¶ 1 KO eni ae gaahi tuutuuni moe gaahi fakamāu, aia ke mou tokaga ki ai o fai i he fonua, aia oku foaki kiate koe ke ma‘u ia e Jihova koe Otua a hoo mou gaahi tamai, i he aho kotoabe oku mou moui i he fuga o mamani.

2 Ke mou fakaauha aubito ae botu kotoabe, aia nae tauhi i ai ho nau gaahi otua e he gaahi buleaga te mou ikuna, i he gaahi mouga, bea ki he gaahi tafugofuga, bea i he lolo akau mata kotoabe:

3 Bea ke mou holoki hifo ho nau gaahi feilaulauaga, bea feji‘i ho nau gaahi bou, bea tutu ho nau gaahi vao tabu aki ae afi; bea ke mou ta hifo ho nau gaahi mea fakatātā ki ho nau gaahi otua, bea fakaauha ho nau gaahi higoa mei he botu koia.

4 E ikai te mou fai behe kia Jihova ko ho mou Otua.

5 Ka koe botu koia aia e fili e Jihova ko ho mou Otua mei ho mou gaahi faahiga kotoabe ke ai ki ai hono huafa, io ke mou kumi ki hono afioaga, bea ke mou hoko atu ki ai:

6 Bea te mou fetuku ki ai a hoo mou gaahi feilaulau tutu, mo hoo mou gaahi feilaulau, mo hoo mou tukuhau, moe feilaulau hiki hake a ho mou nima, mo hoo mou gaahi fuakava, mo hoo mou mea atu i he loto ofa, moe uluaki fanau a hoo mou faga manu lalahi mo hoo mou faga manu jii.

7 Bea ke mou kai i ai i he ao o Jihova ko ho mou Otua, bea mou fiefia i he mea kotoabe oku mou mafao atu ho mou nima ki ai, akimoutolu mo ho mou kau nofoaga, aia kuo tabuaki aki koe e Jihova ko ho Otua.

8 E ikai te mou fai o fakatatau ki he mea kotoabe oku tau fai i heni he aho ni, ae tagata kotoabe aia oku totonu i hono ao oona.

9 He oku teeki ai hoko akimoutolu ki he mālōlōaga, bea ki he tofia, aia oku foaki e Jihova ko ho mou Otua kiate kimoutolu.

10 Ka i hoo mou alu atu ki he kauvai e taha o Joatani, bea nofo i he fonua aia oku foaki e Jihova ko ho mou Otua ke mou ma‘u, bea i he ene tuku kiate kimoutolu ae mālōlō mei ho mou gaahi fili kotoabe oku takatakai iate kimoutolu, koeuhi ke mou nofo fiemalie be;

11 E toki i ai ha botu aia e fili e Jihova ko ho Otua ke bule ke nofo ki ai hono huafa; te mou fetuku ki ai aia kotoabe oku ou fekau kiate kimoutolu, ko hoo mou gaahi feilaulau tutu, mo hoo mou gaahi feilaulau, a hoo mou gaahi tukuhau, moe feilaulau hiki hake a ho mou nima, mo hoo mou gaahi fuakava aia oku mou fuakava ai kia Jihova:

12 Bea te mou fiefia i he ao o Jihova ko ho mou Otua, akimoutolu mo ho mou gaahi foha, mo ho mou gaahi ofefine, mo hoo mou kau tamaioeiki, mo ho mou kau nofoaga, bea moe kau Livai aia oku i ho mou gaahi lotoa; he koeuhi oku ikai hano tufakaga be tofia iate kimoutolu.

13 Vakai lelei kiate koe ke oua naa ke atu hoo feilaulau tutu i he botu kotoabe oku ke mamata ki ai.

14 Ka koe botu koia aia e fili e Jihova i ho mou faahiga e taha, ke ke atu i ai a hoo gaahi feilaulau tutu, bea ke fai i ai aia kotoabe oku ou fekau kiate koe.

15 Ka ne ogo ia te ke tamate‘i mo kai kakano i ho gaahi mataba kotoabe, aia kotoabe oku ke holi ki ai, o fakatatau ki he tabuaki a Jihova ko ho Otua aia kuo ne tuku kiate koe; koe tae maa moe maa ke nau kai mei ai, i he anitelobe mo haate.

