¶ 1 BEA nae alu a Mosese o ne lea aki ae gaahi lea ni ki Isileli kotoabe.

2 Bea nae behe eia kiate kinautolu, Koe ta‘u eni e teau moe ta‘u e uofulu o hoku motua he aho ni; oku ikai teu kei faa alu kituaa mo ha‘u ki lotoa: bea kuo behe foki e Jihova kiate au, E ikai te ke alu koe ki he kauvai e taha o Joatani.

3 Ko Jihova ko ho Otua, e alu ia o muomua iate koe, bea e fakaauha eia ae gaahi buleaga ni mei ho ao, bea te ke ma‘u akinautolu: bea ko Josiua, e alu ia o muomua iate koe, o hage koe folofola a Jihova.

4 Bea e fai e Jihova kiate kinautolu o hage ko ene fai kia Sihoni bea kia Oki, koe ogo tu‘i ae kau Amoli, bea ki ho na fonua, aia naa ne fakaauha.

5 Bea e tukuage akinautolu e Jihova i ho mou ao, koeuhi ke mou fai kiate kinautolu o fakatatau ki he gaahi fekau aia kuou fekau ni kiate kimoutolu.

6 Ke ke malohi koe bea ke loto to‘a, oua naa ke lilika, bea oua naa ke manavahe kiate kinautolu: he ko Jihova ko ho Otua, koia ia oku mo o mo koe; e ikai te ne fakatukutuku‘i koe, be liaki koe.

¶ 7 Bea nae ui e Mosese kia Josiua, o ne behe kiate ia i he ao o Isileli kotoabe, ke ke malohi koe bea ke loto to‘a: he ko koe te ke alu moe kakai ni ki he fonua aia nae fuakava ai e Jihova ki he e nau gaahi tamai ke foaki kiate kinautolu; bea te ke fakahoko akinautolu ki ai ke nau ma‘u ia.

8 Bea ko Jihova, koia ia oku alu muomua iate koe; e iate koe ia, e ikai te ne fakatukutuku‘i koe, be liaki koe; oua naa ke manavahe, bea oua naa ke bubutuu.

¶ 9 Bea nae tohi e Mosese ae fono ni, bea ne atu ia ki he kau taulaeiki koe gaahi foha o Livai, aia nae haamo ae buha oe fuakava a Jihova, bea ki he kau mātua kotoabe o Isileli.

10 Bea nae fekau e Mosese kiate kinautolu, o behe, I he gataaga o hono fitu ta‘u kotoabe, bea i he katoaga oe ta‘u oe tukuage, i he katoaga oe gaahi fale fehikitaki,

11 I he hoko mai a Isileli kotoabe i he ao o Jihova ko ho Otua ki he botu aia te ne fili, ke ke lau ae fono ni i he ao o Isileli kotoabe ke nau ogo‘i.

12 Fakakatoa fakataha ae kakai, ae tagata, moe fefine, moe fānau, moe muli oku nofo i ho gaahi mataba, koeuhi ke nau fanogo, bea ke nau ilo, bea manavahe kia Jihova ko ho nau Otua, bea tokaga ke fai ae gaahi lea kotoabe oe fono ni:

13 Bea koe nau fānau, aia oku teeki hoko o ilo ha mea, ke nau ogo‘i, bea ilo ke manavahe kia Jihova ko ho mou Otua, i he lolotoga oku mou moui i he fonua aia oku mou alu ki ai i he kauvai e taha o Joatani ke ma‘u ia.

¶ 14 Bea nae folofola a Jihova kia Mosese, Vakai, oku unuunu mai a ho gaahi aho te ke mate ai: ui kia Josiua, bea fakaha akimoua i he fale fehikitaki oe kakai, koeuhi keu tuku ha fekau kiate ia. Bea nae alu a Mosese mo Josiua, o na fakaha akinaua i he fale fehikitaki oe kakai.

15 Bea nae fakaha a Jihova i he fale fehikitaki i he bou oe ao: bea nae tuu ae bou oe ao i oluga i he mataba oe fale fehikitaki.

