¶ 1 BEA naa tau tafoki, o alu hake i he hala ki Besani: bea nae ha‘u kituaa a Oki koe tu‘i o Besani ke tau‘i akitautolu, aia mo hono kakai kotoabe, i Etilei.

2 Bea nae behe e Jihova kiate au, Oua naa ke manavahe kiate ia: he teu tukuage ia, mo hono kakai kotoabe, mo hono fonua ki ho nima; bea te ke fai kiate ia o hage koia naa ke fai kia Sihoni koe tu‘i oe kau Amoli, aia nae nofo i Hesiboni.

3 Bea nae tukuage e Jihova ko ho tau Otua a Oki koe tu‘i o Besani ki ho tau nima, mo hono kakai kotoabe: bea naa tau teia ia ke oua naa toe ha toko taha kiate ia.

4 Bea naa tau ma‘u ene gaahi kolo i he kuoga koia, nae ikai toe ha kolo e taha naa tau tae lava‘i iate kinautolu, koe kolo e onogofulu, koe botu fonua kotoabe o Akoba, koe buleaga o Oki i Besani.

5 Koe gaahi kolo ni nae a‘i aki ae gaahi a maoluga, moe gaahi mataba, moe gaahi sogo; kae umaa ae gaahi kolo tae a nae lahi aubito.

6 Bea naa tau fakaauha aubito akinautolu, o hage koia naa tau fai kia Sihoni koe tu‘i o Hesiboni, o fakaauha ae kakai tagata, moe fefine, moe fānau, oe kolo kotoabe.

7 Ka koe faga manu kotoabe, moe vete oe gaahi kolo, naa tau too koe koloa maa tautolu.

8 Bea naa tau ma‘u i he kuoga koia mei he nima oe ogo tu‘i oe kakai Amoli, ae gaahi fonua oku i he botu mai o Joatani, mei he vaitafe o Alanoni o a‘u atu ki he mouga ko Heamoni;

9 (Ae Heamoni koia oku ui e he kau Saitoni ko Silioni; bea oku ui ia e he kakai Amoli ko Sina;)

10 Koe gaahi kolo kotoabe oe toafa, mo Kiliati kotoabe, mo Besani kotoabe, o a‘u ki Salika mo Etilei, koe gaahi kolo oe buleaga o Oki koe tu‘i o Besani.

11 He nae toe be a Oki koe tu‘i o Besani i he toega kakai lalahi; vakai, ko hono mohega koe mohega ukamea; ikai oku i Labate ia oe fānau a Amoni? Koe haga e hogofulu ma valu ko hono loloa, bea ko hono maukubu koe haga e valu, o fakatatau ki he haga oe tagata.

12 Bea koe fonua ni, naa tau ma‘u i ae kuoga koia, mei Aloeli aia oku ofi ki he vaitafe ko Alanoni, mo hono vaeua malieaga oe mouga ko Kiliati, mo hono gaahi kolo o ia, neu atu ki he faahiga o Lubeni, moe faahiga o Kata.

13 Bea ko hono toe o Kiliati, mo Besani kotoabe, aia koe buleaga o Oki, naaku atu ki hono vaeua oe faahiga o Manase; ae gaahi fonua kotoabe o Akoba, mo Besani kotoabe, aia nae ui koe fonua oe kakai lalahi.

14 Ko Jaili koe foha o Manase naa ne ma‘u ae fonua kotoabe o Akoba o a‘u atu ki he botu o Kesuli mo Meekati; bea naa ne ui ia ki hono higoa oona, ko Besani‐hevatijaili o a‘u ki he aho ni.

15 Be neu atu a Kiliati kia Mekili.

16 Bea neu atu ki he faahiga o Lubeni moe faahiga o Kata mei Kiliati o a‘u atu ki he vaitafe ko Alanoni hono vaeua oe vahaa mouga, mo hono mata fonua o a‘u atu ki he vaitafe ko Jaboki, aia oku i he vee fonua oe fānau a Amoni:

17 Koe toafa foki, mo Joatani, mo hono gataaga o ia, mei Kineleti o a‘u atu ki he tahi oe toafa, io ae tahi kona, i lalo i Asitotibisika i he botu hahake.

¶ 18 Bea neu fekau kiate kimoutolu i he kuoga koia, o behe, Ko Jihova ko ho mou Otua kuo ne foaki kiate kimoutolu ae fonua ni ke mou ma‘u: te mou alu atu moe mahafu i he ao o ho mou kaiga koe fānau a Isileli, akimoutolu kotoabe oku faa fai ae tau.

19 Ka ko ho mou gaahi unoho, mo hoo mou fānau jii, mo hoo mou faga manu, (he oku ou ilo oku lahi hoo mou faga manu,) te nau nofo i hoo mou gaahi kolo aia kuou foaki kiate kimoutolu;

20 Ke oua ke foaki e Jihova ae mālōlō ki ho mou kaiga, o hage ko kimoutolu, bea ke oua ke ma‘u ekinautolu foki ae fonua koia kuo foaki e Jihova ko ho mou Otua kiate kinautolu i he kau vai e taha o Joatani: bea te mou toki liu mai ae tagata kotoabe ki hono tofia, aia kuou tuku kiate kimoutolu.

¶ 21 Bea neu fekau‘i a Josiua i he kuoga koia, o behe, Kuo mamata e ho mata ki he mea kotoabe kuo fai e Jihova ko ho mou Otua ki he ogo tu‘i ni: e fai behe be e Jihova ki he gaahi buleaga kotoabe oku ke alu ki ai.

22 Oua naa mou manavahe kiate kinautolu: he koeuhi e tau a Jihova ko ho mou Otua maa moutolu.

23 Bea neu fakakolekole kia Jihova i he kuoga koia, o behe,

24 E Jihova koe Otua, kuo ke kamata fakaha ki hoo tamaioeiki ho lahi, mo ho nima malohi: he kohai ha Otua i lagi be i mamani, oku faa fai o fakatatau ki hoo gaahi gaue, bea tatau mo ho mafimafi?

25 Oku ou kole kiate koe, tuku au keu alu atu, o mamata ki he fonua lelei aia oku i tua Joatani, ae mouga matamata lelei koia, mo Lebanoni.

26 Ka nae houhau a Jihova kiate au koeuhi ko kimoutolu, bea nae ikai tokaga kiate au: bea nae behe mai e Jihova kiate au, Ke ke fiemalie be koe; bea oua naa ke toe lea kiate au i he mea ni.

27 Alu hake koe ki he tumutumu o Bisika, bea haga atu ho mata ki luluga, mo tokelau, mo toga, mo hihifo, bea vakai aki ia ho mata: koeuhi e ikai te ke laka ki he kau vai e taha o Joatani.

28 Ka ke fekau‘i a Josiua, mo tokoni lelei kiate ia, mo fakamalohi ia: koeuhi e muomua ia i he kakai ni, bea te ne fakahoko atu akinautolu ke nau ma‘u ae fonua aia te ke mamata ki ai.

29 Bea naa tau nofo ai i he botu maulalo oku hagatonu ki Bete‐beoli.