16 Kae oua aubito naa mou kai ae toto; ka mou liligi ia ki he kelekele o hage koe vai.

¶ 17 E ikai gofua ke ke kai i ho lotoa hono hogofulu oe vahe o hoo uite, be o hoo uaine, be o hoo lolo, be koe uluaki uhiki o hoo faga manu lalahi be koe faga manu jii, be ko ha mea i hoo fuakava aia kuo ke fuakava ki ai, be ko hoo feilaulau loto lelei, be koe feilaulau hiki hake a ho nima:

18 Ka te ke kai ia i he ao o Jihova ko ho Otua i he botu aia oku fili e Jihova ko ho Otua, e koe, mo ho foha, mo ho ofefine, mo hoo tamaioeiki, mo hoo kaunaga, moe Livai aia oku i ho lotoa: bea te ke fiefia koe i he ao o Jihova ko ho Otua i he gaahi mea kotoabe oku ke ai ho nima ki ai.

19 Ke ke vakai kiate koe ke oua naa ke liaki ae kau Livai i he gaahi aho kotoabe oku ke moui ai i he mamani.

¶ 20 Oka fakalahi e Jihova ko ho Otua a ho fonua, o hage koia kuo ne talaofa kiate koe, bea ke lau, o behe, Teu kai kakano, koe mea i hoo holi ke kai kakano; e lelei be hoo kai kakano, aia oku ke holi ki ai.

21 Kabau oku mamao iate koe ae botu aia kuo fili e Jihova ko ho Otua ke ai ki ai hono huafa, te ke toki tamate‘i mei hoo faga manu lalahi, bea mo hoo faga manu jii, aia kuo tuku kiate koe e Jihova, o hage koia kuou fekau kiate koe, bea te ke kai i ho gaahi mataba aia kotoabe oku ke holi ki ai.

22 O hage koe kai ae anitelobe moe haate, e behe be hoo kai ena: e fakatou kai ae taemaa moe maa mei ai.

23 Ka ke vakai ke oua aubito naa ke kai toto: he koe toto koe moui; bea oku ikai gofua hao kai ae mouiaga fakataha moe kanomate.

24 Oua naa ke kai ia, ka ke liligi ia ki he kelekele o hage koe vai.

25 Oua naa ke kai ia; koeuhi ke hoko ai ae lelei kiate koe, bea ki hoo fānau kimui iate koe, oka ke ka fai aia oku totonu i he ao o Jihova.

26 Ka ko hoo gaahi mea maonioni aia oku ke ma‘u, mo hoo mea kuo ke fuakava aki, ke ke too o ave ia ki he botu aia kuo fili e Jihova:

27 Bea ke atu hoo gaahi feilaulau tutu, koe kakano mo hono toto, ki he feilaulauaga o Jihova ko ho Otua: bea koe toto o hoo gaahi feilaulau e liligi ia ki he fuga oe feilaulauaga o Jihova ko ho Otua, bea te ke kai e koe hono kakano.

28 Ke ke vakai mo tokaga ki he gaahi lea ni aia oku ou fekau kiate koe, Koeuhi ke hoko ai ae lelei kiate koe, bea ki hoo gaahi fānau kimui iate koe o taegata, oka ke ka fai aia oku lelei mo totonu i he ao o Jihova ko ho Otua.

¶ 29 Oka motuhi mei ho ao e Jihova ko ho Otua ae gaahi buleaga, aia oku ke alu ki ai ke ma‘u akinautolu, bea kuo ke hoko o fetogi akinautolu, o nofo i ho nau fonua;

30 Ke ke vakai kiate koe telia naa kākāia koe i hoo agimui kiate kinautolu, oka hili hono fakaauha akinautolu mei ho ao, bea oua naa ke fehui koe ki ho nau gaahi otua, o behe, Nae fefe hono tauhi e he gaahi buleaga ni ki ho nau gaahi otua? he e behe be eku fai.

31 Oua naa ke fai behe kia Jihova ko ho Otua: he koe mea kovi kotoabe kia Jihova, aia oku fehia ia ki ai, kuo oji e nau fai ki ho nau gaahi otua; he ko ho nau gaahi foha mo ho nau gaahi ofefine kuo nau tutu i he afi ki ho nau gaahi otua.

32 Koe mea kotoabe oku ou fekau kiate kimoutolu, mou tokaga ki ai o fai, oua naa ke fakalahi ia, be fakajiijii ki ai.