¶ 1 BEA i he fanogo e he foha o Saula kuo mate a Abina i Hebeloni, nae vaivai ai hono nima, bea nae bubutuu ai ae kakai Isileli kotoabe.

2 Bea nae i he foha o Saula ae ogo tagata nae bule ki he mataga tau; koe higoa oe toko taha ko Baana, bea koe higoa oe taha ko Lekabi, koe ogo foha o Limoni i he kakai Biheloti, i he fānau a Benijimani: (he nae lau fakataha a Biheloti mo Benijimani:

3 Bea nae hola ae kakai Biheloti ki Kiteimi, bea naa nau aunofo ai o a‘u ki he aho ni.)

4 Bea nae ia Jonatane, koe foha o Saula, ae foha nae ketu. Nae nima ta‘u ia i he ba mai ae ogoogo ia Saula mo Jonatane mei Jesilili, bea nae too hake ia e he fefine nae tauhi kiate ia, o ne hola: bea behe, lolotoga a ene fai fakatootoo ke hola, naa ne higa o ne ketu ai. Bea ko hono higoa ko Mifiboseti.

5 Bea nae alu ae ogo foha o Limoni koe tagata Biheloti, ko Lekabi mo Baana, o na omi ki he fale o Isiboseti o feouga moe bubuha oe aho, bea nae tokoto ia i ha mohega i he hoata.

6 Bea naa na hu atu ki loto fale, o hage te na fai ke fetuku ha uite: bea naa na hoka‘i ia i hono fatafata: bea nae hola o hao a Lekabi mo Baana ko hono tokoua.

7 He koeuhi i he e na hu atu ki fale, naa ne tokoto ki hono mohega i hono loki, bea naa na ta‘i ia, o tamate‘i, o na tutuu hono ulu, o na ave hono ulu, bea naa na hola i he toafa i he bo kotoa koia.

8 Bea naa na omi ae ulu o Isiboseti kia Tevita i Hebeloni, o na behe ki he tu‘i Vakai, koe ulu eni o Isiboseti koe fona o Saula, ko ho fili, aia nae kumi ki hoo moui; bea kuo fai e Jihova ae totogi ki he eku eiki koe tu‘i he aho ni, ia Saula, bea mo hono hako.

¶ 9 Bea nae tali e Tevita kia Lekabi mo Baana ko hono tokoua, koe ogo foha o Limoni koe tagata Biheloti, o ne behe ki ai, O hage oku moui a Jihova, aia kuo ne huhui hoku laumalie mei he kovi kotoabe,

10 I hono fakaha mai e he toko taha kiate au, o behe, Vakai, kuo bekia a Saula, ko ene behe koe ogoogolelei kuo ne omi, naaku buke ia, beau tamate‘i ia i Sikilaki, ka naa ne mahalo teu atu ha totogi lelei koeuhi ko ene ogoogo:

11 Kae hua noa eni, i he tamate‘i e he kau tagata kovi ha toko taha taehalaia i hono fale oona, bea i hono mohega? Ikai eni teu eke a hono toto mei ho mo nima, bea ave akimoua mei he fuga kelekele.

12 Bea nae fekau e Tevita ki he ene kau talavou, bea naa nau tamate‘i akinaua, bea nae tutuu ho na nima, bea mo ho na va‘e bea nae tautau ai i he fuga anovai i Hebeloni. Ka naa nau ave ae ulu o Isiboseti, o tanu ia i he faitoka o Abina i Hebeloni.