¶ 1 BEA koeni, koe gaahi lea fakamuimui eni a Tevita. Nae behe e Tevita koe foha o Jese, bea nae lea o behe e he tagata nae hiki hake ke maoluga, koia nae bani e he Otua o Jekobe, bea behe eia nae faji malie i Isileli,

2 Nae folofola iate au ae Laumalie o Jihova, bea ko ene folofola nae i hoku elelo.

3 Nae behe e he Otua o Isileli, nae folofola mai kiate au ae Makatuu a Isileli, Ke ke bule koe ki he kakai i he agatonu, o bule i he manavahe ki he Otua.

4 Ke tatau ia moe māma oe bogibogi, oka hobo hake ae laa, i he bogibogi oku ikai ai ha gaahi ao; bea hage koe mohuku mauiui oku  tubu mei he kelekele aia oku gigila lelei oka oji ae to ae uha.

5 Ne ogo oku ikai behe a hoku fale ki he Otua, ka kuo ne fai mo au ha fuakava taegata, kuo tuutuuni lelei i he mea kotoabe mo mau: bea koia kotoabe teu moui ai, moia kotoabe oku ou holi ki ai, ikai te ne gaohi ia ke tubu?

6 Ka e tatau aia kotoabe oku oe agakovi moe talatala‘i akau oku teke‘i atu, koeuhi oku ikai faa buke aki ia ae nima:

7 He koe tagata e ala ki ai oku lelei ke ne mahafu aki ae ukamea moe kau oe tao; bea e tutu aki ae afi ke auha malie akinautolu i he botu  be koia.

¶ 8 Koe higoa eni oe kau tagata malohi aia nae ia Tevita: ko Josebi-bosibati mei Takimoni, koe tuu ki mua i he eiki e toko tolu; koia foki ko Atino koe Hasinate: naa ne tau‘i ae toko valugeau aia naa ne tamate‘i i he kuoga be taha.

9 Bea nae hoko moia a Eliesa koe foha o Toto koe tagata Ahoi, koe taha i he tuuga tagata e toko tolu nae ia Tevita, i he kuoga naa nau luki ki he kakai Filisitia nae tanaki fakataha ki he tau, ka kuo alu mei ai ae kakai Isileli:

10 Naa ne tuu hake, o ne ta‘i ae kau Filisitia, bea nae fai ai be ke vaivai hono nima, bea nae biki mau hono nima ki he heleta; bea nae fai e Jihova i he aho koia ae ikuna fakamanavahe; bea nae muimui kiate ia ae kakai ke vete be ae koloa.

11 Bea nae hoko moia a Sama koe foha o Akii koe tagata Halali. Bea nae tanaki fakataha ae kau Filisitia ke babani, ki he botu goue nae fonu i he bini: bea nae feholaki ae kakai mei he ao oe kau Filisitia.

12 Ka nae tuu be ia i he loto goue, o ne malu‘i ia, mo ne tamate‘i ae kau Filisitia: bea nae fai e Jihova ae ikuna lahi.

13 Bea nae alu hifo ae eiki e toko tolu nae bule ki he toko tolugofulu nae tuu ki mu‘a, o nau hoko mai kia Tevita i he lolotoga ae ututa‘u, ki he ana i Atulami: bea nae nofo ae kau tau oe kakai Filisitia i he telea o Lifeimi.

14 Bea nae nofo a Tevita i he gaahi aho koia i ha kolo malohi, bea nae nofo ae tau ae kakai Filisitia i he kuoga koia i Betelihema.

15 Bea nae holi a Tevita, o ne behe, Taumaiā ke omi e ha toko taha haku vai keu inu mei he vaikeli o Betelihema, aia oku i he veemataba!

16 Bea nae oho atu ae kau tagata malohi e toko tolu koia, o aji i he matatau oe kau Filisitia, ke utu hake ae vai mei he vaikeli i Betelihema, aia nae i he vee matani kolo, bea naa nau too ia, o omi kia Tevita: ka ne ogo ia nae ikai te ne inu mei ai, ka naa ne liligi atu ia i he ao o Jihova.

