¶ 1 BEA nae fakaha kia Joabe, Vakai, oku tagi mo mamahi ae tu‘i koeuhi ko Abisalomi.

2 Bea koe fakamoui oe aho koia nae liliu ia koe fakamamahi ki he kakai kotoabe: he nae fanogo e he kakai i he aho koia ki he mamahi oe tu‘i koeuhi ko hono alo.

3 Bea i he aho koia nae alu fakatoitoi be ae kakai ki he kolo, o hage koe alu fakatoitoi ha kakai i he  e nau ma oka nau ka feholataki i he tau.

4 Ka nae ufiufi e he tu‘i a hono fofoga, bea nae tagi aki e he tu‘i ae le‘o lahi, Oiaue, a hoku foha ko Abisalomi, Oiaue Abisalomi, ko hoku alo, ko hoku alo!

5 Bea nae ha‘u a Joabe ki loto fale ki he tu‘i, o ne behe, Kuo ke fakama‘i he aho ni ae mata kotoabe o hoo kau tamaioeiki, aia kuo fakahaofi a hoo moui he aho ni, moe moui a hoo gaahi foha mo hoo gaahi ofefine, moe moui a hoo gaahi unoho, moe moui a hoo kau jinifu;

6 Koe mea i hoo ofa ki ho gaahi fili, ka kuo ke fehia ki ho kaiga. He kuo ke fakaha he aho ni oku ikai mahuiga kiate koe ae houeiki be koe kau tamaioeiki: he oku ou mamata he aho ni, ka ne moui be a Abisalomi, ke mau mate kotoabe akimautolu he aho ni, behe kuo ke lelei ai.

7 Koia foki, tuu hake, bea alu atu, bea lea fakafiemalie ki he loto o hoo kau tamaioeiki: he oku ou fuakava ia Jihova kiate koe, kabau e ikai te ke alu atu, e ikai toe kiate koe ha toko taha i he bo ni: bea e kovi lahi hake ia i he kovi kotoabe kuo hoko mai kiate koe talu mei hoo kei jii o a‘u ki he aho ni.

8 Bea nae toki tuu hake ai ae tu‘i, o ne afio i he mataba. Bea naa nau fakaha ki he kakai kotoabe, o behe, Vakai, kuo afio ae tu‘i i he mataba. Bea nae ha‘u ae kakai kotoabe ki he ao oe tu‘i: he kuo hola ae kau tagata kotoabe o Isileli taki taha ki hono fale fehikitaki.

¶ 9 Bea nae fekeikei ae kakai kotoabe i he gaahi faahiga o Isileli kotoabe, o febeheaki, Nae fakamoui akitautolu e he tu‘i mei he nima o ho tau gaahi fili, bea naa ne fakahaofi akitautolu mei he nima oe kau Filisitia; bea kuo ne hola eni mei he fonua koeuhi ko Abisalomi.

10 Bea ko Abisalomi aia naa tau fakanofo kiate kitautolu, kuo mate i he tau. Bea koia foki koeha oku mou taelea ai ke toe omi ae tu‘i?

¶ 11 Bea nae fekau e he tu‘i ko Tevita kia Satoki mo Abiata koe ogo taulaeiki, o ne behe, Mo lea ki he mātua o Juta, o behe, Koeha oku mou tomui ai i he toe omi ae tu‘i ki hono fale? ka kuo ba mai ae lea a Isileli kotoabe ki he tu‘i ki hono fale.

12 Ko hoku kaiga akimoutolu, ko hoku hui mo hoku kakano akimoutolu: koia koeha oku mou tomui ai i he toe omi ae tu‘i?

13 Bea mo behe atu kia Amasa, Ikai oku ke o hoku hui, bea o hoku kakano? Ke fai behe e he Otua kiate au o lahi hake foki, o kabau e ikai te ke eiki koe ke he kau tau i hoku ao mau ai be, koe fetogi o Joabe.

14 Bea naa ne ue‘i ae loto oe kakai kotoabe o Juta, o hage kuo  nau taha be; koia ne nau ave ai ae lea ni ki he tu‘i, Ke ke foki mai akoe, bea mo hoo kau tamaioeiki kotoabe.

