¶ 1 OKA ke ka alu ke tau‘i ho gaahi fili, mo ke mamata ki he faga hose, moe gaahi jialiote, moe kakai oku toko lahi hake iate koe, oua naa ke manavahe kiate kinautolu: he oku iate koe a Jihova ko ho Otua, aia naa ne omi koe mei he fonua ko Ijibite.

2 Bea e hoko o behe, i hoo mou hoko o ofi ki he tau, e unuunu mai ae taulaeiki o lea ki he kakai,

3 Bea e behe eia kiate kinautolu, Fanogo, E Isileli, oku mou hoko o ofi he aho ni ke tau mo ho mou gaahi fili: oua naa mou loto foi, bea oua naa mou manavahe, be tetetete, be lilika kiate kinautolu;

4 He ko Jihova ko ho mou Otua ia aia oku alu mo kimoutolu, ke tau‘i ho mou gaahi fili maa moutolu, ke fakamoui akimoutolu.

¶ 5 Bea e lea ae kau matābule ki he kakai, o behe, Kohai ha tagata kuo ne laga ha fale foou, bea oku heeki ai hufia ia; ke alu ia o foki ki hono fale, telia naa mate ia i he tau, bea hufi ia e ha tagata kehe.

6 Bea kohai ha tagata kuo ne to ae goue vaine, bea oku heeki ai te ne kai mei ai? ke alu ia o foki ki hono fale, telia naa mate ia i he tau, bea kai mei ai e ha tagata kehe.

7 Bea kohai ha tagata kuo bolo‘i ha fefine kiate ia, bea oku heeki ai te ne ma‘u ia? ke alu ia bea foki ki hono fale, telia naa mate ia i he tau, bea ma‘u ia e ha tagata kehe.

8 Bea e toe lea ae kau matābule ki he kakai, bea te nau behe, Kohai ha tagata oku manavahe mo loto foi? ke alu ia o foki ki hono fale, telia naa vaivai foki ae loto o hono gaahi kaiga o hage ko hono loto.

9 Bea e behe, oka hili ae lea ae kau matābule ki he kakai, te nau toki fakanofo ae kau eiki tau ki he kau tau ke nau taki ae tau.

¶ 10 Oka ke ka hoko o ofi ki ha kolo ke tau‘i ia, te ke fakaha ae melino ki ai.

11 Bea e behe, kabau oku tali fakamelino ia, bea oku too ia kiate koe, bea e toki behe, koe kakai kotoabe oku i ai e hoboate kotoabe kiate koe, bea te nau tauhi koe.

12 Bea kabau e ikai fai ia ha fakalelei mo koe, ka oku loto ke tau‘i koe, te ke toki tau‘i ia:

13 Bea hili hono tuku ia e Jihova ko ho Otua ki ho nima, te ke ta‘i ae tagata kotoabe oku i ai aki ae mata oe heleta:

14 Ka koe kau fefine, moe fānau jii, moe faga manu, moe mea kotoabe oku i he kolo, io, koe mea vete kotoabe o ia, ke ke too kiate koe; bea ke kai ae mea vete a ho gaahi fili, aia kuo foaki e Jihova ko ho Otua kiate koe.

15 Ke ke fai behe be ki he gaahi kolo aia oku mamao aubito meiate koe, aia oku ikai i he gaahi kolo oe gaahi buleaga ni.

16 Ka koe gaahi kolo ae kakai ni, aia oku foaki kiate koe e Jihova ko ho Otua ko ho tofia, oua naa ke fakamoui ha toko taha oku manava:

17 Ka te ke fakaauha aubito akinautolu; ae kau Heti, moe kau Amoli, moe kau Kenani, moe kau Belesi, moe kau Hevi, moe kau Jebusi; o hage koe fekau a Jihova ko ho Otua kiate koe:

18 Koeuhi ke oua naa nau ako kiate kimoutolu ke fai o hage koe nau gaahi gaue kovi ki ho nau gaahi otua: bea mou fai agahala ai kia Jihova ko ho mou Otua.

¶ 19 Oka ke ka kabui ha kolo o fuoloa, i hoo tau‘i ia ke lava‘i, oua naa ke maumau‘i ae gaahi akau o ia i hoo ai malohi ae toki ki ai: he koeuhi te ke kai mei ai, bea oua naa ke ta hifo ia ke gaue aki i he tau, (he koe akau oe goue koe moui ia ae tagata:)

20 Ka koe gaahi akau oku ke ilo oku ikai koe gaahi akau fua ke kai, ke ke maumau mo ke ta hifo ia, bea te ke tanu buke ki he kolo oku ne tau‘i koe kae oua ke ke lava‘i ia.