17 Bea naa ne behe, Ke mamao ia iate au, E Jihova, keu fai ae mea ni; ikai koe toto eni oe kau tagata nae alu kae tuutamaki e nau moui? koia nae ikai ai te ne inu mei ai. Koe gaahi mea eni nae fai e he kau tagata malohi e toko tolu koia.

18 Bea ko Abisai, koe tokoua o Joabe, koe tama a Seluia, nae eiki hake ia i he toko tolu. Bea naa ne aboabo a ene tao ke tau‘i ae toko tolugeau, bea naa ne tamate‘i akinautolu, bea nae ogoogo hake a hono higoa i he toko tolu.

19 Ikai nae ogoogoa lahi hake ia i he toko tolu? koia naa ne eiki kiate kinautolu: ka nae ikai tatau ia moe uluaki toko tolu.

20 Bea ko Benaia, koe foha o Jehoiata, koe foha oe tagata to‘a mei Kabisili, aia nae fai ae gaahi mea lahi, naa ne tamate‘i eia ae ogo tagata Moabe nae aga fakalaione: naa ne alu hifo foki o ne tamate‘i ha laione i he takele o ha luo lolotoga ae faahita‘u oe uha hinehina:

21 Bea naa ne tamate‘i ha tagata Ijibite, koe tagata toulekeleka: bea nae too e he tagata Ijibite ha tao i hono nima: ka naa ne alu atu kiate ia moe tokotoko be, bea ne hamuji ae tao mei he nima oe tagata Ijibite, bea ne tamate‘i ia aki a ene tao aana.

22 Koe gaahi mea eni nae fai e Benaia koe foha o Jehoiata, bea nae lau hono higoa ki he toko tolu nae ogoogoa.

23 Nae ogoogo lahi hake ia i he toko tolugofulu, ka nae ikai tatau ia moe uluaki toko tolu. Bea nae fakanofo ia e Tevita ke tuu ki mua i he ene kau mātua alea.

24 Bea ko Asaeli koe tehina o Joabe koe toko taha ia i he toko tolugofulu; ko Elihanani koe foha o Toto mei Betelihema,

25 Ko Sama koe tagata Heloti, mo Elika koe tagata Heloti,

26 Ko Ilesi koe tagata Baleti, mo Ila koe foha o Ikesi koe tagata Tikoa,

27 Ko Abiesa koe tagata Anatoti, mo Mibunei koe tagata Husati.

28 Ko Salimoni koe tagata Ahoi, mo Mehelei koe tagata Nitofa,

29 Ko Helebi koe foha o Beana, koe tagata Nitofa, mo Itei koe foha o Libei mei Kibea oe fānau o Benijimani,

30 Ko Benaia koe tagata Bilatoni, mo Itai mei he gaahi telea o Keasi,

31 Ko Abi‐aliboni koe tagata Aliba, mo Asimaveti koe tagata Bahulimi,

32 Ko Eliaba koe tagata Seeliboni, ae fānau tagata o Jaseni mo Jonatane,

33 Ko Sama, koe tagata Helali, mo Ahiami koe foha o Sala koe tagata Helali,

34 Ko Elifeliti koe foha o Ahasibai, koe foha oe tagata Meaka, mo Iliami koe foha o Ahitofeli koe tagata Kilo,

35 Ko Hesilei koe tagata Kameli, mo Bealei koe tagata Aliba,

36 Ko Ikiali koe foha o Netane mei Soba, mo Bani, koe tagata Kata,

37 Ko Seleki koe tagata Amoni, mo Nahela koe tagata Biheloti, aia nae fua ae mahafutau o Joabe koe tama a Seluia,

38 Ko Ila koe tagata Itila, mo Kalebi koe tagata Itila,

39 Mo Ulia koe tagata Heti: ko ho nau lau fakataha koe toko tolugofulu ma toko fitu.