¶ 16 Bea nae folofola a Jihova kia Mosese, Vakai, te ke mohe koe mo hoo gaahi tamai: bea e tuu hake ae kakai ni, o alu o fai agahala ki he gaahi otua oe kau muli oe fonua, aia oku nau alu ki ai ke nonofo mo kinautolu, bea te nau liaki au, o liaki ae fuakava aia kuou fai mo kinautolu.

17 Bea e tubu ai eku houhau kiate kinautolu i he aho koia, bea teu liaki akinautolu, bea teu fufu hoku fofoga meiate kinautolu, bea e fakaojioji akinautolu, bea e hoko ae gaahi kovi lahi moe gaahi mamahi lahi kiate kinautolu; koia te nau lea ai i he aho koia, Ikai kuo hoko ae gaahi kovi ni kiate kitautolu, koeuhi oku ikai iate kitautolu a ho tau Otua?

18 Bea koe mooni teu fufu hoku fofoga i he aho koia mei he gaahi kovi kotoabe aia kuo oji e nau fai, koe mea i he e nau tafoki ki he gaahi otua kehe.

19 Bea koeni, mo tohi ae hiva ni maa moutolu, bea ako aki ia ki he fānau a Isileli: ai ia ki ho nau gutu, koeuhi ke hoko ae hiva ni koe fakamooni kiate au, ki he fānau a Isileli.

20 Koeuhi i he hili eku omi akinautolu ki he fonua aia naaku fuakava ai ki he e nau gaahi tamai, aia oku mahu tafea i he hua huhu moe honi; bea hili e nau kai o fakamakona akinautolu, bea  nau hoko o jino; te nau toki tafoki ki he gaahi otua kehe, o tauhi akinautolu, fakahouhau‘i au, bea liaki eku fuakava.

21 Bea e hoko o behe, i he hoko ae gaahi kovi lahi moe mamahi lahi kiate kinautolu, e fakailo e nau kovi e he hiva ni o hage ha fakamooni; koeuhi e ikai galo ia mei he gutu o ho nau hako: he oku ou ilo e nau mahalohalo ni aia oku nau fealualu fano o fai ni, i he teeki ai teu omi akinautolu ki he fonua aia naaku fuakava ki ai.

¶ 22 Koia nae tohi ai e Mosese ae hiva ni i he aho be koia, o ne ako‘i ia ki he fānau a Isileli.

23 Bea naa ne tuku kia Josiua koe foha o Nuni ae fekau, o ne behe, Ke ke malohi koe bea ke loto to‘a: koeuhi te ke fakahoko ae fānau a Isileli ki he fonua aia naaku fuakava ai kiate kinautolu: bea teu iate koe.

¶ 24 Bea nae hoko o behe, i he fakaoji e Mosese ae tohi oe gaahi lea oe fono ni ki he tohi, o a‘u atu ki hono kakato,

25 Nae fekau e Mosese ki he kau Livai, aia nae haamo ae buha oe fuakava a Jihova, o behe,

26 Ave ae tohi ni oe fono, bea ai ia ki he kaokao oe buha ae fuakava a Jihova ko ho mou Otua, koeuhi ke i ai ia koe mea fakamooni kiate koe.

27 He oku ou ilo hoo talagataa, mo hoo kia kekeva: Vakai, i he eku kei moui mo kimoutolu he aho ni, kuo mou fai talagataa kia Jihova; kae mua hake o kau ka mate!

¶ 28 Fakakatoa mai kiate au ae kau mātua kotoabe o ho mou gaahi faahiga, mo ho mou kau matābule, koeuhi keu lea aki ae gaahi lea ni i ho nau teliga, bea ui ki lagi mo mamani ke fakamooni kiate kinautolu.

29 He oku ou ilo o kau ka mate te mou fakahala‘i aubito akimoutolu, bea tafoki mei he hala aia kuou fekau kiate kimoutolu; bea e to ae kovi kiate kimoutolu i he gaahi aho amui; koe mea i hoo mou fai kovi i he ao o Jihova, ke fakatubu ai hono houhau i he gaue a ho mou nima.

30 Bea nae lea a Mosese kae fanogo ae fakataha oe kakai kotoabe o Isileli ki he gaahi lea oe hiva ni, o a‘u ki hono gataaga.