¶ 1 BEA nae toe vela ae houhau o Jihova ki he kakai Isileli, bea nae ue‘i ai a Tevita ke ne behe kiate kinautolu, Alu, o lau be oku toko fiha a Isileli mo Juta.

2 He nae behe e he tu‘i kia Joabe koe eiki bule ki he kau tau, aia nae iate ia, Alu hake eni ki he faahiga kotoabe o Isileli mei Tani o a‘u atu ki Beasiba, bea lau ae kakai, koeuhi keu ilo ai be oku toko fiha ae kakai.

3 Bea nae behe e Joabe ki he tu‘i, Koeni tuku e Jihova ko ho Otua ke ne fakatokolahi ki hoo kakai, be koeha ia a ho nau toko lahi, ke liuga teau hake, bea ne tuku foki ke jio ki ai ae mata o hoku eiki koe tu‘i: ka koeha oku fiefie fai ai ae mea ni e hoku eiki koe tu‘i?

4 Ka ne ogo ia nae malohi atu ae lea ae tu‘i kia Joabe, bea ki he houeiki nae bule ki he kau tau. Bea nae alu atu a Joabe, moe houeiki nae bule ki he kau tau, mei he ao oe tu‘i ke nau lau ae kakai o Isileli.

¶ 5 Bea naa nau alu ki he kau vai e taha o Joatani, o nau abitaga i Aloeli, ki he botu toomatau oe kolo aia oku tuu ki he lotolotoga oe telea o Kata, o hagatonu ki Jesa:

6 Hili ia naa nau omi ki Kiliati, bea ki he fonua ko Tatimi‐otisi: bea naa nau hoko atu ki Tani‐jaani, o fai hake ki Saitoni,

7 O nau omi ki he kolo malohi o Taia, bea ki he gaahi kolo kotoabe oe kakai Hevi, bea moe kakai Kenani: bea naa nau alu atu ki he botu toga o Juta, o a‘u ki Beasiba.

8 Bea koia, hili e nau alu atu ki he botu kotoabe oe fonua, naa nau hoko mai ki Jelusalema i he katoa oe mahina e hiva moe aho e uofulu.

9 Bea nae tuku atu e Joabe ki he tu‘i a hono lau fakataha ae toko fiha oe kakai: bea nae i Isileli ae kau tagata malohi nae faa too ae heleta, koe toko valu kilu; bea koe kau tagata nae i Juta, koe toko nima kilu.

¶ 10 Bea nae valoki a Tevita e hono loto hili a ene lau ae kakai. Bea nae behe e Tevita kia Jihova, Kuou fai agahala lahi i he mea aia kuou fai: bea koeni, E Jihova, oku ou kole kiate koe ke ave ae hia a hoo tamaioeiki; he kuou fai vale lahi aubito.

11 He koeuhi i he ene tuu hake a Tevita i he bogibogi, nae hoko mai ae folofola a Jihova ki he balofita ko Kata, koe tagata kikite o Tevita, o behe,

12 Alu o fakaha kia Tevita, Oku behe e Jihova, Oku ou tuku ke ke fili ki he mea e tolu: fili kiate koe ha taha mei ai, koeuhi keu fai ia kiate koe.

13 Koia nae ha‘u ai a Kata kia Tevita, o ne tala ki ai, o ne behe kiate ia, E hoko ha hoge kiate koe i ho fonua i he ta‘u e fitu? be te ke fie hola i he mahina e tolu mei he ao o ho gaahi fili, ka nau tulia koe? be  te ke fili ke ai ha mahaki fakaauha i ho fonua i he aho e tolu? Fakakaukau eni ki ai, bea vakai be koeha ha lea teu toe lea aki kiate ia naa ne fekau‘i au.

14 Bea nae behe e Tevita kia Kata, Kuo efihia‘i lahi aubito au: tuku eni ke tau higa atu ki he nima o Jihova: he oku lahi a ene aloofa: kae oua naaku to atu ki he nima oe tagata.

¶ 15 Koia nae omi ai e Jihova ae mahaki fakaauha ki Isileli mei he bogibogi o a‘u atu ki he feituu aho aia nae tuutuuni: bea nae bekia i he kakai mei Tani o a‘u atu ki Beasiba, ae kakai tagata e toko fitu mano.

16 Bea i he ene mafao atu e he agelo a hono nima ki Jelusalema ke fakaauha ia, nae liliu a Jihova mei he fakahoko ae kovi, bea ne folofola ki he agelo aia nae tamate‘i ae kakai, Kuo lahi; ke taofi eni ho nima. Bea nae feouga ae agelo o Jihova moe hahaaga uite o Alauna koe tagata Jebusi.

17 Bea nae lea a Tevita kia Jihova, i he ene mamata ki he agelo aia nae ta‘i ae kakai, o ne behe, Vakai, kuou fai agahala, bea kuou fai ae kovi lahi: ka koe faga sibi na koeha kuo nau fai? oku ou kole kiate koe, tuku ho nima ke mafao mai kiate au, bea ki he fale o eku tamai.

¶ 18 Bea nae ha‘u a Kata i he aha goia kia Tevita, o ne behe kiate ia, Alu hake, bea ke fokotuu ha feilaulauaga kia Jihova i he hahaaga uite o Alauna koe tagata Jebusi.

19 Bea nae alu hake a Tevita, o hage koe tala a Kata, bea hage koia nae fekau e Jihova.

20 Bea nae jio a Alauna, o ne mamata ki he ene ha‘u kiate ia ae tu‘i bea mo ene kau tamaioeiki: bea nae alu atu a Alauna, bea naa ne bunou hifo ia i he ao oe tu‘i ki hono mata ki he kelekele.

21 Bea nae behe e Alauna, Koeha kuo ha‘u ai a hoku eiki koe tu‘i ki he ene tamaioeiki? Bea nae beheage e Tevita, Koeuhi keu fakatau meiate koe ae hahaaga uite, ke fokotuu ai ha feilaulauaga kia Jihova, ke gata ai ae mahaki fakaauha mei he kakai.

22 Bea nae behe e Alauna kia Tevita, Tuku ke too e hoku eiki koe tu‘i mo ne feilaulau aki ha mea oku lelei kiate ia: vakai, oku i heni ae faga bulu ki he feilaulau tutu, moe nāunāu oe haha uite, moe nāunāu oe faga bulu ke fefie aki.

23 Koe gaahi mea ni kotoabe nae fai fakaeieiki ai a Alauna o ne foaki ia ki he tu‘i. Bea nae behe e Alauna ki he tu‘i. Ke ofeina koe e Jihova ko ho Otua.

24 Bea nae behe e he tu‘i kia Alauna, E ikai behe; ka teu fakatau mooni ia meiate koe aki ha totogi: bea e ikai foki teu atu ha feilaulau tutu kia Jihova ko hoku Otua, i ha mea kuou ma‘u taetotogi. Bea koia nae fakatau ai e Tevita ae hahaaga uite, bea moe faga bulu, aki ae sikeli siliva e nimagofulu.

25 Bea nae fokotuu i ai e Tevita ha feilaulauaga kia Jihova, bea ne atu i ai ae gaahi feilaulau tutu moe gaahi feilaulau fakamelino. Bea behe, nae fakakolekolea a Jihova koeuhi koe fonua, bea nae taofi ae mahaki fakaauha mei Isileli.