Ko hono nima oe Tohi a Mosese oku ui koe Toe Lau Oe Fono, be ko Teutalonome

¶ 1 KO eni ae gaahi lea nae lea aki e Mosese ki Isileli kotoabe i he botu mai o Joatani i he toafa, i he toafa oku haga tonu ki he tahi Kulokula, i he vahaa o Balani, mo Tofeli, mo Lebani, mo Heseloti, mo Tesabi.

2 (Koe fonogaaga ia oe aho e hogofulu ma taha mei Holebi i he hala oe mouga ko Seia ki Ketesi‐bania.)

3 Bea nae hoko o behe i hono fagofulu ta‘u, i hono hogofulu ma taha oe mahina, i he uluaki  aho oe mahina, nae lea a Mosese ki he fānau a Isileli o fakatatau ki he mea kotoabe nae fekau atu e Jihova kiate ia ke tala kiate kinautolu;

4 Hili ene tamate‘i a Sihoni koe tu‘i oe kau Amoli, aia nae nofo i Hesiboni, mo Oki koe tu‘i o Besani, aia nae nofo i Asitelote i Etilei:

5 I he botu mai o Joatani, i he fonua o Moabe, nae kamata fakaha e Mosese ae fono ni, o behe,

6 Nae folofola a Jihova ko ho tau Otua kiate kitautolu i Holebi, o behe, Kuo mou nofo fuoloa lelei i he mouga ni:

7 Mou tafoki, o hiki ho mou fonoga, bea alu ki he mouga oe kau Amoli, bea ki he gaahi botu ofi ki ai, i he tafagafaga, i he gaahi mouga, bea i he telea, bea i he botu toga, bea i he botu matātahi, ki he fonua oe kau Kenani, bea ki Lebanoni, ki he vaitafe lahi, ae vaitafe ko Iufaletesi.

8 Vakai, kuou tuku ae fonua ki ho mou ao: mou alu ki ai o ma‘u ae fonua aia nae fuakava ai e Jihova ki hoo mou gaahi tamai, ko Ebalahame, mo Aisake, mo Jekobe, ke foaki ia kiate kinautolu, bea ki ho nau hako kimui iate kinautolu.

¶ 9 Bea neu lea kiate kimoutolu i he kuoga koia, o behe, Oku ikai teu mafai ke kataki‘i akimoutolu e au be:

10 Kuo fakatokolahi akimoutolu e Jihova ko ho mou Otua, bea, vakai, oku mou tatau he aho ni moe gaahi fetuu oe lagi hono lahi.

11 (Kae ofa ke fakatokolahi akimoutolu e Jihova koe Otua o hoo mou gaahi tamai ke lau‘i liuga afe a ho mou toko lahi ni, bea tabuaki‘i akimoutolu, o hage ko ia kuo ne talaofa kiate kimoutolu!)

12 E fefe eku faa fai ke kataki e au be hoo mou fakafiu mo hoo mou kavega, mo hoo mou fekeikei?

13 Mou fili ha kau tagata boto, oku loto matala, aia kuo iloa i ho mou gaahi faahiga, bea teu fakanofo akinautolu ke nau bule‘i akimoutolu.

14 Bea ne mou tala mai kiate au, o behe, Koe mea kuo ke lea ki ai oku lelei ia ke mau fai.

15 Bea neu fili mai ae houeiki o ho mou gaahi faahiga, ae kau tagata boto, bea ogoogo, o fakanofo akinautolu ke bule‘i akimoutolu, koe kau bule ki he gaahi toko afe, moe kau bule oe gaahi toko teau, moe kau bule oe gaahi toko nimagofulu, moe kau bule oe gaahi toko hogofulu, moe kau matābule i ho mou gaahi faahiga.

16 Bea neu fekau ki hoo mou kau fakamāu i he kuoga koia, o behe, Mou fanogo ki he gaahi mea a ho mou gaahi kaiga, bea fakamāu maonioni ki he tagata kotoabe mo hono tokoua, bea moe muli oku iate ia.

17 Oua naa mou filifilimanako ki he kakai i he fakamāu; ka te mou fanogo ki he jii bea moe lahi; oua naa mou manavahe ki he mata oe tagata; he oku ae Otua ae fakamāu: bea koe mea oku faigataa kiate kimoutolu, omi ia kiate au, bea teu fanogo ki ai.

18 Bea neu fekau kiate kimoutolu i he kuoga koia ae gaahi mea kotoabe ke mou fai.

¶ 19 Bea i he e tau hiki mei Holebi, naa tau alu ai be i he fuu toafa lahi koia mo fakamanavahe, aia naa mou mamata i he hala oe mouga oe kau Amoli, o hage koe fekau a Jihova ko ho tau Otua kiate kitautolu; bea naa tau hoko ki Ketesi‐bania.

20 Bea neu behe kiate kimoutolu, Kuo mou hoko ki he mouga oe kau Amoli, aia oku foaki e Jihova ko ho tau Otua kiate kitautolu.

21 Vakai, kuo tuku e Jihova ko ho Otua ae fonua i ho ao: alu hake o ma‘u ia, o hage koe folofola a Jihova koe Otua o hoo gaahi tamai kiate koe; oua naa manavahe, be loto vaivai.

