¶ 1 BEA ko eni ae gaahi lea oe fuakava, aia nae fekau e Jihova kia Mosese ke fai moe fānau a Isileli i he fonua o Moabe, ka oku kehe ae fuakava aia naa ne fai mo kinautolu i Holebi.

¶ 2 Bea nae ui e Mosese ki Isileli kotoabe, o ne behe kiate kinautolu, Kuo mou mamata ki he mea kotoabe nae fai e Jihova i ho mou ao i he fonua ko Ijibite kia Felo, bea ki he ene kau tamaioeiki kotoabe, bea ki hono fonua kotoabe.

3 Koe gaahi mea ahiahi aia nae mamata ki ai a ho mata, ae gaahi fakailoga, moe gaahi mana lahi koia:

4 Ka oku heeki ai foaki kiate kimoutolu e Jihova ae loto ke ilo, moe mata ke mamata, moe teliga ke ogo, o a‘u mai ki he aho ni.

5 Bea kuou tataki akimoutolu i he ta‘u e fagofulu i he toafa oku heeki ai fakaaau o motua ho mou gaahi kofu, bea oku ikai hoko o motua ho tobuva‘e i ho va‘e.

6 Kuo ikai te mou kai ma, bea kuo ikai te mou inu uaine be ha inu malohi: koeuhi ke mou ilo ko au ko Jihova ko ho mou Otua.

7 Bea i hoo mou hoko ki he botu ni, nae ha‘u a Sihoni koe tu‘i o Hesiboni, mo Oki koe tu‘i o Besani, o tuu hake ko ho tau tau‘i, bea naa tau teia akinaua:

8 Bea naa tau ma‘u ho na fonua, bea nae foaki ia koe tofia ki he faahiga o Lubeni, moe faahiga o Kata, bea ki hono vaeuaaga oe faahiga o Manase.

9 Koia mou tauhi ae gaahi lea ae fuakava ni, o fai ki ai, koeuhi ke mou monuia i he mea kotoabe oku mou fai.

¶ 10 Oku mou tutuu kotoabe he aho ni i he ao o Jihova ko ho mou Otua; koe gaahi eiki o ho mou gaahi faahiga, mo ho mou kau mātua, mo ho mou kau matābule, bea moe kau tagata kotoabe o Isileli,

11 Mo hoo mou gaahi fānau jii, mo ho mou gaahi unoho, moe muli oku i ho abitaga, o fai mei he tagata oku ta a hoo fefie o a‘u kiate ia oku utu a hoo vai:

12 Koeuhi ke ke fai ha fuakava mo Jihova ko ho Otua, bea ki he ene folofola fakababau, aia oku fai e Jihova ko ho Otua mo koe he aho ni:

13 Koeuhi ke ne fokotuu mau koe he aho ni koe kakai moona, bea ke hoko ia kiate koe koe Otua, o hage ko ene folofola kiate koe, bea hage ko ene fuakava ki hoo gaahi tamai, kia Ebalahame, mo Aisake, bea mo Jekobe.

14 Bea oku ikai ko eku fai ae fuakava ko eni, moe lea fakababau ni kiate kimoutolu be;

15 Ka kiate ia oku tau tutuu moia he aho ni i he ao o Jihova ko ho tau Otua, bea moia foki oku ikai i heni mo kitautolu he aho ni:

16 (He oku mou ilo be nae fefe e tau nofo i he fonua ko Ijibite; bea moe tau laka mai i he gaahi buleaga aia naa mou ha‘u o ofi ki ai;

17 Bea kuo mou mamata ki he e nau gaahi mea kovi, mo ho nau gaahi otua loi, koe akau, moe maka, moe siliva, moe koula, aia nae iate kinautolu:)

18 Telia naa iate kimoutolu ha tagata, be ha fefine, be ha fale, be ha faahiga, oku tafoki hono loto he aho ni mei a Jihova ko ho tau Otua, ke alu o tauhi ae gaahi otua oe gaahi buleaga ni; telia naa iate kimoutolu ae aka oku fua aki ae ahu moe kona;

19 Bea e hoko ai o behe, i he ene ogo‘i ae gaahi lea oe fakamalaia ni, te ne mahalo lelei kiate ia i hono loto, o behe, Teu ma‘u be ae fiemalie, ne ogo eku eveeva be i he filioi a hoku loto, ke fakalahi aki ae kona ki he fieinu:

20 E ikai mamae kiate ia a Jihova, ka e vela ae houhau moe fuaa o Jihova ki he tagata koia, bea koe gaahi malaia kotoabe aia kuo tohi i he tohi ni, e tuku tonu kiate ia, bea e tamate‘i Jihova hono higoa mei he lalo lagi.

21 Bea e vahe‘i ia e Jihova ki he kovi mei he gaahi faahiga o Isileli, o fakatatau ki he gaahi malaia oe fuakava aia kuo tohi i he tohi ni oe fono:

22 Koia, koe toutagata amui i hoo mou fānau aia e tubu hake kimui iate kimoutolu, bea moe muli aia e ha‘u mei he fonua mamao, te nau behe, i he e nau mamata ki he gaahi tautea oe fonua koia, moe gaahi mahaki aia kuo tuku ki ai e Jihova;

23 Bea kuo hoko ae fonua kotoabe koe sulifa, moe masima, moe vela, oku ikai tūtūi ia be fua, be tubu ha mohuku i ai, ka oku hage koe fulihi o Sotoma, mo Komola, ko Atima, mo Siboimi, aia nae fulihi e Jihova i he ene tubutamaki, bea i hono houhau lahi:

24 Io, e lea ae buleaga kotoabe, o behe, Koeha kuo fai behe ai a Jihova ki he fonua ni? koeha hono uhiga oe kakaha o hono houhau lahi ni?

25 Bea e behe e he kakai, Koe mea i he e nau liaki ae fuakava a Jihova koe Otua oe nau gaahi tamai, aia nae fai mo kinautolu i he ene omi akinautolu kituaa mei he fonua ko Ijibite:

26 He naa nau alu o tauhi ae gaahi otua kehe, bea lotu ki ai, ae gaahi otua nae ikai te nau ilo, bea nae ikai te ne foaki kiate kinautolu:

27 Bea nae tubu ai ae houhau o Jihova ki he fonua ni, ke fakahoko ki ai ae gaahi malaia kotoabe kuo tohi i he tohi ni:

28 Bea nae taaki akinautolu e Jihova mei ho nau fonua i he houhau, bea i he houhau lahi, bea i he tubutamaki lahi, bea ne li akinautolu ki he fonua kehe, o hage koia oku fai he aho ni.

29 Koe gaahi mea lilo oku a Jihova ko ho tau Otua: ka koe gaahi mea kuo fakaha oku a tautolu ia moe tau fānau o taegata, koeuhi ke tau fai ae lea kotoabe oe fono ni.