Abisalomi ki he tu‘i, o ne behe, Vakai eni, kuo i hoo tamaioeiki ae kau tagata koji‐sibi; oku ou kole kiate koe, ke mea ae tu‘i bea mo ene kau tamaioeiki ke alu mo ho tamaioeiki.

25 Bea nae behe e he tu‘i kia Abisalomi, E ikai, hoku foha, oua naa tau alu eni kotoabe, telia naa mau fakamafajia kiate koe. Bea naa ne kole malohi kiate ia; bea nae ikai te ne alu mo ia, ka naa ne tabuaki‘i ia.

26 Bea nae toki behe ai e Abisalomi, Ka kuo ikai, bea oku ou kole kiate koe, tuku ke alu a Amanoni mo kimautolu. Bea nae behe e he tu‘i kiate ia, Koeha ka alu ai ia mo koe?

27 Ka nae kole fakamatoato e Abisalomi, ke ne tuku a Amanoni bea moe gaahi foha kotoabe oe tu‘i ke alu mo ia.

¶ 28 Ka koeni, kuo oji hono tala e Abisalomi ki he ene kau tamaioeiki, o behe, Mou vakai oka fiefia ae loto o Amanoni i he uaine, bea kau ka behe eau kiate kimoutolu, Ta‘i a Amanoni; mou toki tamate‘i ia, oua naa manavahe; ikai kuou fekau e au kiate kimoutolu? mou loto to‘a bea fai malohi.

29 Bea nae fai e he kau tamaioeiki a Abisalomi kia Amanoni o hage koia nae fekau e Abisalomi. Bea nae tuu hake ai ae gaahi foha oe tu‘i, bea nae taki taha heka ae tagata ki he ene miuli bea hola.

¶ 30 Bea nae hoko o behe, lolotoga e nau i he hala, nae omi ae ogoogo ki Tevita, o behe, Kuo tamate‘i e Abisalomi ae gaahi foha kotoabe oe tu‘i, bea oku ikai toe ha toko taha o kinautolu.

31 Bea nae tuu hake ai ae tu‘i bea ne haehae a hono gaahi kofu, bea ne to hifo ki he fuga kelekele; bea nae tutuu ofi ai a ene kau tamaioeiki kotoabe bea kuo haehae a ho nau gaahi kofu.

32 Bea ko Jonatabi koe foha o Simia koe tokoua o Tevita, nae tali eia o ne behe, Ke oua naa mahalo e hoku eiki kuo nau tamate‘i ae kau talavou kotoabe koe gaahi foha oe tu‘i; he ko Amanoni be toko taha kuo mate; he kuo fakababau ae mea ni mei he gutu o Abisalomi talu mei he aho nae tohotoho ai a Tamaa ko hono tuofefine.

33 Koia foki ke oua naa mamahi fau ae loto o hoku eiki koe tu‘i, ke ne mahalo kuo mate ae gaahi foha kotoabe oe tu‘i: he ko Amanoni be toko taha kuo mate.

34 Ka nae hola a Abisalomi. Bea nae haga hake e he tagata talavou aia nae nofo ke leo, bea ne jio, bea vakai, nae ha‘u ae kakai toko lahi i he hala i he tafaaki mouga ki mui iate ia.

35 Bea nae behe e Jonatabi ki he tu‘i Vakai, oku ha‘u ae gaahi foha oe tu‘i: o hage koia nae lea aki e hoo tamaioeiki.

36 Bea nae hoko o behe, i he ene fakaoji leva eia a ene lea, vakai, nae hoko mai ae gaahi foha oe tu‘i bea naa nau hiki hake ho nau le‘o o tagi: bea nae tagi lahi aubito foki ae tu‘i bea mo ene kau tamaioeiki kotoabe.

¶ 37 Ka nae hola a Abisalomi, o ne alu kia Talimei, koe foha o Amihuti koe tu‘i o Kesuli. Bea nae loto mamahi  a Tevita i he aho kotoabe koeuhi ko hono foha.

38 Koia, nae hola a Abisalomi, o ne alu ki Kesuli, bea naa ne i ai i he ta‘u e tolu.

39 Bea nae holi tuu be a Tevita ke ne alu atu kia Abisalomi: he kuo fakafiemalie‘i ia ia Amanoni, koeuhi ko ene bekia.