¶ 22 Bea naa mou unuunu mai kotoabe kiate au o mou behe, Te mau fekau ae kau tagata ke muomua iate kimautolu, ke nau ajiaji ae fonua, bea toe fakaha mai ae hala oku totonu ke mau alu hake ai, bea koe kolo fe ia te mau hoko ki ai.

23 Bea neu fiemalie lahi i he lea koia: bea neu fili ae kau tagata e toko hogofulu ma toko ua iate kimoutolu, o tautau toko taha i he faahiga.

24 Bea naa nau afe o alu hake ki he mouga, bea ne nau hifo ki he botu tafagafaga o Esikoli, o nau vakai foli ia.

25 Bea naa nau too ae fua oe fonua i ho nau nima, o nau omi ia kiate kitautolu, o nau omi moe lea kiate kitautolu, o behe, Koe fonua lelei aia oku foaki e Jihova ko ho tau Otua kiate kitautolu.

26 Ka nae ikai te mou fie alu hake ki ai, bea ne mou fai talagataa ki he fekau a Jihova ko ho mou Otua:

27 Bea naa mou lāuga i ho mou gaahi fale fehikitaki, o behe, Koe mea i he fehia a Jihova kiate kitautolu, koia kuo ne omi ai akitautolu mei he fonua ko Ijibite, ke tukuage akitautolu ki he nima oe kau Amoli, ke fakaauha akitautolu.

28 Te tau alu hake ki fe? kuo fakavaivai‘i ho mau loto e ho mau gaahi kaiga, o behe, Oku lahi hake mo loloa ae kakai iate kimautolu; oku lahi ae gaahi kolo bea oku hoko hake ki he lagi ho nau a; kae umaa foki e mau mamata i ai ki he gaahi foha oe kau Anaki.

29 Bea neu behe kiate kimoutolu, Oua naa mou lilika, bea oua naa mou manavahe kiate kinautolu.

30 Ko Jihova ko ho mou Otua aia oku muomua iate kimoutolu, e tau ia maa moutolu, o hage koia kotoabe naa ne fai i Ijibite maa moutolu i ho mou ao:

31 Bea i he toafa, aia naa ke mamata ai ki he fua koe e Jihova ko ho Otua, o hage koe fua e he tagata hono foha, i he hala kotoabe naa mou alu ai, kae oua ke mou hoko ki he botu ni.

32 Ka i he mea ni nae ikai te mou tui kia Jihova ko ho mou Otua,

33 Aia nae alu muomua i he hala iate kimoutolu, ke kumi ae botu ke fokotuu ai ho mou gaahi fale fehikitaki, i he afi i he bouli, ke fakaha kiate kimoutolu ae hala koia te mou alu ai, bea i he ao i he aho.

34 Bea nae ogo‘i e Jihova ae le‘o o hoo mou gaahi lea, bea nae houhau ia, bea ne fuakava o behe,

35 Koe mooni e ikai ha toko taha oe kau tagata oe toutagata kovi ni te ne mamata ki he fonua lelei koia, aia neu fuakava ke foaki ki hoo mou gaahi tamai,

36 Ka ko Kelebi koe foha o Jifune: e mamata ia ki ai, bea teu foaki kiate ia, ae fonua kuo ne tuu ki ai, bea ki he ene fānau koe mea i he ene muimui agatonu kia Jihova.

37 Bea nae houhau a Jihova kiate au foki koeuhi ko kimoutolu, o behe, Ko koe foki e ikai te ke hoko ki ai.

38 Ka ko Josiua koe foha o Nuni, aia oku tuu i ho ao, e alu ia ki ai: ke ke tokoni kiate ia: he te ne bule ke ma‘u ia e Isileli.

39 Ka ko hoo mou gaahi fānau iki, akinautolu ne mou behe e hoko o moua, mo hoo mou gaahi fānau, akinautolu nae ikai ilo i he aho koia ae lelei moe kovi, te nau hoko ki ai, bea teu foaki ia kiate kinautolu, bea te nau ma‘u ia.

40 Ka ko kimoutolu, mou tafoki, bea hiki ho mou fonoga ki he toafa i he hala oe Tahi Kulokula.

41 Bea naa mou lea o behe kiate au, Kuo mau fai agahala kia Jihova; te mau alu hake o tau, o fakatatau ki he mea kotoabe oku fekau e Jihova ko ho mau Otua kiate kimautolu. Bea hili hoo mou nonoo taki taha ae tagata ene mahafu tau kiate ia, naa mou teu be ke alu ki he mouga.

42 Bea nae folofola a Jihova kiate au, Tala kiate kinautolu, Oua naa alu hake, bea oua naa tau; he oku ikai teu iate kimoutolu; telia naa teia akimoutolu i he ao o ho mou gaahi fili.

43 Bea neu lea kiate kimoutolu; bea nae ikai te mou tui ki ai, ka naa mou agatuu ki he fekau a Jihova, o alu hake loto fielahi be ki he mouga.

44 Bea nae ha‘u ae kau Amoli, aia nae nofo i he mouga ko ho mou tali, bea naa nau tuli akimoutolu o hage koia oku fai e he faga bi, bea nae teia akimoutolu i Seia, o a‘u ki Hoama.

45 Bea ne mou foki o tagi i he ao o Jihova, ka nae ikai tokaga a Jihova ki ho mou le‘o, be fakaogo kiate kimoutolu.

46 Koia naa mou nofo ai i Ketesi o aho lahi, o fakatatau ki he gaahi aho naa mou nofo i ai.