¶ 1 OKA fili mai e ha tagata hono unoho, bea na fakamau mo ia, bea hoko o behe, oku ikai jii te ne ma‘u ha fiemalie iate ia, koeuhi kuo ne ilo ha mea taemaa iate ia: tuku ai ke ne tohi haa ne tohi fakamavae, bea ke atu ia ki hono nima, bea fekau ia ke alu mei hono fale.

2 Bea i he ene alu mei hono fale, e gofua a ene alu ia o hoko koe unoho oe tagata kehe.

3 Bea kabau e fehia kiate ia hono unoho koia, bea ne tohi maana ae tohi fakamavae, o atu ia ki hono nima, bea fekau ia ke alu mei hono fale; bea kabau e mate ae unoho ki mui naa ne ma‘u ia ko hono unoho,

4 E ikai gofua ki hono uluaki unoho, aia naa ne fekau ia ke alu, ke ne toe omi ia ko hono unoho, hili hono fakahala‘i; he koe mea kovi ia i he ao o Jihova: bea oua naa ke fakaagahala‘i ae fonua, aia oku foaki e Jihova ko ho Otua ko ho tofia.

¶ 5 Oka ma‘u e he tagata ae unoho foou, oua naa alu ia ki he tau, bea oua naa tuku ha gaue kiate ia: kae tuku ke ataatā ia i abi i he ta‘u e taha, bea te ne fakafiemalie ki he unoho aia kuo ne ma‘u.

¶ 6 Ke oua naa ave e ha tagata e taha ae maka toka lalo be koe maka i oluga oe mea momoji koe tuku totogi: he oku ne ave ae mouiaga koe tuku totogi.

¶ 7 Kabau e ma‘u ha tagata oku ne kaihaaji ha niihi i hono kaiga koe fānau a Isileli, o fakamalohi‘i ia, be fakatau ia; bea e mate ai ae kaihaa koia; bea e tukuage ae kovi meiate kimoutolu.

¶ 8 Ke ke vakai i he mahaki koe kilia ke ke tokaga lahi, ke fai o fakatatau ki he mea kotoabe oku fakaha kiate kimoutolu e he kau taulaeiki koe kau Livai: o hage koia naaku fekau kiate kimoutolu, e behe be hoo mou tokaga o fai.

9 Manatu ki he mea nae fai e Jihova kia Miliame i he hala, hili hoo mou hiki mai mei Ijibite.

¶ 10 Oka ke ka no atu ha mea ki ho tokoua, oua naa ke alu ki hono fale ke too mai hono tuku totogi.

11 Ka ke tuu i tua, bea koe tagata koia oku ke no atu hoo mea ki ai ke ne omi kiate koe kitua ae tuku totogi.

12 Bea kabau oku majiva ae tagata, oua naa ke mohe mo ene mea tuku totogi.

13 Ke ke toe atu kiate ia ae tuku totogi i he alu hifo ae laa, koeuhi ke mohe ia i hono kofu oona mo ne tabuaki‘i koe: bea koe mea agatonu ia kiate koe i he ao o Jihova ko ho Otua.

¶ 14 Oua naa ke fakamamahi‘i ae tamaioeiki oku gaue ki he totogi aia oku majiva mo tuutamaki, be ko ha taha ia i ho gaahi kaiga, be i he kau muli oku nofo i hoo gaahi kolo:

15 I he hoko hono aho ke ke atu kiate ia hono totogi, bea oua naa to ae laa ki ai; he oku majiva ia, bea oku tokaga hono loto ki ai: telia naa tagi ia kia Jihova koeuhi ko koe, bea hoko ia koe agahala kiate koe.

16 E ikai tamate‘i ae gaahi tamai koe fetogi oe nau fānau, bea e ikai tamate‘i ae fānau koeuhi koe gaahi tamai: e tamate‘i ae tagata taki taha i he ene agahala aana.

¶ 17 Oua naa ke fakahalaia‘i ae fakamāu ae muli, be koe tamai mate; be too ae kofu oe nitou koe tuku totogi.

18 Ka ke manatu naa ke bobula koe i Ijibite, bea nae huhui koe mei ai e Jihova ko ho Otua: koia oku ou fekau ai ke fai ae gaahi mea ni.

¶ 19 Oka ke ka tuuji hifo ho ututa‘u oku i he goue, bea kuo galo ae u uite e taha i he goue, oua naa ke toe alu ki he goue ke omi ia: tuku ia ki he muli, moe tamai mate, moe nitou: koeuhi ke tabuaki‘i koe e Jihova ko ho Otua i he gaue kotoabe a ho nima.

20 Oka ke ka haha hoo olive, oua naa ke toe ala ki hono gaahi basaga: kae tuku ia ki he muli, moe tamai mate, bea ki he nitou.

21 Oka ke ka toli ae gaahi kelebi o hoo goue vaine, oua naa ke tanaki hono toega: tuku ia ki he muli, moe tamai mate, bea ki he fefine baea.

22 Te ke manatu naa ke bobula koe i Ijibite: koia oku ou fekau kiate koe ke fai ae mea ni.