Ko Hono Ua oe Tohi O Samuela

¶ 1 BEA hili ae mate a Saula, bea kuo liu mai a Tevita mei he ene ta‘i ae kakai Amaleki, bea kuo hili ae aho e ua mo ene nofo a Tevita i Sikilaki;

2 Bea i he hoko ki hono tolu oe aho, vakai, nae ha‘u ha tagata mei he tau a Saula, kuo mahaehae hono kofu, bea bani efu hono ulu, bea i he ene hoko atu kia Tevita, naa ne to hifo ki he kelekele, mo ne fai fakaabaaba.

3 Bea nae behe e Tevita kiate ia, Oku ke ha‘u mei fe? Bea naa ne behe kiate ia, Kuou hao mei he nofoaga tau o Isileli.

4 Bea nae behe e Tevita kiate ia, Koeha ha mea nae fai? Oku ou kole ke ke fakaha mai kiate au. Bea nae beheage eia, Kuo hola ae kakai mei he tau, bea kuo to ae kakai toko lahi o mate; bea kuo bekia a Saula mo Jonatane ko hono foha foki.

5 Bea nae behe e Tevita ki he tagata talavou nae lea mai, Nae fefe hoo ilo ekoe kuo mate a Saula bea mo Jonatane ko hono foha?

6 Bea nae behe mai e he tagata talavou nae tala ia kiate ia, Iloage naaku hoko atu ki he mouga ko Kiliboa, bea vakai, nae faaki a Saula ki hono tao; bea vakai nae tuli malohi kiate ia ae gaahi jaliote moe kau heka hose.

7 Bea i he ene jio ki mui, naa ne mamata kiate au, o ne ui kiate au. Bea naaku behe eau, Ko au eni.

8 Bea naa ne behe mai kiate au, Kohai koe? Bea naaku behe kiate ia, Koe tagata Amaleki au.

9 Bea naa ne toe behe mai kiate au, Oku ou kole kiate koe, ke ke tuu hake kiate au o tamate‘i au: he oku ou mamahi aubito, koeuhi oku kei malohi eku moui iate au.

10 Koia neu tuu ki ai, o tamate‘i ia, koeuhi naaku ilo bau e ikai te ne toe moui mei he ene to ki lalo aubito: bea naaku too ae tatā fakatu‘i mei hono ulu, moe vesa mei hono nima, bea kuou omi ia ki heni ki hoku eiki.

11 Ka nae toki buke e Tevita ki hono gaahi kofu o ne haehae ia; bea nae fai behe foki ae kau tagata kotoabe nae iate ia:

12 Bea naa nau mamahi mo tagi, mo aukai o a‘u ki he bouli, koeuhi ko Saula, bea mo Jonatane ko hono foha, bea koeuhi koe kakai a Jihova, bea moe fale kotoa o Isileli; koeuhi koe to hifo akinautolu i he heleta.

¶ 13 Bea nae behe e Tevita ki he tagata talavou nae omi ae ogoogo, Oku ke meife koe? Bea naa ne beheage, Koe foha au oe muli, koe Amaleki.

14 Bea nae behe e Tevita kiate ia, Koeha ia nae ikai te ke manavahe ai ke ala atu ho nima ke tamate‘i aia nae fakatabu‘i e Jihova?

15 Bea nae fekau atu e Tevita ki ha taha oe kau talavou, o ne behe, Unuunu atu o ta‘i ia. Bea naa ne ta‘i ia ke ne mate.

16 Bea nae behe e Tevita kiate ia, Ke i ho ulu be oou ho toto; he kuo fakamooni e ho gutu kiate koe, o behe, Kuou tamate‘i aia nae fakatabu‘i e Jihova.

17 Bea nae tegihia e Tevita a Saula, bea mo hono foha ko Jonatane, i he tagilāulāu koeni:

18 (Naa ne fekau foki ke nau ako‘i ae fānau a Juta ke gaue aki ae kaufana: vakai kuo tohi ia i he tohi a Jesa.)

19 Kuo tamate‘i ae toulekeleka o Isileli i hoo gaahi botu maoluga: oiaue, kuo higa ae kau tagata malohi!

20 Oua naa tala ia i Kati, oua naa fakaha ia i he gaahi hala o Asikeloni; telia naa fiefia ai ae gaahi ofefine oe kakai Filisitia, bea telia naa bolebole ai ae gaahi ofefine okinautolu oku taekamu.

21 Ae gaahi mouga o Kiliboa, ke oua naa ai ha hahau, be ha uha e to hifo kiate koe, be  iate koe ha goueaga oe feilaulau: koeuhi kuo liaki kovi i ai ae ba oe malohi, ae ba o Saula, o hage be nae ikai ke fakatabu‘i ia aki ae lolo.

22 Nae ikai foki mai ae kaufana e Jonatane mei he toto okinautolu nae tamate‘i, mei he jino oe kau malohi, bea nae ikai foki noa mai ae heleta a Saula.

23 Nae toulekeleka mo lelei a Saula mo Jonatane i he e na moui, bea nae ikai mavae akinaua i he e na mate: naa na vee vave hake i he faga ikale, naa na malohi lahi hake i he faga laione.

24 Ae gaahi ofefine o Isileli, mou tegihia a Saula aia naa ne fakakofu‘i akimoutolu i he kulaahoaho, moe mea oe manako, aia naa ne ai ki hoo mou kofu ae teuga oe koula.

25 Oiaue, ae higa ki lalo ae kau malohi i he lotolotoga oe tau! E Jonatane nae tamate‘i koe i he gaahi botu maoluga oou.

26 Kuou mamahi koeuhi ko koe, e hoku kaiga ko Jonatane: naa ke lelei fau kiate au: nae fakamanavahe hoo ofa kiate au, o lahi hake i he ofa ae kau fefine.

27 Oiaue, he kuo to ki lalo ae kau malohi, kuo fakaauha ae gaahi mahafu oe tau!