15 Koia nae foki mai ae tu‘i, o ne ha‘u ki Joatani. Bea nae ha‘u akinautolu o Juta ki Kilikali, ke fakafetaulaki atu ki he tu‘i, bea ke omi ae tu‘i ki he kau vai e taha o Joatani.

¶ 16 Bea ko Simi koe foha o Kela, koe tagata Benijimani, aia nae o Bahulimi, naa ne alu fakatootoo hifo moe kau tagata o Juta ke fetaulaki moe tu‘i ko Tevita.

17 Bea nae alu moia ae kau tagata Benijimani e toko taha afe, bea mo Siba koe tamaioeiki mei he fale o Saula, bea mo hono foha oona e toko hogofulu ma toko nima, bea mo ene kau tamaioeiki e toko uofulu; bea naa nau muomua atu i he tu‘i i he ene aa i Joatani.

18 Bea nae alu foki ae vakafokotuu ke fetukutuku ai ae kaugaabi oe tu‘i, bea ke fai ha mea nae behe eia ke fai. Bea nae to hifo a Simi koe foha o Kela i he ao oe tu‘i i he ene laka mai mei Joatani;

19 O ne behe ki he tu‘i, Oua naa tuku ha hia kiate au e hoku eiki, bea oua foki naa ke manatu‘i ae mea nae fai agatuu ai e hoo tamaioeiki i he aho koia nae alu atu ai a hoku eiki koe tu‘i mei Jelusalema, ke mamahi ai ae loto oe tu‘i.

20 He oku ilo‘i e hoo tamaioeiki kuou fai agahala: bea koia foki kuou ha‘u keu muomua mai he aho ni i he fale kotoabe o Josefa keu hoko mai ke fakafetaulaki ki hoku eiki koe tu‘i.

21 Ka nae beheage e Abisai koe tama a Seluia, Ikai e tamate‘i a Simi koeuhi koe mea ni, koeuhi ko ene lea kabekabe kiate ia kuo bani aki ae lolo e Jihova?

22 Bea nae behe e Tevita, Koeha akimoutolu kiate au, akimoutolu ae gaahi tama o Seluia, ke mou hoko ai koe gaahi fili kiate au he aho ni? he e tamate‘i ha toko taha i Isileli i he aho ni? he oku ikai teu ilo koa kuou tu‘i au he aho ni ki Isileli?

23 Koia nae behe ai e he tu‘i kia Simi, E ikai te ke mate. Bea nae fuakava e he tu‘i kiate ia.

¶ 24 Bea nae alu hifo a Mifiboseti koe foha o Saula ke fetaulaki moe tu‘i, bea nae ikai ke kaukau hono va‘e, be teuteu‘i hono kava, be fo hono gaahi kofu, talu mei he aho koia nae alu atu ai ae tu‘i, o a‘u ki he aho naa ne toe ha‘u ai i he melino.

25 Bea nae hoko o behe, i he ene hoko mai ki Jelusalema ke fetaulaki moe tu‘i, nae behe e he tu‘i kiate ia, E Mifiboseti, koeha nae ikai te ta o ai mo au?

26 Bea nae beheage eia, E hoku eiki, koe tu‘i, nae kākā‘i au e hoku tamaioeiki: he nae behe e hoo tamaioeiki, Teu ai ha hekaaga ki he asi, koeuhi keu heka ai o alu ki he tu‘i; koeuhi oku ketu a hoo tamaioeiki.

27 Bea kuo ne lauikovi‘i a hoo tamaioeiki ki hoku eiki koe tu‘i; ka oku tatau a hoku eiki koe tu‘i mo ha agelo ae Otua: koia ke ke fai aia oku matamata lelei kiate koe.

28 He ko kinautolu kotoabe oe fale o eku tamai, koe kau mate akinautolu i he ao o hoku eiki koe tu‘i: ka ne ogo ia naa ke fakanofo a hoo tamaioeiki  ke au i he haohaoga okinautolu nae kai mei ho keinagaaga oou. Koia foki e totonu fefe a eku toe tagi ki he tu‘i?

29 Bea nae behe e he tu‘i kiate ia, Koeha oku ke kei lea ai ki hoo gaahi mea aau? Kuo oji eku lea, Ke mo vaheua mo Siba ae fonua.

30 Bea nae beheage e Mifiboseti ki he tu‘i, Tuku ke ne ma‘u kotoabe maana, koeuhi kuo toe hoko mai a hoku eiki koe tu‘i ki hono fale oona i he melino.

¶ 31 Bea nae alu hifo a Basilai koe tagata Kiliati mei Lokelimi, bea nae alu atu ia moe tu‘i ki he kauvai o Joatani, ke ne fakaaa atu ia i Joatani.

32 Ka koeni nae motua lahi aubito a Basilai, he nae valugofulu a hono ta‘u: bea naa ne tokonaki meakai ma ae tu‘i lolotoga a ene nofo i Mehanemi; he koe tagata eiki lahi ia.

33 Bea nae behe e he tu‘i kia Basilai, Ha‘u koe ke ta aa atu mo au, bea teu fafaga‘i koe mo au i Jelusalema.

34 Bea nae behe e Basilai ki he tu‘i, He oku toe fiha ae gaahi aho o eku moui, koeuhi keu alu hake ai moe tu‘i ki Jelusalema?

35 Oku ou valugofulu ta‘u he aho ni: bea oku ou faa fai koa ke fifili ki he mea oku lelei moia oku kovi? he oku faa ifoifo e hoo tamaioeiki aia oku ou kai be koia oku ou inu? bea oku ou kei faa ogo‘i koa ae le‘o oe kau tagata faji hiva moe kau fefine faji hiva? bea ka kuo behe, koeha hono aoga oe hoko a hoo tamaioeiki koe fakamafajia be ki hoku eiki koe tu‘i?

36 E alu mamao jii atu be a hoo tamaioeiki moe tu‘i ki he kau vai e taha o Joatani: bea koeha hono uhiga oe totogi kiate au e he tu‘i i ha totogi behe fau?

37 Oku ou kole kiate koe, tuku a hoo tamaioeiki ke toe foki ki mui, koeuhi keu mate i hoku kolo ooku, o ofi ki he faitoka o eku tamai bea mo eku fa‘e. Kae vakai, ko hoo tamaioeiki ko Kimami; tuku ke alu atu ia mo hoku eiki koe tu‘i; bea ke fai kiate ia aia oku lelei i ho ao.

38 Bea nae beheage e he tu‘i, E alu atu mo au a Kimami, bea teu fai kiate ia aia te ke loto koe ki ai: bea koia kotoabe oku ke loto mai keu fai, teu fai ia maau.

39 Bea nae aa atu ae kakai kotoabe i Joatani. Bea hili ae lava atu ae tu‘i, nae uma e he tu‘i kia Basilai, mo ne tabuaki‘i ia; bea nae toe foki atu ia ki hono botu oona.

¶ 40 Hili ia nae mole atu ae tu‘i ki Kilikali, bea nae alu atu moia a Kimami: bea nae fakafeao ki he tu‘i ae kakai kotoabe o Juta, bea mo hono vaheua oe kakai o Isileli.

41 Bea vakai, nae ha‘u ki he tu‘i ae kau tagata kotoabe o Isileli, o nau behe ki he tu‘i, Koeha kuo ave fakakaihaa ai koe e ho mau kaiga koe kau tagata o Juta, bea kuo nau omi ekinautolu ae tu‘i, bea mo hono kauga nofoaga, bea moe kau tagata kotoabe o Tevita, ki he kauvai ni o Joatani?

42 Bea nae tali e he kau tagata kotoabe o Juta ki he kau tagata Isileli,  o behe, Koeuhi ko ho mau kaiga ofi lahi ae tu‘i: koia koeha oku mou ita ai i he mea ni? he kuo mau kai mei he mea kai ae tu‘i? be kuo ne omi ha koloa kiate kimautolu?

43 Bea nae leaage e he kau tagata Isileli ki he kau tagata Juta, o behe, Oku mau ma‘u ae vahe e hogofulu i he tu‘i, bea oku totonu lahi hake e mau kau kia Tevita iate kimoutolu: koia koeha kuo mou baetaku ai kiate kimautolu i he ikai tomua kumi e mau lea amautolu ki he toe omi a ho mau tu‘i? Bea nae malohi hake ae gaahi lea ae kau tagata Juta i he gaahi lea nae fai e he kau tagata Isileli.